சமூக வலைத்தளங்களில் பிரச்சாரம்: களமிறங்கும் கட்சிகள்

socail media

தமிழக தேர்தல் களத்திலிருந்து காதைப் பிளக்கும் ஒலிப்பெருக்கிகள், வழியை மறிக்கும் ஆளுயற கட் அவுட்களுக்கு இனி ஓய்வெடுக்கும் காலம் வந்துவிட்டதுபோல. இப்போது சமூக வலைத்தளங்கள்தான் தேர்தலுக்காக பரபரத்துக்கொண்டிருக்கின்றன. 35 சதவித இளம் வாக்காளர்களை முன்வைத்து கட்சிகள் சமூக வலைத்தளங்களில் தங்களுடைய பிரச்சாரங்களை முன்னெடுப்பதற்கென்றே தனிப் பிரிவுகளை ஏற்படுத்தி செயல்பட்டுவருகின்றன.

தமிழக தேர்தல் களத்தில் அன்புமணியை முதலமைச்சர் வேட்பாளராக அறிவித்து வேலையை ஆரம்பித்த பாட்டாளி மக்கள் கட்சி, சமூக வலைத்தளத்திலும் தன்னுடைய பிரச்சாரத்தை ஆறு மாதத்துக்கு முன்பே முடுக்கிவிட்டது. இதற்கென்றே பாமகவில் தகவல் தொழிற்நுட்பம் படித்தவர்களைக் கொண்டு தமிழ் சமூக ஊடகத்துறை என்ற பெயரில் ஒரு பிரிவு செயல்படுகிறது.

“சமூக வலைத்தளங்களில் பாமகவின் முக்கிய உத்தி, அன்புமணியின் பெயரில் வெளியிடப்பட்ட ஆப் என்று சொல்லலாம். இந்த ஆப்பை பாமகவினர் அதிகம் பயன்படுத்துவார்கள். இந்த ஆப் மூலம் ‘விழித்திரு’ என்ற பெயரில் தினமும் அன்புமணி ஒரு ஊக்கப்படுத்தும் வாக்கியத்தை அனுப்புவார். சில சமயம் விடியோக்களும் ஆப் வழியாக அனுப்பப்படும். இந்த விஷயங்களை சமூக வலைத்தளங்களில் ஷேர் செய்வதற்கு ஆப்’பில் வசதிகள் செய்யப்பட்டுள்ளன. இந்த ஆப் வைத்திருப்பவர்கள் சமூக வலைத்தளங்களில் இவற்றைப் பகிர்ந்துகொள்வார்கள்” என்கிறார் பாமகவின் சமூக வலைத்தள நிர்வாகிகள் குழுவில் உள்ள ஜெயக்குமார்.

பாமக அறிவித்துள்ள வரைவு தேர்தல் அறிக்கையை சிறு சிறு பகுதிகளாக்கி அதை ட்விட்டர், ஃபேஸ்புக்கில் பகிர்வதை தற்சமயம் செய்துவருவதாகச் சொல்லும் இவர், தமிழக கட்சிகளில் பாமக சமூக வலைத்தளங்களைப் பயன்படுத்துவதில் முன்னோடியாகச் செயல்படுவதாகச் சொல்கிறார்.

“மீம்ஸ் வடிவமைத்த பிறகு மின்னஞ்சல் குழுக்கள், வாட்ஸ் அப் குழுக்கள் வழியாக கட்சியினருக்கு அனுப்புவோம். அவர்கள் அதை சமூக வலைத்தளங்களில் பகிரச் செய்வார்கள்” என்கிறார். இந்தக் குழுவில் பெண்களும் இருப்பதாகச் சொல்கிறார் ஜெயக்குமார்.

திராவிட முன்னேற்றக் கழகத்தின் பொருளாளர் மு.க.ஸ்டாலின் ‘நமக்கு நாமே’ பயணத்தை சமூக வலைத்தளங்களில் பரப்ப ஐந்து பேர் கொண்ட குழு செயல்படுகிறது. இணையதளத்தை நிர்வகிப்பது, ஸ்டாலினின் பயணங்கள் பற்றிய பதிவுகளை சமூக வலைத்தளங்களில் பகிர்ந்துகொள்வது இந்தக் குழுவின் முக்கியமான வேலை. மற்ற கட்சியினரை விமர்சிக்கும் மீம்ஸ் வடிவமைப்பது திமுகவினரும் திமுக அனுதாபிகளுமே என்கிறார் இந்தக் குழுவில் உள்ள ஒருவர்.

“ஸ்டாலினின் நமக்கு நாமே பயணத்தை கேலி செய்து நிறைய மீம்ஸ் வரும். அதற்கு கவுண்ட்டர் கொடுப்பதுபோல நமக்கு நாமே பயணத்தைப் பற்றிய பாஸிட்டிவ் மீம்ஸை வெளியிடுவார்கள். எதிர் தரப்பை கேலி செய்யும் மீம்ஸும் போடுவார்கள். பெரும்பாலும் திமுகவினரே இதைச் செய்கிறார்கள்” என்கிறார் திமுக சமூக வலைத்தளங்களை நிர்வகிக்கும் பிரிவைச் சேர்ந்த ஒருவர்.

எதிர்க்கட்சிகள் சமூக வலைத்தள பிரச்சாரங்களை முடுக்கிவிட்டிருக்கும் நிலையில் கடந்த விஜயதசமி அன்று தன்னுடைய பிரச்சாரத்தைத் தொடங்கியிருக்கிறது அதிமுக. அஸ்பையர் சாமிநாதன் தலைமையில் தகவல் தொழிற்நுட்பப் பிரிவு இந்தப் பணிக்கென்றே செயல்படுகிறது.

“இளைஞர் இன்று கண்விழிப்பதே ஃபேஸ் புக்கிலும் ட்விட்டரிலும்தான். அவர்கள் தெருமுனைக் கூட்டங்கள், பொதுக்கூட்டங்களுக்கு வருவார்கள் என்று எதிர்ப்பார்க்க முடியாது. அதனால்தான் அம்மாவின் நல்லத் திட்டங்கள் பற்றி எடுத்துச் சொல்ல விஜயதசமியில் ‘ஒளிரும் நிகழ்காலம் மிளிரும் வருங்காலம்’ என்று ஒரு பிரச்சாரத்தை முன்னெடுத்தோம். பத்து நாட்களுக்குப் பிறகு, ‘தழைக்கட்டும் தமிழர்கள் செழிக்கட்டும் தமிழகம்’ என்ற கோஷத்தை முன்னெடுத்தோம். அடுத்ததாக ஞாயிற்றுக்கிழமை
பெசண்ட் நகர் கடற்கரையில் புதிய பிரச்சாரப் பயணம் ஒன்றை தொடங்கவிருக்கிறோம்” என்கிற சாமிநாதன், விஜயதசமியில் வெளியிடப்பட்ட அதிமுகவின் சாதனைகளைச் சொல்லும் விடியோவை இரண்டு கோடி பார்வைகளுக்கும் மேல் சென்றிருப்பதாகச் சொல்கிறார்.

சமூக ஊடகங்களில் பிரச்சாரம் செய்வதற்காக தனிக் குழு என்று சொல்லும் இந்தக் கட்சிகளைத் தவிர, காங்கிரஸ், பாஜக, மக்கள் கூட்டணி போன்ற கட்சிகள் சமூக ஊடகப் பிரச்சாரம் குறித்து அறிவிக்கவில்லை. ஆனால், அந்தந்த கட்சி சார்ந்தவர்கள் அவ்வவ்போது நடக்கும் நிகழ்வுகளை சமூக வலைத்தளங்களில் பரப்பி வருகிறார்கள்.

 

பாடகர் கோவனின் கைதும் ஆதாயம் தேடும் அரசியல்வாதிகளும்

may-day-kovilpatti-kalai-2

ஓய்ந்திருந்த மதுவிலக்குப் போராட்டத்துக்கு உயிர்கொடுத்திருக்கிறது தமிழக அரசு. மக்கள் கலை இலக்கியக் கழகம் வெளியிட்டிருந்த பாடகர் கோவன் கைதுக்குக் காரணமாக இருந்த “மூடு டாஸ்மாக்கை மூடு, ஊத்திக் கொடுத்த உத்தமி போயசில் உல்லாசம்” என்ற இரண்டு பாடல்களும் கிட்டத்தட்ட இரண்டு மாதங்களுக்கு முன் யூட்யூப்பில் பதிவேற்றம் செய்யப்பட்டவை.

வெள்ளிக்கிழமை அதிகாலை 2.30 மணிக்கு திருச்சியில் இசைப் பாடகர் கோவன் வீட்டிற்குச் சென்ற சென்னை குற்றப் பிரிவு காவல்துறை அவருக்கு உடைக்கூட மாற்றிக்கொள்ள நேரம் தராமல் கைது செய்திருக்கிறது. அவர் மீது 124 ஏ தேசத்துரோக நடவடிக்கை, 153 ஏ சமூகத்தில் இரு பிரிவினருக்கிடையில் மோதல் ஏற்படுத்துதல் ஆகிய பிரிவுகளின் கீழ் வழக்கு பதிவு செய்திருப்பதாக காவல் துறை சொல்கிறது.

மக்கள் கலை இலக்கியக் கழகமும் அது சார்ந்த அமைப்புகளும் இந்தப் பாடல்களை தெருமுனைக் கூட்டங்களில் பாடி வந்திருக்கின்றன. அப்போதெல்லாம் எடுக்கப்படாத கைது நடவடிக்கை இப்போது ஏன் எடுக்கப்பட்டுள்ளது என்கிற கேள்வி எழுகிறது. அதோடு மக்கள் திரளில் பாடும் ஒரு பாடகரை தலைமறைவுக் குற்றவாளியைக் கைது செய்வதுபோல அதிகாலை கைதை அரங்கேற்றுவதன் அவசியம் ஏன் ஏற்பட்டது என்ற கேள்வியும் வருகிறது.

கட்டுரையை இங்கே படிக்கலாம்…

ராமஜெயம் கொலை வழக்கு என்ன ஆனது?

திருச்சி மாநகரின் ஒரு அதிகாலைப் பொழுதில் நடந்த அந்தக் கொலையின் மர்ம முடிச்சுகள் மூன்று ஆண்டுகள் கடந்த பின்னும் அவிழ்க்கப்படவேயில்லை. 2012-ஆம் ஆண்டு மார்ச் 29-ம் தேதி படுகொலை செய்யப்​பட்டார் முன்னாள் திமுக அமைச்சர் கே.என்.நேருவின் தம்பி, கே.என்.ராமஜெயம். ரியல் எஸ்டேட்,கல்குவாரி கான்ட்ராக்ட், கடத்தல், கட்டப்பஞ்சாயத்து உள்பட பல்வேறு‘தொழில்’களைச் செய்து வந்தவர் இவர். அதோடு ‘அழகிரி பாணி’ அரசியலில் ராமஜெயம் கைதேர்ந்தவர் என்றும் சொல்கிறார்கள்.சம்பவம் நடந்த அன்று காலை 5.30 மணிக்கு நடைப்பயிற்சி சென்றவர் 8.30 மணி ஆகியும் வீடு திரும்பவில்லை. சந்தேகமடைந்த குடும்பத்தினர் அவரைத் தேட ஆரம்பித்தனர். அடுத்த சில மணி நேரங்களில், கை-கால்கள் கட்டப்பட்ட நிலையில், ராமஜெயத்தின் உடல் ஸ்ரீரங்கம் பகுதியில் கிடப்பதைக் கண்டுபிடித்தது போலீஸ்.

திருச்சி மாவட்டத் தி.மு.க.வின் அசைக்க முடியாத சக்தியாக விளங்கியவர் கே.என்.ராமஜெயம். முன்னாள் அமைச்சர் கே.என்.நேருவின் முதுகெலும்பே ராமஜெயம்தான். திருச்சியில் திமுகவின் மூன்று மாநில மாநாடுகளை வெற்றிகரமாக நடத்தியது, கட்சிக்குச் சொந்தமாக அறிவாலயம் கட்டியது என்று பிரம்மாண்​டங்களை அரங்கேற்றுவதில் கைதேர்ந்தவர். அதேநேரம், தீவிர அரசியலில் நேரடியாக இறங்காமல், ‘தொழில்’கள் செய்வதில்தான் அதிகம் கவனம் செலுத்தி வந்தார். ஆந்திராவில் சுரங்கத் தொழில், இந்தோ​னேஷி​யாவில் நிலக்கரி குவாரி, புதுக்​கோட்டை எல்லையோரம் கிரானைட் குவாரி, ஜனனி குரூப் ஆஃப் கம்பெனிகள், உயர் கல்வி நிறுவனங்கள் என்று மிகப்பெரிய தொழில் அதிபராக வலம் வந்தவர். அதனால், ராமஜெயத்தை ‘எம்.டி’ என்று மரியாதையுடன் திருச்சிவாசிகள் அழைப்பார்களாம்.

1996-2001ஆம் வரையான திமுக ஆட்சியின்போதுதான், ராமஜெயம் முழுநேர அரசியல்வாதி ஆனார். அடுத்து வந்த 2006 -2011 திமுக ஆட்சியின்போது மளமளவென வளர்ந்தது இவருடைய அரசியல் வாழ்வு. இவரின் தீவிர அரசியல் பற்றி நேருவின் கவனத்துக்குப் போனபோது, ராமஜெயத்தை அழைத்துக் கண்டித்ததாகவும் இதற்கிடையில், ராமஜெயத்தின் ஆதரவாளர்கள் அவரை நாடாளுமன்றத் தேர்தலில் பெரம்பலூரில் போட்டியிடும்படி தூபம் போட்டதாகவும் சொல்லப்படுகிறது. இதற்கு நேரு சம்மதிக்கவில்லை. நடிகர் நெப்போலியனை நேரு முன்னிறுத்தினார். இதனால், அண்ணன் நேருவுடன் ராமஜெயத்துக்கு அரசியல்ரீதியான மோதல் வெடித்தது என்றும் சிலர் சொல்கிறார்கள்.

அதிமுக ஆட்சிக்கு வந்ததும் பல்வேறு வழக்குகள் இவர் மீது போடப்பட்டன. இதனால் ராமஜெயம் தலைமறைவு ஆனார். கொச்சி விமான நிலையத்தில் இருந்து வெளிநாடு தப்ப முயன்றபோது இமிகிரேஷன் அதிகாரிகள் பிடித்து திருச்சிக் காவல் துறை வசம் ஒப்படைத்தனர். சில நாட்கள் பாளையங்கோட்டை சிறையில் இருந்த பின்னர், அவர் மீது சுமத்தப்பட்ட அனைத்து வழக்குகளிலும் ஜாமீன் பெற்று வெளியில் வந்திருக்கிறார்.

2007-ல் திருச்சி மாவட்டம் வையம்பட்டி அருகே ரியல் எஸ்டேட் அதிபர் துரைராஜும் அவரது கார் டிரைவர் சக்திவேலும் காரில் வைத்து எரித்துக் கொல்லப்பட்டனர். அதேதினத்தில், துரைராஜின் சகோதரர் தங்கவேலுவும் மர்மமான முறையில் இறந்தார். இந்த இரண்டு வழக்கில், ராஜெயத்தின் தலையீடு உள்ளதாக காவல்துறை சந்தேகித்தது. இந்நிலையில்தான் ராமஜெயம் கொலை செய்யப்பட்டார். இந்த வழக்கு சிபிசிஐடி வசம் ஒப்படைக்கப்பட்டது.

முதல்வர் ஜெயலலிதாவைச் சந்தித்து மனு ஒன்றைக் கொடுத்து வழக்கை விரைந்து முடித்து நீதி வழங்க வேண்டும் என துரைராஜ் குடும்பத்தினர் கோரிக்கை வைத்ததாகவும் அதன்பிறகும், வழக்கில் முன்னேற்றம் இல்லை என்பதால் துரைராஜின் ஆதரவாளர்கள்தான் ராமஜெயம் கொலையை கூலிப்படையை ஏவி நடத்தி இருக்க வேண்டும் என்ற கோணத்திலும் போலீஸார் விசாரித்தனர்.

திருச்சியில் பிரபல ரௌடி ஒருவர் திமுக ஆட்சியில் என்கவுன்டர் செய்யப்பட்டார். அதற்குப் பின்னணியில் இருந்து தூண்டியது ராமஜெயம். அந்த ரௌடியின் ஆதரவாளர்கள் இதனைச் செய்திருக்கலாம் என்றும் சொல்லப்பட்டது. ‘ராமஜெயத்தின் உடல் இருந்த நிலையைப் பார்த்தால் அவர் கைதேர்ந்த தொழில் முறை கொலையாளிகளால் சித்ரவதை செய்து கொல்லப்பட்டிருப்பதைப் போல் தெரிகிறது. அதனால், வெளிமாநிலத் தொழில் போட்டி காரணமாக கொலை நடந்திருக்குமா என்றும் அலசப்பட்டது. ஆனால் மூன்று ஆண்டுகள் கழிந்திருக்கும் நிலையில் சிபிசிஐடி விசாரித்த இந்த வழக்கில் குற்றவாளி யாரும் சிக்கவில்லை.

தனது கணவர் கொலை வழக்கை சிபிசிஐடி சரியாக விசாரிக்கவில்லை. அதனால் சிபிஐ விசாரணைக்கு உத்தரவிடவேண்டும் என்று சென்னை உயர்நீதிமன்றத்தின் மதுரை கிளையில் மனுதாக்கல் செய்திருந்தார். அந்த வழக்கை விசாரித்த நீதிபதிகள் குற்றவாளிகளைக் கண்டறிய அக்டோபர் 28ந் தேதி வரை காவல் துறை அதிகாரிகளுக்கு அவகாசம் கொடுத்திருந்தனர்.

ராமஜெயத்துக்கு நெருக்கமான மூன்று நபர்களை பிடித்து விசாரித்ததில் அவர்கள் முன்னுக்கு பின் முரணான தகவல்களைத் தருவதால் அவர்களை உண்மை அறியும் சோதனைக்கு உட்படுத்த சிபிஐ உதவி கேட்டிருந்தது சிபிசிஐடி போலீஸ். இந்நிலையில் புதன்கிழமை நீதிமன்றத்தில் சிபிசிஐடி போலீஸ், ராமஜெயம் கொலையின் முடிச்சுகளை அவிழ்க்குமா? அல்லது நீதிமன்றம் சிபிஐ விசாரணைக்கு உத்தரவிடுமா? என்கிற கேள்வி அரசியல் வட்டாரத்தில் கிளம்பியிருக்கிறது.

தேர்தல் நேரத்தில் மாற்றப்படும் தேர்தல் ஆணையர்கள்…ஏன்?

தேர்தலில் வெற்றி பெற கட்சிகளுடையே கூட்டணி எந்த அளவுக்கு முக்கியமோ அதே அளவுக்கு தேர்தல் ஆணையத்தின் ‘ஒத்துழைப்பும்’ மிக முக்கியம் என்ற எழுதப்படாத விதி இந்திய தேர்தல் நடைமுறைகளில் உள்ளது.

தற்சமயம் தமிழக தலைமைத் தேர்தல் அதிகாரியாக உள்ள சந்தீப் சக்சேனா, தேர்தல் ஆணையத்தால் விடுவிக்கப்பட்டுள்ளார். சந்திப் சக்சேனா, டெல்லிக்கு மாற்றம் கோரி விண்ணப்பித்ததாகவும் அதன் பேரிலே அவரை விடுவித்துள்ளதாகவும் இந்திய தேர்தல் ஆணையத்தின் இயக்குநர் விளக்கம் கொடுத்திருக்கிறார்.

கடந்த ஆண்டு தமிழக முதன்மை தேர்தல் அதிகாரியாக நியமிக்கப்பட்ட சந்தீப் சக்சேனா ஸ்ரீரங்கம், ஆர். கே.நகர் இடைத் தேர்தல்களில் ஆளும் அதிமுக அரசுக்கு ஆதரவாக செயல்பட்டார் என்று கூறி அவரை மாற்ற வேண்டும் என்று தமிழக அரசியல் கட்சிகள் வலியுறுத்து வந்தன.

“தேர்தலில் வன்முறை என்பது இந்தியாவெங்கும் ஒரு வழக்கமாக இருந்துவருகிறது. சமீப காலங்களில், கிட்டத்தட்ட இந்த பத்தாண்டுகளில் தமிழகத்தில் தேர்தல் முறைகேடு அதிக அளவில் நடந்துள்ளது. முறைகேடுகளில் அரசியல்வாதிகள் ஈடுபடும் காலம் போய் வாக்காளர்களே வாக்குக்குப் பணம் பெற்றுக்கொள்ளும் முறைகேட்டில் ஈடுபட ஆரம்பித்திருக்கிறார்கள். பீகார் தேர்தல் வன்முறைக்கு பெயர்பெற்றது. தமிழகத் தேர்தல் முறைகேடுகளுக்கு பெயர் பெற்றிருக்கிறது” என்கிறார் அரசியல் ஆய்வாளரும் எழுத்தாளருமான ஆர். முத்துக்குமார்.

2009-ஆம் ஆண்டு திருமங்கலத்தில் நடந்த இடைத் தேர்தலின் போது அப்போதைய திமுக அரசு வாக்களர்களுக்கு பெருமளவில் பணம் கொடுத்ததாக குற்றம்சாட்டப்பட்டது. வாக்காளர்களுக்கு பணம் கொடுத்து வெற்றி கண்டதால் ‘திருமங்கலம் ஃபார்முலா’ என சிறப்புப் பெயரையும் அந்தத் தேர்தல் பெற்றது. அப்போது தமிழக தேர்தல் ஆணையராக இருந்தவர் நரேஷ் குப்தா. நேர்மையான அதிகாரி என பெயர் பெற்றவர் என்றாலும் அரசியல் கட்சிகளின் செல்வாக்கு முன் அவருடைய அதிகாரத்தால் வலுவாகப் போராட முடியவில்லை.

“இந்திய சுதந்திரம் அடைந்து முதல் தேர்தல் நடந்தபோது தேர்தல் நியாயமாக நடத்தப்பட வேண்டும் என்றால் தேர்தல் ஆணையம் தன்னிச்சையான அதிகாரம் கொண்ட அமைப்பாக இருக்க வேண்டும் என்றார் ஜவஹர்லால் நேரு. ஆனால் இப்போது தேர்தல் ஆணையர் என்றாலே ஆளும் அரசுக்கு ஆதரவாகத்தான் இருப்பார் என்ற நிலை ஏற்பட்டிருக்கிறது” என்கிற முத்துக்குமார், தேர்தல் ஜனநாயகத்தை மீட்டெடுக்க தேர்தல் ஆணையத்தில் சீர்திருத்தம் தேவை என்கிறார்.

“தேர்தல் ஜனநாயகத்தில் மாற்றம்கொண்டுவர வலுவான ஆயுதம் தேவை. சில சமயம் இந்த ஆயுதங்களே ஜனநாயகத்தை சீர்குலைத்திருப்பது கடந்தகால வரலாறு. இனியும் அப்படி நடக்காமல் தேர்தல் ஆணையம் தன்னுடைய சுதந்திரத்தன்மையை நிலைநிறுத்த முயல வேண்டும். கடந்த காலங்களில் தமிழக தேர்தல்களில் தேர்தல் ஆணையம் மீது விழுந்த மோசமான பிம்பத்தைக் களைய நேர்மையான, வலுவான தேர்தல் அதிகாரிகள் நியமிக்கப்பட வேண்டும்” என்கிறார் ஆர். முத்துக்குமார்.

இந்நிலையில், சுற்றுலாத் துறை செயலாளராக உள்ள ராஜஸ்தான் மாநிலத்தைச் சேர்ந்த, ஐ.ஏ.எஸ். அதிகாரியான ஹர்சகாய் மீனா தமிழக தலைமைத் தேர்தல் அதிகாரி பொறுப்புக்கு நியமிக்கப்படலாம் என்று கூறப்படுகிறது. மேலும், தமிழகத்தைச் சேர்ந்த முதன்மைச் செயலாளர்கள் சிலரது பெயரும் பட்டியலில் இருப்பதாகச் சொல்லப்படுகிறது.

ஆட்சியில் பங்கேட்கும் கட்சிகளின் கனவு பலிக்குமா?

allai

பெரிய கட்சிகள் கூட்டணி ஆட்சிக்கெல்லாம் தமிழகத்தில் வாய்ப்பேயில்லை என்று பேசிவந்த காலம் போய், சிறிய கட்சிகள் கூட்டணி ஆட்சிக்கு ஒத்துக்கொண்டால்தான் கூட்டணிக்கே வருவோம் என பெரிய கட்சிகளை மிரட்டிக் கொண்டிருக்கின்றன. அதிமுகவுக்கு பெரிய அளவில் எதிர்ப்பு இல்லாத காரணத்தினால் திமுகவால் நடைபெறவிருக்கும் தேர்தலில் வாக்குகளை சிந்தாமல் சிதறாமல் பெற அடுத்த நிலையில் உள்ள கட்சிகளின் ஆதரவு தேவைப்படுகிறது. ஆனால் காங்கிரஸ் தவிர, மற்ற கட்சிகள் அனைத்தும் திமுகவுடன் கூட்டணிக்கு வரத் தயார் இல்லை என்கின்றன.

தமிழகக் கட்சிகள் – கூட்டணி

காங்கிரஸ்-திமுகவுடன் கூட்டணி வைக்க விரும்புகிறது. ஜி.கே.வாசனின் தமிழ் மாநில காங்கிரஸ்-அதிமுகவுடன் கைக்கோர்க்க முயற்சிக்கிறது. வைகோவின் மதிமுக, திருமாவளவனின் விடுதலைச் சிறுத்தைகள், இடதுசாரிகள் – தேமுதிகவை இழுக்கப்பார்க்கிறார்கள். பாஜக-தேமுதிக-பாமக கூட்டணிக்கு முயற்சிக்கிறது. புதிய தமிழகம், மனிதநேய மக்கள் கட்சி போன்ற கட்சிகள் அதிமுகவுடன் சேர விரும்புகின்றன.

கட்டுப்பாடு போடும் காங்கிரஸ்

அண்மையில் 234 தொகுதிகளிலும் போட்டியிட நாங்கள் தயாராக இருக்கிறோம் என்றார் தமிழக காங்கிரஸ் கட்சியின் தலைவர் இளங்கோவன். தமிழ் ரசிகர்களின் மனம் கவர்ந்த நடிகைகள் நக்மா, குஷ்பூ போன்றவர்கள் காங்கிரஸுக்குப் புத்துயிர் தருவாவர்கள் என நம்புகிறார் அவர். எனவே, ஆங்கில நாளிதழுக்கு அளித்த பேட்டியில், “கூட்டணி ஆட்சிக்கு யார் ஒத்துக்கொள்கிறார்களோ அவர்களுடன் மட்டும்தான் கூட்டணி அமைப்போம். இதில் நாங்கள் உறுதியாக இருப்போம். இனி தேர்தலுக்கு மட்டும் கூட்டணி பிறகு நட்பான அணுகுமுறை என்ற பேச்சுக்கே இடமில்லை” என்று தெரிவித்திருக்கிறார்.

பாஜகவின் கனவு

மக்களவைத் தேர்தலை இணைந்தே சந்தித்ததைப் போல பாஜக தங்களுடன் பாமக,தேமுதிக கட்சிகளை இணைத்து சட்டப்பேரவைத் தேர்தலை சந்திக்க விரும்புகிறது. இதன் மூலம் கணிசமான இடங்களைப் பிடித்து ஜம்மு-காஷ்மீரில் கூட்டணி ஆட்சி அமைந்ததுபோல தமிழகத்திலும் அமைக்க வேண்டும் என்பது பாஜக தலைவர் அமித் ஷாவின் திட்டம். ஆனால் இந்தக் கூட்டணியில் பாமக-தேமுதிக எப்படி இணைந்திருப்பார்கள் என்பது அவர்கள் முன் உள்ள சவால். கடந்த மக்களவைத் தேர்தலில் தேமுதிகவுக்கு ஆதரவாக வட மாவட்டங்களில் பாமகவினர் சரியாக தேர்தல் பணியாற்றவில்லை; தங்களுக்கு துரோகம் செய்துவிட்டார்கள் என்று குற்றம்சாட்டியது தேமுதிக. ஆனால் பாமகவோ தாங்கள் மனசாட்சிப்படி பணியாற்றியதாக விளக்கம் சொல்கிறது.

பாமக நிறுவனர் ராமதாஸ், தேமுதிக தங்களுடன் கூட்டணிக்கு வந்தால் வரவேற்போம் என்று சொல்லியிருந்தார். இதை கடுமையாக விமர்சித்திருக்கிறார் பிரேமலதா, காரணம் அன்புமணியை முதல்வராக எப்படி ஏற்கமுடியும் என்பதே. விஜயகாந்த், அன்புமணி என முதல்வர் பதவியை தீவிரமாக விரும்புகிறவர்கள் ஒரே கூட்டணியில். அதை எப்படி எதிர்கொள்வது என்பதே பாஜக முன் இருக்கும் சவால்.

மக்கள் நலக் கூட்டியக்கம் விரும்பும் விஜயகாந்த்

அதிமுக, திமுகவுக்கு அடுத்து தீர்மானிக்கு சக்தியாக மாறியுள்ள தேமுதிகவை நான்கு கட்சிகள் அடங்கிய கூட்டணிக்கு தலைமை ஏற்ற வைக்க வேண்டும் என்பது வைகோவின் விருப்பம். ஆனால் விஜயகாந்த் பிடிகொடுப்பதாகத் தெரியவில்லை. கணவனும் மனைவியும் அதிமுக, திமுகவென பிரித்துக்கொண்டு கடுமையாக மேடைகளில் விமர்சித்துவருகிறார்கள். இந்த இரண்டுக் கட்சிகளுடன் கூட்டணி இல்லை என்று சொல்லியே வருகிறார்கள். ஆனாலும் தங்களுடைய நிலைப்பாடு பற்றி தமிழக அரசியல் கட்சிகளிடையே குழப்பமான நிலையையே இவர்கள் உருவாக்கிவருகிறார்கள். இந்தக் குழம்பியக் குட்டையில் யார் தேமுதிக என்னும் வளமான மீனைப் பிடிக்கப் போகிறார்?