சத்யபாமா கல்லூரியில் ராகிங்; ‘இந்து தாலிபான்’; இலங்கைப் பெண்ணுக்கு சாகும்வரை கசையடி தண்டனை

எவ்வளவுதான் கடுமையான சட்டங்கள் வந்தாலும் கல்விச் சாலையின் கறைபடிந்த குற்றமாக இருக்கிற ராகிங் குறைந்தபாடில்லை. அவ்வவ்போது அப்பாவி இளைஞர்களின் உயிரை இந்த ராகிங் கொடூரம் பறித்துக் கொண்டிருக்கிறது. அதற்கொரு சமீபத்திய உதாரணமாகியிருக்கிறார் வெங்கட கிருஷ்ணா சைதன்யா(19).

வெங்கட கிருஷ்ண சைதன்யா
வெங்கட கிருஷ்ண சைதன்யா

ஹைதராபாத்தின் நிஜாம்பேட்டைச் சேர்ந்த சைதன்யா, சென்னை சத்யபாமா கல்லூரியில் இரண்டாம் ஆண்டு பி.டெக் மாணவர். லால் பாபு என்ற வர்த்தகரின் இளைய மகன்.

முதலாம் ஆண்டு சத்யபாமா கல்லூரி விடுதியில் தங்கிப் படித்த சைதன்யா, இந்த ஆண்டு தன்னைப் போல மூன்று மாணவர்களுடன் சேர்ந்து கல்லூரிக்கு அருகில் வீடு எடுத்து தங்கிப் படித்தார்.

தன்னுடன் தங்கியிருந்த சேகர் என்ற மாணவர், தினமும் தன்னை பணம் கேட்டு தொல்லை கொடுத்ததாகவும் இதுப் பற்றி வெளியே சொல்லக்கூடாது என்று மிரட்டியதாகவும் தன் டைரியில் எழுதி வைத்திருக்கிறார் சைதன்யா. சைதன்யா, கல்லூரிக்கு இனி திரும்பக்கூடாது என்ற முடிவுடன் இந்த தற்கொலை முடிவு எடுத்தே ஹைதராபாத்துக்கு வந்திருக்கிறார் என சைதன்யாவின் அப்பா பாபு தி ஹிந்துவுக்கு அளித்த பேட்டியில் தெரிவித்திருக்கிறார்.

இந்நிலையில், சைதன்யா ராகிங் செய்யப்பட்டது குறித்து எந்தவித புகாரும் தங்களுக்கு வரவில்லை என கல்லூர் நிர்வாகம் தெரிவித்துள்ளது.

சவுதியில் பணிபுரிந்த இலங்கைப் பெண் ஒருவர் திருமணம் ஆன ஆணுடன் உறவு வைத்திருந்ததாகக் கூறி கைது செய்யப்பட்டார். இலங்கையைச் சேர்ந்த அந்த ஆணுடன் உறவு வைத்திருந்ததை அந்தப் பெண் நீதிமன்றத்தில் ஒப்புக் கொண்டார். இதனடிப்படையில் ஷரியா சட்டத்தின்படி அவரை கல்லால் அடித்துக் கொலை செய்யுமாறு உத்தரவிடப்பட்டுள்ளது சவுதி அரசு.இந்தப் பெண்ணுடன் தொடர்புடைய ஆணுக்கு நூறு கசையடிகள் தண்டனையாக விதிக்கப்பட்டுள்ளது.

இந்திய-பிரிட்டன் சிற்பக் கலைஞரான அனிஷ் கபூர், கடந்த வாரம் இந்திய பிரதமர் நரேந்திர மோடியை விமர்சித்து ‘இந்தியாவில் இந்து தாலிபான்’ ஆட்சி நடக்கிறது என்கிற தலைப்பில் ஒரு கட்டுரை எழுதியிருந்தார். நரேந்திர மோடி இங்கிலாந்து சென்றிருந்த நேரத்தில் இந்தக் கட்டுரை பிரிட்டனின் பிரபல நாளிதழான கார்டியனில் வெளியாகி பரபரப்பானது.

“இந்தியாவில் உள்ள 500 மில்லியன் சமூக, மத சிறுபான்மையினர் வாழ்க்கை அச்சுறுத்தலுக்கு உள்ளாகியிருக்கிறது. மோடியின் அரசாங்கம் சகிப்பின்மையை ஆதரித்துக்குக் கொண்டிருக்கிறது. யார் மாட்டிறைச்சி உண்கிறார்கள் என்பதையும் சாதி படிநிலைகளை யார் மீறுகிறார்கள் என்பதையும் இந்து தேசத்துக்கு எதிராக யார் பேசுகிறார்கள் என்பதையும் காவிப் படை கண்காணித்துக் கொண்டிருக்கிறது” என்று தனது கட்டுரையில் குறிப்பிட்டிருந்தார்.

இந்தக் கட்டுரை வெளியானதற்குப் பின் ராஜஸ்தான் அரசின் கலாச்சார மையத்தின் உறுப்பினர் பொறுப்பிலிருந்து அனிஷ் கபூர் நீக்கப்பட்டுள்ளார். வசுந்தரா ராஜே தலைமையிலான பாஜக அரசு ராஜஸ்தான் மாநிலத்தை ஆள்கிறது என்பது குறிப்பிடத் தகுந்தது. இந்நிலையில் ராஜஸ்தான் அரசின் முடிவு சர்ச்சையை ஏற்படுத்தியிருக்கிறது.

 

 

Advertisements

ஃப்ரண்ட்லைன் ஆசிரியர் மீது முகநூலில் தாக்குதல்

vijayasankar

தமிழ்நாட்டிலிருக்கும் இலங்கை அகதிகள் முகாமின் நிலை, அவர்களின் எதிர்காலம் குறித்து புதன்கிழமை சென்னையில் கருத்தரங்கு நடைப்பெற்றது. இதில் கலந்துகொண்ட முன்னாள் வெளியுறவுத் துறைச் செயலர் எம்.கே. நாராயணன் மீது காலணிகளை வீசினார் புதுக்கோட்டையைச் சேர்ந்த பிரபாகரன் என்பவர். இந்நிகழ்ச்சியில் கலந்துகொண்ட ஃப்ரண்டலைன் ஆங்கில இதழின் ஆசிரியர் ஆர். விஜயசங்கர் தன்னுடைய முகநூலில் இதுபற்றி எழுதியிருந்தார்.

“தமிழ்நாட்டிலிருக்கும் இலங்கை அகதிகள் முகாமின் நிலை, அவர்களின் எதிர்காலம் குறித்து Frontline இதழில் வெளியான கட்டுரையின் அடிப்படையில் The Hindu Centre for Policy Research ஒரு அருமையான கருத்தரங்கை சென்னையில் நடத்தியது. நிகழ்வு முடிந்தவுடன் அதில் பங்கேற்ற முன்னாள் தேசிய பாதுகாப்புச் செயலாளர் கூட்டத்திலிருந்த ஒருவனால் தாக்கப்பட்டார். “அம்மா நிறைவேற்றிய தீர்மானத்தை நீ மதிக்கவில்லை” என்று கூச்சலிட்ட அந்த நபரை போலீசார் கைது செய்தனர். அதிர்ச்சியளித்த இந்த வன்செயல் கண்டனத்திற்குரியது” என்ற விஜயசங்கரின் அந்தப் பதிவுக்கு பலர் எதிர்ப்பு தெரிவித்து பின்னூட்டமிட்டிருந்தனர். அதில் ஒரு பின்னூட்டம் ஆட்சேபத்துக்குரிய வகையில் இருந்ததாகச் சொல்லியிருக்கிறார் விஜயசங்கர்.

“எதிர்வினையாக ஒரு நபர் “உனக்கும் ஒரு மகள் இருக்கிறாள்” என்று சொல்லி என் மகளின் படத்தைப் போட்டு இசைப்பிரியாவை நினைவிருக்கிறதா என்று கேட்டிருந்தார். அதை நான் அழித்துவிட்டு அந்த நபரையும் பிளாக் செய்துவிட்டேன்” என்றவர் இலங்கைத் தமிழர் பிரச்சினையில் தன்னுடைய நிலைப்பாட்டைத் தெளிவுபடுத்தியிருக்கிறார்.

“இசைப்பிரியாவிற்கும் பிற இலங்கைத் தமிழ் மக்களுக்கும் நிகழ்ந்த கொடுமைகள் உலகில் வேறு யாருக்குமே நடக்கக்கூடாது. 1983-இல் வெளிக்கைடைச் சிறையில் தமிழர்கள் மீது நடந்த கொடூரத் தாக்குதலுக்கு எதிராகத் தமிழகமே பொங்கி எழுந்தது. திருச்சியில் நடந்த மாணவர் போரட்டங்களில் நான் கலந்து கொண்டேன். பல போராளிக்குழுக்களுக்கு ஆதரவாக நிதியும் திரட்டிக் கொடுத்திருக்கிறேன்” என்று சொன்னவர், இதுபோன்ற அவதூறு, மிரட்டல்களுக்கெல்லாம் அஞ்சப்போவதில்லை என்றும் தெரிவித்திருக்கிறார்.

“1984- இல் சீக்கியருக்கு எதிரான வன்முறை நடந்தபோது மிகவும் அபாயகரமான சூழலில் பல சீக்கியர்களை நானும் என்னுடைய இந்திய மாணவர் சங்க தோழர்களும் காப்பற்றியிருக்கிறோம்.
பள்ளியில் படிக்கும் போதெ எமர்ஜென்சி அக்கிரமங்களைச் சந்தித்த அனுபவமும் உண்டு. அதனால் இந்த மாதிரி மிரட்டல்களுக்கு அஞ்சுபவன் நானல்ல. அச்சம் இருந்தால் நான் பத்திரிக்கைத் துறைக்கு வந்திருக்கவே மாட்டேன்” என்று தனது முகநூல் பதிவில் எழுதியிருக்கிறார்.

 

இலங்கையில் காலூன்றும் ஆர்எஸ்எஸ்

rss

தனது அகண்ட பாரதக் கனவை நிறைவேற்றும் முனைப்பில் இந்துத்துவ அமைப்பான ராஷ்டிரிய ஸ்வயம் சேவக் சங்கம் முனைப்புடன் உள்ளதை செய்திகள் சொல்கின்றன. ஞாயிற்றுக்கிழமை கொழும்பு பல்கலைக்கழகத்தின் இந்து மாணவர் ஒன்றிய விழாவில் இராமகிருஷ்ணா மிஷன் சார்பில் கலந்துகொண்டார் இந்திய நாடாளுமன்ற எம்.பி. தருண் விஜய். ஆர்எஸ்எஸ் அமைப்பின் முக்கிய செயல்பாட்டாளராக இருக்கும் பாஜக எம்பியின் இந்தப் பயணம், இந்து மாணவர் அமைப்பின் மூலம் இலங்கை தமிழர்களிடையே இந்துத்துவத்தை நிலைநிறுத்தும் முயற்சி என்று இலங்கையைச் சேர்ந்த மாணவர் அமைப்பினர் விமர்சிக்க ஆரம்பித்துள்ளனர்.

தருண் விஜய்யின் தமிழ் ஆர்வம்

தமிழை தாய்மொழியாகக் கொண்டிராத, தமிழ் நாட்டில் வாழ்ந்திராத, தமிழகத்தைப் பூர்வீகமாகக் கொண்டிராத உத்தரகாண்ட் மாநிலத்தைச் சேர்ந்த பாஜக எம்பி தருண் விஜய் கடந்த சில காலமாய் தமிழ் குறித்தும் தமிழர்கள் குறித்தும் மக்களவை வரை பேசிவருகிறார். திருவள்ளுவருக்கு ஹரித்துவாரில் சிலை எழுப்பும் முயற்சியிலும் இருக்கிறார். திருக்குறள் குறித்து தொடர்ந்து இந்தியாவெங்கும் பேசிவருவதற்காக தமிழகத்தைச் சேர்ந்த தமிழ் அமைப்புகள் இவருக்கு குறள்நெறிக் காவலர் விருது வழங்கியிருக்கின்றன.

ஆர்எஸ்எஸ் இதழான பஞ்சன்யாவின் ஆசிரியராக இருந்த தருண் விஜய், தமிழ் ஆர்வலராக காட்டிக் கொள்வது உள்நோக்கம் கொண்டது என்று அரசியல் நோக்கர்கள் ஏற்கனவே விமர்சனம் செய்திருந்தனர். இந்நிலையில் கொழும்பு பல்கலைகழகத்தின் இந்து மாணவர் அமைப்பின் விழாவுக்கு முக்கிய விருந்தாளியாக தருண் விஜய் அழைக்கப்பட்டிருப்பது இந்த விமர்சனத்தை இன்னும் கூர்மையாக்கியிருக்கிறது.

இலங்கை தமிழர்களிடம் ஆர்எஸ்எஸ்

2013-ஆம் ஆண்டில் ஆர்எஸ்எஸ் அமைப்பின் பொதுச் செயலாளர் பையாஜி ஜோஷி, இலங்கை அரசு இலங்கை தமிழர்கள் மீது பரிவுடன் நடந்துகொள்ள வேண்டும் என்று அறிக்கை வெளியிட்டிருந்தார். இந்திய கலாச்சாரத்துடம் பல ஆயிரம் ஆண்டுகள் தொடர்புள்ள இலங்கை தமிழரின் நலன் காக்கப்பட வேண்டும் என்று அவர் வலியுறுத்தியிருந்தார்.

பிரபாகரனின் மரணம் தொடர்பான நேர்க்காணலின் போது, ஓய்வுபெற்ற இந்திய கடற்படை கமாண்டோவாகப் பணியாற்றிய கார்கில் எம்.சுப்ரமணியம் இலங்கையில் இறுதிப் போரின் போது நூற்றுக்கணக்கான கோயில்கள் அடித்து நொறுக்கப்பட்டதாகவும் அவற்றைப் பார்வையிட ஆர்எஸ்எஸ் அமைப்பைச் சேர்ந்தவர்கள் சென்று வந்ததாகவும் இப்போது.காமிடம் தெரிவித்திருந்தார்.

அகண்ட பாரத கனவு

இலங்கை தமிழர்களிடையே ஆர்எஸ்எஸ் ஊடுருவல் குறித்து மே 17 இயக்கத்தைச் சேர்ந்த திருமுருகன் காந்தி இப்போது.காமிடம் பேசினார்.

“பத்தாண்டுகளுக்கு முன்பிருந்தே ஈழத்தின் கிழக்குப் பகுதிகளில் விஸ்வ ஹிந்து பரிஷத் வேலை செய்ய ஆரம்பித்துவிட்டது. தமிழர்களுக்கும் இஸ்லாமியர்களுக்கு இடையே முரண்பாட்டை உருவாக்கும் பணிகளைச் செய்து வந்தது இந்த அமைப்பு. போருக்குப் பிறகு, புனர்வாழ்வு பணிகளுக்காக இந்தியாவிலிருந்து தொண்டு நிறுவனங்கள் என்ற பெயரில் ஆர்எஸ்எஸ் துணை அமைப்புகள் ஈழத் தமிழர்களிடம் ஊடுருவின” என்று சொன்ன அவர், தமிழர்களிடைய இந்துத்துவத்தை திணிப்பதும் இஸ்லாமியருக்கும் இந்துக்களுக்குமிடையே முரண்பாட்டை உருவாக்கி அதன் மூலம் அகண்ட் இந்து தேசத்தை உருவாக்குவதும்தான் இந்த அமைப்புகளின் நோக்கம் என்றார்.

இனவாதிகளின் கைகோர்ப்பு

ஆர்எஸ்எஸ் உடன் பவுத்த இனவாத அமைப்பான பொது பல சேனா இணைந்து இலங்கை முஸ்லிம்களுக்கு எதிரான கூட்டமைப்பை உருவாக்கும் முயற்சியில் இருப்பதாக பொது பல சேனாவின் தலைவர் கடந்த 2014-ஆம் ஆண்டு தெரிவித்திருந்தார். பொது பல சேனா கடந்த ஆண்டு முஸ்லிகளுக்கு எதிரான கலவரத்தை நடத்தியதும், அதில் நான்கு பேர் பலியானதும் குறிப்பிடத்தகுந்தது.

இனவாதத்தை ஆர் எஸ் எஸுடன் கைகோர்த்து செய்ய விரும்பும் பொது பல சேனாவினர்
இனவாதத்தை ஆர் எஸ் எஸுடன் கைகோர்த்து செய்ய விரும்பும் பொது பல சேனாவினர்

“இந்துத்துவ அமைப்புகளின் அறிக்கைகளில் பிரதான எதிரிகளாக கிறித்தவர்களையும் முஸ்லிம்களையும் சொல்கிறார்களே தவிர, சிங்கள பவுத்த பேரினவாதம் குறித்து அவர்கள் வாய்த்திறப்பதில்லை. எனவே இந்து, முஸ்லீம் மக்களிடையே முரண்பாட்டை வளர்ப்பதுதான் அவர்களுடைய நோக்கம் என்பதை புரிந்துகொள்ளலாம்” என்கிறார் திருமுருகன் காந்தி.

30 ஆண்டுகால உள்நாட்டுப் போரிலிருந்து மீண்டு மூச்சுவிட ஆரம்பித்திருக்கும் இலங்கை தமிழர்களை இந்துத்துவ அமைப்புகள் மீண்டும் மற்றொரு அசாதாரண சூழலுக்கு தள்ளுகின்றனவோ என்கிற அச்சம் தற்போது ஏற்பட்டுள்ளது.

 

’அது பிரபாகரனே அல்ல’

prabha

தமிழீழ விடுதலைப்புலிகளின் தலைவர் பிரபாகரனின் மரணத்தில் உள்ள சர்ச்சை தொடர்ந்துகொண்டே இருக்கிறது. இம்முறை இந்தச் சர்ச்சையை கிளப்பியிருக்கிறார் ஓய்வுபெற்ற இந்திய கடற்படை கமாண்டோவாகப் பணியாற்றிய கார்கில் எம்.சுப்ரமணியம். இவர் கிளப்பியிருக்கும் சர்ச்சை, கொல்லப்பட்டதாக தொலைக்காட்சியில் காட்டப்பட்ட விடுதலைப்புலிகளின் தலைவர் பிரபாகரனின் உடல் அவருடையதே அல்ல என்பதே. இலங்கை இணைய பத்திரிகையான லங்கா டுடேவுக்கு அளித்த பேட்டியில் அவர் இப்படிச் சொல்லியிருக்கிறார். இதுகுறித்து மேலதிக விவரங்களை அறிந்துகொள்ள இப்போது.காம், கார்கில் எம்.சுப்ரமணியம் உடன் பேசியது.

“முன்னாள் பிரதமர் ராஜீவ் காந்தி கொலை வழக்கில் குற்றம்சாட்டப்பட்ட பட்டியலில் உள்ள பிரபாகரன் பற்றிய தகவல்களை புதுப்பிக்கும் அடிப்படையில் இந்தியா, இலங்கையிடம் இறப்பு சான்றிதழ் கேட்டது. இலங்கை வழங்கியது இறப்பு சான்றிதழே பல ஓட்டைகளுடன் இருக்கிறது” என்கிறார் சுப்ரமணியம். இறப்பு சான்றிதழில் உள்ள ஓட்டைகள் குறித்து அவர் விவரித்தார்…

இந்தியா அரசோ அல்லது இலங்கை அரசோ இதுவரையிலும் பிரபாகரனின் சரியான இறப்பு சான்றிதழ் மற்றும் மரபணு பரிசோதனை சான்றிதழ்களை வழங்கவில்லை. இறப்பு சான்றிதழ் என்று வழங்கப்பட்டது இலங்கை நீதிமன்றம் வழங்கிய பிரபாகரின் இறப்பு குறித்த அறிக்கை மட்டுமே. பிரபாகரன் இறந்திருக்காலம் என யூகிக்கப்படும் சான்றிதழ். இந்திய அரசு வெளியிட்ட அறிக்கையில் விடுதலைப் புலிகளின் தலைவர் வேலுப்பிள்ளை பிரபாகரன் 2009-ஆம் ஆண்டு மே 17 அன்று நந்திக்கடல் முள்ளிவாய்க்காலில் ஈழப் போர் கடைசி நாளில் கொல்லப்பட்டுள்ளார் என்று கருதப்படுகின்றது என்று கூறுகிறது. அவர் உயிருடன் இருப்பதற்கான ஆதாரங்கள் இல்லை என்பதனால் அவர் இறந்திருக்க கூடும் எனவும் இந்திய அரசு தெரிவித்தது.

அதோடு மரபணு பரிசோதனைகளை செய்ய ஏழு நாட்கள் குறைந்தபட்சம் ஆகும். ஆனால் இலங்கை அரசோ மே 19-ந் தேதியே பிரபாகரன் இறந்துவிட்டார் என்று அறிவித்தது இலங்கை அரசு. இலங்கையில் மரபணு பரிசோதனை செய்வதற்கான வசதிகள் இல்லாத சூழ்நிலையில் இரண்டே நாளில் எப்படி மரபணு சோதனை செய்திருக்க முடியும்?

பிரபாகரனின் உடலில் இருந்து இராணுவத்தினர் மாதிரிகள் எடுத்ததை பொது மக்கள் பார்த்தார்கள், பின்னர் அது பிரபாகரன்தான் என உறுதி செய்தார்கள், இந்தியா அந்த மரபணுக்களை மாதிரிகளை பரிசோதனை செய்வதற்கு இலங்கையிடம் கேட்ட போது இலங்கை அதை செய்யவில்லை.

இந்தியா மரபணு பரிசோதனைகளை செய்யவில்லை என்றால் யார் அதனை செய்திருப்பார்கள், எந்தப் பரிசோதனை கூடத்தில் செய்யப்பட்டிருக்கும்? ஏன் கைரேகை மற்றும் மரபணு பரிசோதனை முடிவுகளை இன்னும் வெளியிடவில்லை?” இறந்தவராக இலங்கை அரசு காட்டியது பிரபாகரன் அல்ல என்பதை அடுக்கடுக்கான தனது சந்தேகத்தைக் கேட்கிறார் சுப்ரமணியம். மேலும் அவர்,

“பிரபாகரனின் மரணத்திற்கான காரணம் யாருக்கும் தெரியவில்லை, அத்துடன் மரணித்ததற்கான சான்றிதழ்களும் இல்லை.
இந்த உண்மைகள் அது பிரபாகரனின் உடலாக இல்லாமல் இருக்கலாம் என்ற சந்தேகத்தையும் ஏற்படுத்துகின்றன. அவர் தாக்குதல்களினால் கொல்லப்படுவதற்கான எந்த தடயமும் அவரது உடம்பில் இல்லை. மக்களை சமாதானப்படுத்த பிரபாகரன் தோற்றமுள்ள மற்றொரு மனிதனின் உடல் காட்டியிருக்கலாம்” என்கிறார் சுப்ரமணியம். சுப்ரமணியம் ஆறு ஆண்டுகாலம் இலங்கையில் பணியாற்றியிருக்கிறார். இந்தத் தொடர்பில் தனக்கு கிடைத்த தகவல்களை வைத்து இந்த சந்தேகங்களை எழுப்புவதாகச் சொல்கிறார்.

அவரிடம் பிரபாகரன் உயிரோடு இருக்கிறாரா இல்லையா என்று கேட்டோம், அதற்கு அவர் ‘நேதாஜி மரணத்தைப் போலத்தான், பிரபாகரனின் மரணமும் மர்மத்துக்குரியது. அந்த மர்மத்தின் முடிச்சு எப்போது அவிழும் என்று சொல்லமுடியாது’ என்று தெரிவித்தார்.

ரணில் விக்ரமசிங்கவை முழுமையாக நிராகரிக்க முடியுமா?

இலங்கை பிரதமராகப் பதவியேற்றிருக்கும் ரணில் விக்ரசிங்க குறித்தும் இலங்கை நாடாளுமன்றத் தேர்தல் குறித்தும் தமிழக அரசியல் தலைவர்கள் இருவேறு கருத்துக்களை தெரிவிக்கின்றனர். இதுகுறித்து இப்போது.காமில் என்னுடைய கட்டுரை… படித்து உங்கள் கருத்தைச் சொல்லுங்கள்.