சமூக வலைத்தளங்களில் பிரச்சாரம்: களமிறங்கும் கட்சிகள்

socail media

தமிழக தேர்தல் களத்திலிருந்து காதைப் பிளக்கும் ஒலிப்பெருக்கிகள், வழியை மறிக்கும் ஆளுயற கட் அவுட்களுக்கு இனி ஓய்வெடுக்கும் காலம் வந்துவிட்டதுபோல. இப்போது சமூக வலைத்தளங்கள்தான் தேர்தலுக்காக பரபரத்துக்கொண்டிருக்கின்றன. 35 சதவித இளம் வாக்காளர்களை முன்வைத்து கட்சிகள் சமூக வலைத்தளங்களில் தங்களுடைய பிரச்சாரங்களை முன்னெடுப்பதற்கென்றே தனிப் பிரிவுகளை ஏற்படுத்தி செயல்பட்டுவருகின்றன.

தமிழக தேர்தல் களத்தில் அன்புமணியை முதலமைச்சர் வேட்பாளராக அறிவித்து வேலையை ஆரம்பித்த பாட்டாளி மக்கள் கட்சி, சமூக வலைத்தளத்திலும் தன்னுடைய பிரச்சாரத்தை ஆறு மாதத்துக்கு முன்பே முடுக்கிவிட்டது. இதற்கென்றே பாமகவில் தகவல் தொழிற்நுட்பம் படித்தவர்களைக் கொண்டு தமிழ் சமூக ஊடகத்துறை என்ற பெயரில் ஒரு பிரிவு செயல்படுகிறது.

“சமூக வலைத்தளங்களில் பாமகவின் முக்கிய உத்தி, அன்புமணியின் பெயரில் வெளியிடப்பட்ட ஆப் என்று சொல்லலாம். இந்த ஆப்பை பாமகவினர் அதிகம் பயன்படுத்துவார்கள். இந்த ஆப் மூலம் ‘விழித்திரு’ என்ற பெயரில் தினமும் அன்புமணி ஒரு ஊக்கப்படுத்தும் வாக்கியத்தை அனுப்புவார். சில சமயம் விடியோக்களும் ஆப் வழியாக அனுப்பப்படும். இந்த விஷயங்களை சமூக வலைத்தளங்களில் ஷேர் செய்வதற்கு ஆப்’பில் வசதிகள் செய்யப்பட்டுள்ளன. இந்த ஆப் வைத்திருப்பவர்கள் சமூக வலைத்தளங்களில் இவற்றைப் பகிர்ந்துகொள்வார்கள்” என்கிறார் பாமகவின் சமூக வலைத்தள நிர்வாகிகள் குழுவில் உள்ள ஜெயக்குமார்.

பாமக அறிவித்துள்ள வரைவு தேர்தல் அறிக்கையை சிறு சிறு பகுதிகளாக்கி அதை ட்விட்டர், ஃபேஸ்புக்கில் பகிர்வதை தற்சமயம் செய்துவருவதாகச் சொல்லும் இவர், தமிழக கட்சிகளில் பாமக சமூக வலைத்தளங்களைப் பயன்படுத்துவதில் முன்னோடியாகச் செயல்படுவதாகச் சொல்கிறார்.

“மீம்ஸ் வடிவமைத்த பிறகு மின்னஞ்சல் குழுக்கள், வாட்ஸ் அப் குழுக்கள் வழியாக கட்சியினருக்கு அனுப்புவோம். அவர்கள் அதை சமூக வலைத்தளங்களில் பகிரச் செய்வார்கள்” என்கிறார். இந்தக் குழுவில் பெண்களும் இருப்பதாகச் சொல்கிறார் ஜெயக்குமார்.

திராவிட முன்னேற்றக் கழகத்தின் பொருளாளர் மு.க.ஸ்டாலின் ‘நமக்கு நாமே’ பயணத்தை சமூக வலைத்தளங்களில் பரப்ப ஐந்து பேர் கொண்ட குழு செயல்படுகிறது. இணையதளத்தை நிர்வகிப்பது, ஸ்டாலினின் பயணங்கள் பற்றிய பதிவுகளை சமூக வலைத்தளங்களில் பகிர்ந்துகொள்வது இந்தக் குழுவின் முக்கியமான வேலை. மற்ற கட்சியினரை விமர்சிக்கும் மீம்ஸ் வடிவமைப்பது திமுகவினரும் திமுக அனுதாபிகளுமே என்கிறார் இந்தக் குழுவில் உள்ள ஒருவர்.

“ஸ்டாலினின் நமக்கு நாமே பயணத்தை கேலி செய்து நிறைய மீம்ஸ் வரும். அதற்கு கவுண்ட்டர் கொடுப்பதுபோல நமக்கு நாமே பயணத்தைப் பற்றிய பாஸிட்டிவ் மீம்ஸை வெளியிடுவார்கள். எதிர் தரப்பை கேலி செய்யும் மீம்ஸும் போடுவார்கள். பெரும்பாலும் திமுகவினரே இதைச் செய்கிறார்கள்” என்கிறார் திமுக சமூக வலைத்தளங்களை நிர்வகிக்கும் பிரிவைச் சேர்ந்த ஒருவர்.

எதிர்க்கட்சிகள் சமூக வலைத்தள பிரச்சாரங்களை முடுக்கிவிட்டிருக்கும் நிலையில் கடந்த விஜயதசமி அன்று தன்னுடைய பிரச்சாரத்தைத் தொடங்கியிருக்கிறது அதிமுக. அஸ்பையர் சாமிநாதன் தலைமையில் தகவல் தொழிற்நுட்பப் பிரிவு இந்தப் பணிக்கென்றே செயல்படுகிறது.

“இளைஞர் இன்று கண்விழிப்பதே ஃபேஸ் புக்கிலும் ட்விட்டரிலும்தான். அவர்கள் தெருமுனைக் கூட்டங்கள், பொதுக்கூட்டங்களுக்கு வருவார்கள் என்று எதிர்ப்பார்க்க முடியாது. அதனால்தான் அம்மாவின் நல்லத் திட்டங்கள் பற்றி எடுத்துச் சொல்ல விஜயதசமியில் ‘ஒளிரும் நிகழ்காலம் மிளிரும் வருங்காலம்’ என்று ஒரு பிரச்சாரத்தை முன்னெடுத்தோம். பத்து நாட்களுக்குப் பிறகு, ‘தழைக்கட்டும் தமிழர்கள் செழிக்கட்டும் தமிழகம்’ என்ற கோஷத்தை முன்னெடுத்தோம். அடுத்ததாக ஞாயிற்றுக்கிழமை
பெசண்ட் நகர் கடற்கரையில் புதிய பிரச்சாரப் பயணம் ஒன்றை தொடங்கவிருக்கிறோம்” என்கிற சாமிநாதன், விஜயதசமியில் வெளியிடப்பட்ட அதிமுகவின் சாதனைகளைச் சொல்லும் விடியோவை இரண்டு கோடி பார்வைகளுக்கும் மேல் சென்றிருப்பதாகச் சொல்கிறார்.

சமூக ஊடகங்களில் பிரச்சாரம் செய்வதற்காக தனிக் குழு என்று சொல்லும் இந்தக் கட்சிகளைத் தவிர, காங்கிரஸ், பாஜக, மக்கள் கூட்டணி போன்ற கட்சிகள் சமூக ஊடகப் பிரச்சாரம் குறித்து அறிவிக்கவில்லை. ஆனால், அந்தந்த கட்சி சார்ந்தவர்கள் அவ்வவ்போது நடக்கும் நிகழ்வுகளை சமூக வலைத்தளங்களில் பரப்பி வருகிறார்கள்.

 

Advertisements