’கமல் தன்னை பகுத்தறிவாளர் என்று சொல்லிக்கொள்வதெல்லாம் அபத்தம்’

kamal vish

நாட்டில் நடக்கும் சகிப்புத்தன்மையற்ற சூழலுக்கு எதிர்ப்புத் தெரிவித்து எழுத்தாளர்கள், சினிமா கலைஞர்கள், அறிவியலாளர்கள் தங்களுடை விருதுகளை திருப்பி அளித்துக்கொண்டிருக்கின்றனர். இதுகுறித்து நடிகர் கமல் ஹாசனிடம் கருத்துக் கேட்கப்பட்டது. அதற்கு பதிலளித்த அவர்,

“நான் எனக்கு அளித்த தேசிய விருதுகளைத் திருப்பித் தரமாட்டேன். சகிப்புத்தன்மை என்பது கொடுத்து வாங்குவதாகும். ஐந்து வருடங்களுக்கு ஒருமுறை சகிப்புத்தன்மையற்ற சூழல் குறித்து நாம் விவாதம் செய்யவேண்டும். சகிப்புத்தன்மையற்ற போக்கு என்னிடம் கிடையாது. கடவுள் பக்தி இல்லாவிட்டாலும் எல்லா மதங்களிடமும் சகிப்புத்தன்மையுடன் நடந்துகொள்வேன்.

விருதுகளைத் திருப்பித் தருவதால் ஒன்றும் நடக்காது. நமக்கு விருதை அன்புடன் அளித்த அரசு அல்லது மக்களை அவமானப்படுத்துவதாகத்தான் இருக்கும். இதனால் உங்களுக்குக் கவனம் கிடைக்கும். ஆனால், கவனம் ஈர்க்க பல வழிகள் உள்ளன. விருதைத் திருப்பி அளித்தவர்கள் மிகவும் திறமைசாலிகள். விருதைத் திருப்பி அளிப்பதை விடவும் தங்கள் கருத்தைக் கட்டுரையாகப் பதிவு செய்தால் இன்னும் அதிக கவனம் கிடைக்கும். அவர்கள் விருதுகளைத் தங்களிடம் வைத்துக்கொண்டு நம்மைப் பெருமைப்படுத்தவேண்டும். அதேசமயம் தொடர்ந்து போராடவேண்டும்” என்று கூறியிருந்தார். வழக்கமான கமல் பாணி மழுப்பல் பதிலாக இருக்கிறது என விமர்சனங்கள் வந்தன.

“கமல், ரஜினி முதலானோர் எந்த அரசுடனும் தமக்கு விரோதம் ஏற்படாமல் பார்த்துக் கொள்வதில் சமர்த்தர்கள். எனவே விருதை திருப்பித்தர அவசியமில்லை என்று கமல் கூறியதில் எனக்கு எந்த வியப்புமில்லை” என்கிற பத்திரிகையாளர் ஞாநி,

“திரைப்படம் முறையாகக் கற்பிக்கப்படவேண்டும் என்று பல தருணங்களில் பேசிவரும் கமல், திரைப்படக் கல்விக்கென்று இந்தியாவில் இருக்கும் முதன்மையான கல்வி அமைப்பான புனே திரைப்படக் கல்லூரி மாணவர்கள் 150 நாள் நடத்திய போராட்டம் பற்றி மோடி ஸ்டைலில் மௌனமாகவே இருந்தார் என்பதை மறக்கவேண்டாம்” என்றும் கமலின் கருத்து பற்றி பதிவு செய்திருக்கிறார்.

விஸ்வரூபம் திரைப்படம் வெளிவரும் தருவாயில் முஸ்லிம்களை மோசமாக சித்தரிப்பதாகக் கூறி முஸ்லிம் அமைப்புகள் போராட்டம் நடத்தின. அப்போது கருத்து சுதந்திரம் ஒடுக்கப்படுவதாகக் கூறிய கமல்ஹாசன், இந்த நிலை நீடித்தால் தான் நாட்டை விட்டு வெளியேறுவேன் என்று தெரிவித்திருந்தார். இந்நிலையில் இந்துத்துவ அமைப்புகளின் அச்சுறுத்தலால் கருத்து சுதந்திரம் ஒடுக்கப்படுவதாக நாடு முழுவதும் கண்டனம் எழுந்துள்ள நிலையில் அதுபற்றி கமல்ஹாசன் பேசவில்லை.

“விஸ்வரூபம் திரைப்படத்தினால் முஸ்லிம்கள் தங்களுக்கு ஆபத்து வரும் என்று நினைத்து எதிர்த்தபோது, கமல்ஹாசன் அதுகுறித்து கவலைப்படாமல், ஆத்திரப்பட்டார். வெளிநாட்டுக்குப் போய்விடுவேன் என்று வீரம் பேசினார். ஆனால், இன்று இந்திய அளவில் 70க்கும் மேற்பட்ட எழுத்தாளர்கள் திரைத்துறையினர், கலைஞர்கள் எல்லோரும் இந்தியாவில் ஏற்பட்டுள்ள சகிப்பின்மை சூழலுக்கு எதிராக தங்கள் விருதுகளை திரும்பத் தந்துக்கொண்டிருக்கிறார்கள். இது உலக அளவில் கவனம் பெற்ற புரட்சியாக நடந்துகொண்டிருக்கிறது. இப்படிப்பட்ட சூழலில் கமல்ஹாசன் விருதை தரமாட்டேன் என்று சொல்வதுகூட பிரச்சினை இல்லை. அதை நியாயப்படுத்துவதும் அதையே கொள்கை போல அறிவிப்பதும் மிகவும் வேதனை தரக்கூடிய செயல்” என்கிறார் மனித உரிமை செயல்பாட்டாளரும் எழுத்தாளருமான அ.மார்க்ஸ்.

மேலும் அவர், “மார்லன் பிராண்டோ போன்ற உலகத்தின் தலைச் சிறந்த கலைஞர்கள் திரைத் துறையில் நடக்கும் அநீதிகளைச் சுட்டிக்காட்டி, திரைத்துறையின் பெரிதும் மதிக்கப்படும் ஆஸ்கார் விருதை வேண்டாம் என மறுத்தார்கள். ரவீந்திரநாத் தாகூர் பிரிட்டீஷார் தனக்கு வழங்கிய சர் பட்டத்தை ஜாலியன் வாலாபாக் படுகொலையை கண்டித்துத் துறந்தார்.

ஆனால் சக எழுத்தாளர்கள், கலைஞர்கள் கொல்லப்படுகிறார்கள். இந்தியாவின் புகழ்பெற்ற புனே திரைப்படக் கல்லூரி மாணவர்கள் கிட்டத்தட்ட 5 மாத காலம் போராட்டம் நடத்தி, இன்னும்கூட உள்ளிருப்பு நிலையில் போராட்டத்தைத் தொடர்கிற சூழலில் எள்ளளவும் இரக்கம் இல்லாமால் கமல்ஹாசன் பேசி இருப்பது வழக்கமான அவருடைய மேட்டிமைத் தனத்தைத்தான் காட்டுகிறது. அவர் தன்னை பெரியாரியவாதியாகவும் பகுத்தறிவு கருத்தாளர் போலவும் அவ்வப்போது சொல்லிக்கொள்வது எத்தனை அபத்தம் என்று இதன் மூலம் வெளிப்படுகிறது” என்று தனது கருத்தை இப்போது.காமிடம் தெரிவித்தார் அ.மார்க்ஸ்.

நடிகர் கமல்ஹாசன் 1992-ஆம் ஆண்டு தயாரித்த தேவர் மகன் சிறந்த படத்துக்கான தேசிய விருதைப் பெற்றது. பத்ம ஸ்ரீ, பத்ம பூஷன் போன்ற இந்தியாவின் உயரிய கௌரவ பட்டங்களைப் பெற்றவர்.

Advertisements

சாய் பல்லவி முகத்தில் முகப்பரு இருந்தால் உங்களுக்கென்ன?

12065891_1104001052978542_7584848522139956459_n

தன் மனைவி, மகள், அம்மா, சகோதரி,காதலி என பெண் எந்த உறவில் இருந்தாலும் அவள் ஆணுக்குக் கட்டுப்பட்டவளாக, ஆணின் விருப்பப்படி நடப்பவளாக இருக்க வேண்டும். தனக்கு நெருக்கமான பெண்கள் மட்டுமல்ல, தன் கண்ணெதிரே நிற்கும் அத்தனை பெண்களும் விருப்பத்திற்கு ஏற்ப நடந்துகொள்ள வேண்டும் என்பதை சமூக மனநிலையாகவே கொண்டிருக்கிறார்கள் ஆண்கள்.

கடந்த மாதம் வார இதழ் ஒன்று பெண்கள் லெகிங்ஸ் அணிவது பற்றி கீழ்த்தரமாக எழுதியிருந்தது. எப்படி உடுத்த வேண்டும், எப்படி நடக்க வேண்டும் என்கிற கட்டளை-கண்காணிப்பு சமூகத்தில் தன்னுடைய அதிகாரம் மிக்க இடம் விட்டுப் போய்விடக்கூடாது என்று திரும்பத் திரும்ப வலியுறுத்துவதற்காகவே செய்யப்படுகிறது.

ஊடகங்கள் மட்டுமல்ல, தனிநபர்களும் சமூக வலைத்தளங்கள் பெருகிவிட்ட இந்தக் காலக்கட்டத்தில் பெண்ணுக்குரிய கட்டுப்பாடுகளை விதித்துக் கொண்டே போகிறார்கள். ஒரு நடிகையின் முகத்தில் முகப்பரு இருப்பது பலருக்கு வெறுப்பூட்டுகிறது. சொரியாஸிஸ் வந்ததுபோல என்று எழுதுகிறார் ஒருவர். இதைப் போயா ரசித்தோம் என்று சொல்லி தன்னுடைய கீழ்த்தரமான புத்தியை வெளிக்காட்டுகிறார் இன்னொருவர்.

pimples

முகப்பரு என்பது குறிப்பிட்ட பருவத்தில் இயற்கையாக எல்லோருக்கும் வரக்கூடியது. சிலருக்கு ஹார்மோன் சுரப்பு அதிகமாக இருந்தால் முகப்பரு அதிகமாக வரத்தான் செய்யும். காலப்போக்கில் இது தானாக சரியாகிவிடும். இந்த அறிவியல் ரீதியான உண்மையை மறைத்து பன்னாட்டு, உள்நாட்டு நிறுவனங்கள் விதவிதமான க்ரீம்களை பெண்களின் தலையில் கட்டுகின்றன. பெண்கள் இவற்றை விரும்பித்தான் வாங்கிப் போடுகிறார்களா என்றால் அதற்கும் முக்கிய காரணகர்த்தாக்களாக இருப்பது ஆணாதிக்க சிந்தனையுள்ள சமூகம்தான்.

கருப்பாக இருப்பவர்களை ஒதுக்குவது, முகப்பரு இருப்பவர்களை கேலி செய்வது, முக்கியமாக திருமணச் சந்தையில் இதையெல்லாம் சொல்லி பெண்ணை நிராகரிப்பது இந்த ஆண் சமூகமே. அதனால்தான் இந்திய ஃபேர்னஸ் க்ரீம் சந்தை பல ஆயிரம் கோடிகளுக்கு விரிந்திருக்கிறது.

ஒரு நடிகை மெழுகு சிலைபோல இருக்கவேண்டும் என்று யார் நிர்ணயித்தது? தொன்றுதொட்டு வரும் இந்திய கலைகளின் நீட்சியாக இந்திய சினிமாவும் பால் உணர்வுகளைத் தூண்டுவதாகவே உள்ளது. அதிலும் குறிப்பாக ஆண்களின் பால் உணர்வுகளுக்கு வடிகாலாகத்தான் சினிமாக்கள் எடுக்கப்படுகின்றன. நடிகைகள் ஆண்களின் விருப்பத்திற்கேற்ப சினிமாக்களில் வடிவமைக்கப்படுகிறார்கள். ஒருசில இயக்குநர்கள் மட்டுமே அதிலிருந்து விலகி கண்ணியமான முயற்சிகளைச் செய்கிறார்கள்.

சாய் பல்லவி
சாய் பல்லவி

அல்போன்ஸ் புத்திரன் இயக்கிய‘ப்ரேமம்’ படத்தின் நாயகிகளில் ஒருவராக மலர் கதாபாத்திரத்தில் வரும் சாய் பல்லவி தமிழ்ப் பெண். சுருள் முடியும் கன்னங்களில் இருக்கும் முகப்பரு தழும்புகளும் அவர் ஏற்று நடித்த மலர் கதாபாத்திரத்துக்கு மிகக் கச்சிதமாகப் பொருந்தியிருந்தது. சினிமா ரசிகர்களும் அவரைக் கொண்டாடினார்கள்.

நடிப்புக்காக நடிகையை ரசிக்காமல் அவளைப் பாலியல் உணர்வுகளோடு பொருத்திப் பார்ப்பது நாகரிக சமூகத்துக்கு நல்லதல்ல. “நான் பள்ளி நாட்களில் வெளியே வரவே பயப்படுவேன். காரணம் என் முகத்தில் உள்ள முகப்பருக்களைப் பார்த்து பையன்கள் கேலி செய்வார்கள் என்பதே” என்று தன் வாழ்க்கையில் நடந்த சம்பவத்தைச் சொல்கிறார் சாய் பல்லவி.

இன்னும் எத்தனை காலத்துக்குத்தான் பெண்களை கேலிக்குரியவளாக, இச்சைக்குரியவளாகவே ஆண் சமூகம் பார்க்கும் என்ற வெறுமையான கேள்வி நமக்கு மிஞ்சுகிறது.

 

 

வித்யா பாலனுக்கு என்னாச்சு?

vidhya balan

சினிமா நடிகர்களை சமூகத்தின் தலைவர்களாக ஏற்றி வைத்திருக்கும் சமூகம் இது. ஆனால், நடிகர் எல்லோரும் தலைவர்களாவதில்லை. குறைந்தபட்சம் சமூக உணர்வு உள்ளவர்களாகக்கூட நடந்துகொள்வதில்லை. புனே திரைப்படக் கல்லூரி மாணவர்களின் போராட்டத்துக்கு ஆதரவு தெரிவித்தும் நாட்டில் அதிகரித்துவரும் மதவன்முறைகளைக் கண்டித்தும் புதன்கிழமை ஒரே நாளில் எட்டு இயக்குநர்கள் தங்களுடைய தேசிய விருதை திரும்பத் தருவதாக அறிவித்தனர்.

இதுகுறித்து தேசிய விருதுபெற்ற நடிகை வித்யா பாலனிடம் கேட்கப்பட்டது. அதற்கு அவர், “இது இந்த நாடு கொடுத்தது, அரசாங்கம் கொடுத்ததல்ல” என்று பதில் கூறியிருக்கிறார். கூடவே, அவர் இந்நாட்டு சாமானிய மக்கள் உணவுக்காகவும் கருத்துச் சுதந்திரத்துக்காகவும் உயிர்விட்டதற்கு கண்டனமோ, எதிர்ப்போ தெரிவித்திருக்கலாம். ஆனால் அவர் ஒற்றை வாக்கியத்தோடு முடித்துக்கொண்டார்.

நாட்டு மக்களைவிட விருதுக்கு முக்கியத்துவம் தரக்கூடியவர்கள், தங்கள் விருதுகளுக்கு முட்டுக் கொடுக்க அந்த நாட்டு மக்களை நிறுத்துவது வாடிக்கையாக உள்ளது. அதைத்தான் வித்யா பாலனும் செய்திருக்கிறார். மண் தோன்றா காலத்தே முன் தோன்றிய மூத்தகுடி தமிழ் எழுத்தாளர்களைப் போல வித்யா பாலனும் யோசிப்பது வியப்புக்குரியதல்ல. வித்யாவும் தமிழ்ப் பெண் தானே?!

வித்யாசமான கதாபாத்திரங்களில் நடிப்பதில் புகழ்பெற்ற வித்யா பாலன், தமிழ் சினிமாவின் சில்க் ஸ்மிதாவின் வாழ்க்கையைத் தழுவி எடுக்கப்பட்ட ‘டர்ட்டி பிக்சர்’ படத்துக்காக தேசிய விருது பெற்றார்.

 

 

பெண்களே இல்லாத நடிகர் சங்க தலைமை!

பத்தாண்டுகளுக்குப் பின் நடந்த தென்னிந்திய நடிகர் சங்க தேர்தல் முடிவுகள் வெளியாகியிருக்கும் நிலையில், தேர்ந்தெடுக்கப்பட்டிருக்கும் நிர்வாகிகள் பட்டியல், முக்கியமான விஷயம் நம்முன் எழுகிறது. பெண் சமத்துவமின்மையும் பெண்களுக்கு எதிரான பாலியல் சுரண்டல் அதிகம் நடக்கும் துறைகளில் சினிமாத் துறையும் ஒன்று. அப்படியிருக்க பெண்ணின் குரலை பதிவு செய்யும் வகையில் ஒரு பெண்கூட தலைவர், பொதுச்செயலாளர், துணைத் தலைவர், பொருளாளர் போன்ற முக்கியமான பதவிகளுக்குத் தேர்ந்தெடுக்கப்படவில்லை. இந்தப் பதவிகளுக்கு இந்த இரண்டு அணியின் சார்பிலும் எந்த பெண்களும் போட்டியிடவில்லை என்பது குறிப்பிடத்தகுந்தது.

புதிதாத தேர்ந்தெடுக்கப்பட்ட நிர்வாகிகள் விவரம்:

நாசர் – தலைவர்

விஷால் – பொதுச்செயலாளர்

பொருளாளர் – கார்த்தி

துணைத் தலைவர்கள் – பொன்வண்ணன், கருணாஸ்

செயற்குழு உறுப்பினர்கள்

அயூப்கான்
கோவை சரளா
சங்கீதா
பால தண்டபாணி
பூச்சிமுருகன்
ராஜேஷ்
சோனியா
ஜுனியர் பாலையா
நந்தா
ரமணா
தளபதி தினேஷ்
குட்டி பத்மினி
பசுபதி
உதயா
பிரேம்குமார்
ஸ்ரீமன்
விக்னேஷ்
பிரகாஷ்
சிவகாமி
ராம்கி
நிரோஷா
நளினி
டி.பி.கஜேந்திரன்

24 பேர் கொண்ட செயற்குழு உறுப்பினர்களில் ஏழு பேர் மட்டுமே பெண்கள். மூன்றில் ஒரு பங்கு. நடிகர்களின் பிரச்சினைகளுக்கு தீர்வு காணும் ஒரு அமைப்பில் அதிகமாக பிரச்சினைகளுக்கு உள்ளாக்கப்படும் நடிகைகளின் குரல்களை ஒலிக்கும் பெண் பிரதிநிதிகளின் பங்கு ஏன் குறைவாக இருக்கிறது? நடிகை குஷ்பூவிடம் இப்போது.காம் இதுகுறித்து கேட்டது…

“முன் எப்போதும் இல்லாத வகையில் ஏராளமான நடிகைகள் இந்தத் தேர்தலில் வாக்களிக்க வந்திருந்தார்கள். இதுவே மாற்றத்துக்குரிய விஷயம்தான். சங்கீதா, கோவை சரளா மாதிரியான ஆட்களெல்லாம் தேர்ந்தெடுக்கப்பட்டிருக்கிறார்கள். இவர்கள் நிச்சயம் நடிகைகளின் பிரச்சினைகளைப் பேசுவார்கள். தலைமை பொறுப்புக்கு வந்திருக்கக்கூடியவர்களும் பெண்களின் பிரச்சினைகளைப் புரிந்துகொண்டு, செயலாற்றக்கூடியவர்களே. நான் ஒரு அரசியல் கட்சியில் இருப்பதால் நடிகர் சங்க தலைமை பதவிகளுக்குப் போட்டியிடவில்லை. அரசியல் கட்சி சாராமல் இருந்திருந்தால் நிச்சயம் நான் தலைமை பதவிக்குப் போட்டியிட்டிருப்பேன்” என்கிறார்.

குஷ்பூ சொல்வதுபோல நடிகைகள் பலர் வாக்களிக்க வந்திருந்தாலும் முன்னணி நடிகைகள் எவரும் வாக்களிக்க வரவில்லை. நயன்தாரா, த்ரிஷா, சமந்தா, ஸ்ருதி ஹாசன், காஜல் அகர்வால், ஹன்ஷிகா, தமன்னா, அனுஷ்கா, எமி ஜாக்சன் ஆகியோர் தங்கள் வாக்குகளை பதிவு செய்யவில்லை. ஆண் நடிகர்களுக்கு சமமான சம்பளம் வேண்டும் என்கிற கோரிக்கைகளை அவ்வவ்போது சமூக வலைத்தளங்களிலும் ஊடகங்களின் வாயிலாகவும் எழுப்பிவரும் இவர்கள் தங்கள் பிரச்சினைகளை தீர்த்துக்கொள்ள நடிகர் சங்கம் என்கிற அமைப்பை பயன்படுத்திக் கொள்ளத் தயாராக இல்லை என்பதையே இது காட்டுகிறது. ஆனால் நடிகையும் இயக்குநருமான லஷ்மி ராமகிருஷ்ணன் மாறுபட்ட கருத்தை முன்வைக்கிறார்..

“நிச்சயம் சம்பள வித்தியாசத்தை நடிகர் சங்கத்தால் தீர்த்து வைக்க முடியாது. அதுதானாக எல்லா மட்டத்திலும் நடக்க வேண்டும். மெல்ல அந்த மாற்றம் வந்துக்கொண்டிருப்பதாகவே நினைக்கிறேன். பாலிவுட்டில் வித்யா பாலனை பெண் சல்மான் கான் என்று அழைக்கிறார்கள். கேரளத்தில் மஞ்சு வாரியருக்கென்று தனிப்பட்ட மார்க்கெட் இருக்கிறது. தமிழில் ‘36 வயதினிலே’ படம் நல்ல வரவேற்பைப் பெற்றிருக்கிறது. நயன்தாரா நடித்த ‘மாயா’ படமும் நல்ல வரவேற்பைப் பெற்றிருக்கிறது. தென்னிந்திய சினிமாவில் அனுஷ்காவுக்கு தவிர்க்க முடியாத இடம் ஏற்பட்டிருக்கிறது. இப்போது பெண்கள் சார்ந்த கதை இருந்தால் சொல்லுங்கள் என்று தயாரிப்பாளர்களே கேட்கும் அளவுக்கு நிலைமை மாறியிருக்கிறது. இதையும் பெண்களுக்கு சம வாய்ப்பை, சம பங்கை அளிக்கும் விஷயமாகக் கருதலாம்” என்றவரிடம் நடிகர் சங்கப் பதவிகளில் பெண்களின் பங்களிப்பு வேண்டாம் என்கிறீர்களா? என்றோம்.

“நாசர் போன்ற நல்ல மனிதர்கள் தலைமை பொறுப்புகளில் இருக்கும்போது, பெண்களின் குரல்களுக்கு மதிப்பிருக்கும் என்று நம்புகிறோம். இனி வரும்காலங்களில் நடிகர் சங்கத்தில் பெண்களின் பங்களிப்பு அதிகமாக இருக்க வேண்டும் என்றும் விரும்புகிறேன். அது நடக்கும் என்றும் நம்புகிறேன்” என்கிறார் லட்சுமி.

சொந்த வாழ்க்கையின் துயரை சாதனையாக மாற்றிய மனோரமா!

manoram

சினிமாவில் மிகச் சிறந்த வெற்றியாளராக இருந்த மனோரமாவுக்கு சொந்த வாழ்க்கை கசப்பானது, துயரமானது, இறுதிவரை அவரை துன்பத்துக்குள் தள்ளிக் கொண்டிருந்தது அது!

மனோரமாவுக்கு முதல் துயரை ஏற்படுத்தியது தந்தை என்ற ஆண். கைக்குழந்தையாக தன்னையும் தன் தாயையும் புறக்கணித்த அந்த ஆண் தந்த துயர், அவருடைய குழந்தைப் பருவத்தை மட்டுமல்ல, வாழ்க்கை முழுவதுமே துன்பத்தில் ஆழ்த்தியது.

அம்மாவின் உடல்நிலை காரணமாக சிறுவயதிலேயே வீட்டிற்காக உழைக்க வேண்டிய கட்டாயத்துக்கு அவரைத் தள்ளியது. பள்ளிப்படிப்பு பாதியிலே நின்றது. மேடை நாடகங்களில் தொடங்கியபோது, அங்கே தன் வாழ்க்கைப் பயணத்தில் துயர் சேர்க்க மற்றொரு ஆணைச் சந்தித்தார். அவர் மனோரமாவின் காதல் கணவர், ராமநாதன். இவர்களுக்குப் பிறந்த மகன் பூபதி.

சினிமா கலைஞர்கள், குறிப்பாக நடிகைகளின் தனிப்பட்ட வாழ்க்கை அவ்வளவு வெற்றிகரமாக அமைவதில்லை. மனோரமாவின் வாழ்க்கையும் அப்படிப்பட்டதாகவே அமைந்தது. ஆனால், மற்றவர்களைப் போல மனோரமாவின் துயரம் சட்டென்று முடிந்துபோகக்கூடியதாக இல்லை. தனக்கும் தன் காதல் கணவருக்கும் இடையே ஏற்பட்ட பூசல்கள், முரண்பாடுகள் எல்லாம் தீர்ந்துபோய்விடும் என திரும்பத் திரும்ப நம்பினார். அதற்காக தன்னுடைய உழைப்பு, அதனால் கிடைத்த பணத்தை எல்லாம் இழந்தார்.

மகனாக வந்த ஆணும் மனோரமாவுக்கு ஒரு துயரமாகவே அமைந்தார். தன் மகனை கதநாயகனாக வைத்து படங்களைத் தயாரித்து ஓய்வில்லாமல் உழைத்த பணத்தை இழந்தார். அதனால் மிகுந்த மனவுளைச்சலுக்கும் ஆளானார்.

மனோரமா வெளிப்படையாக பேசக்கூடியவராக இருந்தார். தன்னுடைய துயரங்கள் குறித்து பல ஊடக நேர்காணல்களில் சொல்லியிருக்கிறார். “ஆச்சி மனோரமாவை கடந்த மார்ச் மாதம் சந்தித்தேன். அப்போதே அவர் நிலை குலைந்திருந்தார். ஆனாலும் என்னிடம் விரிவாக மனம் திறந்து தன் திருமண வாழ்வு, நடிகர் சிவாஜியுடனான நட்பு, தனிமை, ஏமாற்றம் என பல கருத்துக்களைப் பகிர்ந்து கொண்டார். பள்ளத்தூரில் பிறந்து ஒரு பெண்ணாக ஓடி… ஓடி உச்சம் தொட்டவர் மனோரமா! அவருடையது பெரிய சாதனைதான். எஸ். எஸ். ஆர் அண்ணன் என்றதுமே அவருடைய கண்களில் கண்ணீர் வந்தது. சிவாஜி அண்ணன் என்றதுமே அழுகிறார்…. அது முதுமையின், பலவீனத்தின் கண்ணீர் அல்ல. இந்தக் கண்ணீர் உணர்த்துவது ஒன்றே ஒன்றைத்தான் அது ஆண்களுக்கு எதிரான போராட்டம். சத்தமில்லாமல் தன் திரை வாழ்வில் அதைச் செய்தவர் மனோரமா. ஆண்களால் பல காலக்கட்டங்களில் வீழ்த்த முடியாமல் உயர்ந்து நின்றவர் ஆச்சி!” என்கிறார் பத்திரிகையாளர் அருள்எழிலன்.

அருள்எழிலன் சொல்வதுபோல தன்னுடைய சொந்த வாழ்க்கைத் துயரங்களில் இருந்து விடுபட ஓயாது உழைத்தவர் மனோரமா. சொல்லப்போனால் அந்தத் துயரங்களேகூட அவரை சாதனையாளராக மாற்றியிருக்கலாம்.

இதுபற்றி பத்திரிகையாளர் ஞாநி, “தன் தனி வாழ்வில் பங்கேற்றிருந்த ஆண்களால் துயரம் மட்டுமே பெரிதும் அடைந்த மனோரமா, அவற்றால் துவண்டுவிடாமல் தன் திறமையையும் கலையையும் மட்டும் நம்பி சிறப்பாக வாழ்ந்த துணிகரமான பெண். நகைச்சுவை, குணச்சித்திரம் இரண்டிலும் அவரைப் போல நீண்ட இன்னிங்க்ஸ் ஆடிய பெண் கலைஞர்கள் வேறெவரும் இல்லை” என்கிறார்.

அவர் சாதனை எப்படிப்பட்டது என தீக்கதிர் பொறுப்பாசிரியர் குமரேசன் சொல்கிறார்…

“எல்லாத் துறைகளையும் போலவே திரைப்படத்துறையிலும் ஆணாதிக்கம்தான். நடிப்புக் களத்தைப் பொறுத்தவரையில் ஆண்கள் மட்டுமே பல ஆண்டுகள் நடித்துக்கொண்டிருக்க, பெண்கள் வெகு விரைவில் மறக்கடிக்கப்பட்டுவிடுவார்கள். அதிலும் நகைச்சுவை நடிப்பில் எத்தனையோ பெண்கள் கொண்டுவரப்பட்டார்கள், சில படங்களுக்குப் பிறகு வெளியேற்றப்பட்டார்கள். ஆச்சி ஒரு விதிவிலக்கு. நாடகமேடையில் தொடங்கிய அவரது நடிப்பு, உடல் நலியும் வரையில் தொடர்ந்தது. தில்லானா மோகனாம்பாளில் வேறு யாரும் ஜில்ஜில் ரமாமணிக்கு உயிரூட்டியிருக்க முடியுமா?

பிற்காலத்தில் நல்ல குணச்சித்திர நடிகராகவும் புகழ்பெற்றார். பாடல் வானிலும் சிறகடித்தவர். சொந்த வாழ்க்கையில் பல சோதனைகளைக் கடந்து தனக்கென ஒரு இடத்தை நிலைநாட்டியவர். புதிய பெண் நடிகர்களுக்கு – குறிப்பாக நகைச்சுவை நடிகர்களுக்கு – ஒரு ஈர்ப்புவிசையாக என்றும் அவரது பெயர் நினைவுகூறப்படும்”