டெல்லியில் மையம்கொண்ட மாணவர் போராட்டம்!

அனைவருக்கும் கல்வி அளிப்பது அரசின் கடமை என்கிறது அரசியலைப்புச் சட்டம். ஒவ்வொரு அரசு, மக்களின் ஆதரவை வேண்டி நிற்கும்போது கல்வியை அனைவருக்குமானதாக மாற்றுவோம் என்கிற வாக்குறுதியை தவறாமல் முன்வைக்கின்றன. ஆனால் நடப்பது என்னவோ, அதற்கு மாறாகத்தான். கல்வியைத் தனியார் மயம் ஆக்குவதில் உலகிலேயே முன்னணி நாடாக இந்தியா இருக்கிறது என்கின்றன ஆய்வுகள்.   காங்கிரஸ் ஆட்சியில் திறந்துவிடப்பட்ட தனியார்மய கதவுகள் பாஜக ஆட்சியில் உச்சம் பெற்றுக்கொண்டிருக்கின்றன என்று அச்சம் தெரிவிக்கிறார்கள் கடந்த 76 நாட்களாக போராட்டத்தில் இறங்கியிருக்கும் மாணவர்கள்.

ஏன் இந்த மாணவர்கள் போராடுகிறார்கள்? தனியார்மயமாவதற்கும் இந்த மாணவர்களுக்கு என்ன தொடர்பு? மத்திய அரசின் மனித வள மேம்பாட்டு அமைச்சகத்தின் கீழ் இயங்கும் பல்கலைக் கழக மானியக் , பல்கலைக் கழகங்களுக்கு அனுமதி வழங்குவது, அரசு பல்கலைக்கழகங்களுக்கு அரசின் நிதியை பகிர்ந்தது போன்ற பணிகளைச் செய்கிறது. நிதி அளிக்கும் திட்டத்தின் ஒரு பகுதியாக பல்கலைக் கழக மானியக் குழு எம். ஃபில், பிஎச்டி படிக்கும் மாணவர்களுக்கு உதவித்தொகை அளித்து வருகிறது. இதற்கென பிரத்யேகமாக வைக்கப்படும் தேர்வுகள் மூலம், மாணவர்கள் தேர்ந்தெடுக்கப்பட்டு கல்வித் தொகை பெறுவார்கள். 35 ஆயிரம் மாணவர்கள் கல்வி உதவித் தொகை பெறுகிறார்கள். எம்.ஃபில் மாணவர்கள் 5 ஆயிரம் ரூபாயும் பிஎச்டி மாணவர்கள் 8 ஆயிரம் ரூபாயும் உதவியாகப் பெறுவார்கள்.

மாணவர்களின் ஆய்வு ரீதியிலான பங்களிப்பை ஊக்குவிக்கவும் ஆய்வு காலக்கட்டத்தில் அவர்களுடைய பொருளாதார சுமைகளைக் குறைக்கவும் ஏற்படுத்தப்பட்ட இந்த உதவித் தொகைத் திட்டத்தை மோடி தலையிலான பாஜக அரசு பதவியேற்றதும் நிறுத்துவதாக அறிவித்தது. இதனால் பாதிக்கப்பட்ட மாணவர்கள் களத்தில் இறங்கிப் போராடி வருகின்றனர்.
இந்த உதவித் தொகை நிறுத்தம் குறித்து பல்கலைக் கழக மானியக் குழு சரியான விளக்கம் அளிக்கவில்லை என்பது மாணவர்கள் போராட்டத்தை மேலும் தீவிரமாக்கியது. முற்றுகை யூ.ஜி.சி என்கிற முழக்கத்துடன் டெல்லி சாலையில் இறங்கிப் போராட ஆரம்பித்தார்கள். டெல்லி போலீஸ் காட்டுத்தனமாக அவர்களை அடித்து முடக்கப் பார்த்தது. போராட்டத்தின் போது தண்ணீர் பீய்ச்சி அடிப்பதும், லத்தி கம்புகளால் மாணவர்களின் மண்டைகள் உடைபடுவதும் நடந்தேறின.

2014-2015 ஆம் ஆண்டு ரூ. 99.16 கோடி மாணவர்களுக்கு நிதி உதவியாக அளிக்கப்பட்டதாகவும் இந்த உதவித் தொகை சரியான முறையில் தேவையானவர்களுக்குப் போய் சேரவில்லை என்று மானியக் குழு அதிகாரிகள் வட்டாரத்தில் காரணமாக சொல்லப்பட்டது. உதவித் தொகை சரியானவர்களுக்குப் போய்சேரவில்லை என்பதற்கு மாணவர்கள்  எப்படி பொறுப்பாக முடியும்? அரசுதான் அதை முறைப்படுத்த வேண்டும் என்று மாணவர்கள் தரப்பில் இருந்து வாதங்கள் வந்தன.

மாணவர்களின் போராட்டம் நாளுக்கு நாள் வலுத்ததை அடுத்து மத்திய மனிதவள மேம்பாட்டுத் துறை அமைச்சர் ஸ்மிருதி இரானி, நிதி உதவித் தொகை நிறுத்தப்படாது என அறிவித்தார். ஆனால், மானியக்குழுவுக்கு அவர் அனுப்பிய கடிதத்தில், உதவித் தொகை அளிக்கும் மாணவர்களை தகுதி அடிப்படையில் பிரித்து அளிக்கும்படி உத்தரவிட்டிருந்தார். மாணவர்கள் தரப்பில், இதற்கு கடும் எதிர்ப்பு கிளம்பியது. உதவித் தொகைக்கு தனியாக தேர்வு எழுதிவிட்டு, தகுதி அடிப்படையில் மீண்டும் ஒரு தேர்வு என்பது உரிமையை பறிக்கும் செயல் என்று கடந்த 76 நாட்களாக போராட்டம் நடத்திவருகிறார்கள்.

‘வளர்ச்சியின் நாயகனாக’ நடுத்தர மக்கள் நம்பிய மோடி தங்களுக்கு செலுத்திவரும் நன்றிக்கடனை நினைத்து மனம் வெதும்பிப் போய் இருக்கிறார்கள். அதனுடைய வெளிப்பாடாகத்தான் நடுத்தர வர்க்க மாணவர்கள் இன்று களம் இறங்கிப் போராடிக் கொண்டிருக்கிறார்கள். கல்விக்கொள்கையில் அந்நிய முதலீட்டுக்கு ஒப்பந்தம் போட இருக்கும் மத்திய அரசு, எதிர்கொள்ள இன்னும் போராட்டங்கள் நிறைய உள்ளன…

தினச்செய்தி(6-1-2016) நாளிதழில் வெளியான கட்டுரை

Advertisements

One thought on “டெல்லியில் மையம்கொண்ட மாணவர் போராட்டம்!

  1. நீங்க கல்வி கற்பிப்பது அரசின் கடமை,தேவை பற்றி எழுதுகிறீர்கள். ஜல்லிக்கட்டு மீதான தடையை அரசு எடுத்துவிட்டது, தமிழர்களின் வீர தீர விளையாட்டு ஜல்லிக்கட்டை இனி விளையாடி முன்னேற போவதாக மக்களில் பலரும் தமிழக அரசியல்கட்சிகளும் கொண்டாடி கொண்டிருக்கிறார்கள்.

பின்னூட்டங்கள் மூடப்பட்டுள்ளது.