அத்வானியைப் புறக்கணித்தவர்களுக்கு கீர்த்தி ஆசாத் எம்மாத்திரம்?

அரசியல் கட்சிகள் சில நேரங்களில் மூத்தத் தலைவர்கள், கட்சிக்காக உழைத்தவர்களை தூக்கியெறிவது சர்வ சாதாரண விஷயம்தான். ஆனால், மோடி-அமித் ஷா பாஜகவின் அதிகார மையங்களாகிவிட்ட பிறகு பல மூத்தத் தலைவர்கள், நேர்மையான அரசியல்வாதி என பெயர் எடுத்தவர்களை தொடர்ந்து புறக்கணிக்கப்பட்டு வருகின்றன. அதன் பட்டியல் இதோ…

அத்வானி

மோடி தலைமைக்கு பாஜக பலிகொடுத்த மூத்தத் தலைவர் ‘ரத யாத்திரை’ புகழ் அத்வானி. பிரதமர் கனவில் இருந்த அத்வானியை ஓரங்கட்டி, மோடியை பிரதமர் வேட்பாளராக அறிவித்ததில் முழு பங்கும் ராஷ்டிரிய ஸ்வயம் சேவக் அமைப்பையே சாரும்.  மோடி போன்ற அதிரடியாளர்கள்தான் தற்போதை ‘இந்துத்துவ’ வளர்ச்சிக்குத் தேவை என்பது அவர்களுடைய கணக்கு. அதன்படி மோடியை முன்னிறுத்தினார்கள்.

தேர்தல் வெற்றிக்குப் பிறகு, அத்வானிக்கு நாடாளுமன்ற வளாகத்தில் அறை ஒதுக்குவதில் ஆரம்பித்து, அவரை ‘கார்னர்’ செய்தது மோடி தலைமை.  அத்வானியுடன் முரளி மனோகர் ஜோஷி போன்ற தலைவர்களும் ஓரங்கட்டப்பட்டனர். அவர்களுடைய ஆலோசனைகளை அமித் ஷா புறக்கணித்தார். இதற்கு பதிலடி கொடுக்கும் வகையில் கடந்த ஜுன் மாதம் அத்வானி,

“ஜனநாயகத்தை ஒடுக்கும் சக்திகளின் ஆதிக்கம் நாட்டில் மேலோங்கி இருக்கின்றன. அரசியல் சாசன பாதுகாப்பு வலுவாக இருப்பினும் கூட ஜனநாயகத்தை ஒடுக்கும் சக்திகளின் ஆதிக்கமே வலுவாக இருக்கிறது. இப்போது உள்ள சட்டதிட்டங்கள் அவசர நிலையை தவிர்க்க போதுமானதாக இல்லை.

மீண்டும் அவசர நிலை ஏற்படாமல் தடுக்கும் அளவிற்கு முதிர்ச்சியுடைய அரசியல் தலைமை இந்தியாவில் இல்லை என நான் கூறவில்லை. ஆனால், அந்த தலைமைக்கு அத்தகைய சூழலை தடுக்கும் வலிமையில்லை என்பதே எனது நம்பிக்கையின்மையை அதிகரித்துள்ளது. எனவே, நாட்டில் மீண்டும் அவசர நிலை ஏற்பட வாய்ப்பில்லை என நான் முழுமையாக நம்பவில்லை” எனக் கூறியிருந்தார்.

அருண்சோரி

பாஜகவின் மற்றொரு மூத்தத் தலைவரான அருண் சோரி, “முன்னெப்போதும் இல்லாத வகையில் ஒரு பலகீனமான பிரதமர் நாட்டை ஆள்வதாக நான் உணர்கிறேன். பொருளாதார நிர்வாகம் என்பதை இந்த அரசு தலைப்புச் செய்திகளை நிர்வகிப்பது என்று தவறாக புரிந்துகொண்டிருக்கிறது” என்று தெரிவித்திருந்தார்.

“மன்மோகன் சிங் பிரதமராக இருந்த காலத்தை எல்லோரும் இப்போது நினைவு கூற ஆரம்பித்துவிட்டார்கள். இந்த அரசாங்கத்தின் செயல் திட்டங்கள் காங்கிரஸ்+பசு என்பதாகவே உள்ளது. காங்கிரஸ் வழியிலேயே பாஜக அரசும் செயல்படுகிறது” என்று ஒரு புத்தக வெளியீட்டு விழாவில் பேசியிருந்தார் அருண் சோரி.

மோடியை விமர்சிக்க ஆரம்பித்ததிலிருந்து, மோடி ஆதரவாளர்கள் தன்னை சமூக வலைத்தளங்களில் மோசமாக விமர்சிப்பதோடு, மூளை பக்கவாதத்தால் பாதிக்கப்பட்ட தன் மகனையும் கேலி செய்வதாக அருண் சோரி தெரிவித்தார்.

“இந்த நிகழ்ச்சியில் என் மீதும் என் மகன் மீதும் தனிப்பட்ட முறையில் நடந்த தாக்குதல்கள் குறித்து பேச ஆரம்பித்தால், பார்வையாளர்கள் அதிர்ச்சியடைவார்கள். உதாரணத்துக்கு ஒன்றைச் சொல்கிறேன்…‘அவருக்கு பைத்தியக்கார மகன் ஒருவன் இருக்கிறான். அவனைப் போல இவருக்கும் பைத்தியம் பிடித்துவிட்டது’. இத்தகைய முட்டாள்களை பிரதமர் மோடி சமூக வலைத்தளங்களில் பின்தொடர்பவராக இருக்கிறார்” என்று பேசினார்.

கீர்த்தி ஆசாத்

டெல்லி கிரிக்கெட் சங்கத்தில் தலைமை பதவியில் இருந்தபோது ஊழல் செய்ததாக அருண் ஜேட்லி மீது ஆதாரத்துடன் குற்றச்சாட்டுகளை வைத்தார் பாஜக நாடாளுமன்ற உறுப்பினர் கீர்த்தி ஆசாத்.  இதற்காக அவரைக் கட்சியில் இருந்து  இடைநீக்கம் செய்துள்ளது பாஜக.இடைநீக்கம் செய்யப்பட்டது தொடர்பாக கருத்து தெரிவித்துள்ள கீர்த்தி ஆசாத்,“நான் செய்த தவறு என்ன? என்னை கட்சியில் இருந்து நீக்கி தண்டித்ததற்கான காரணம் என்ன? என்பது குறித்து பிரதமர் மோடி விளக்க வேண்டும்.  ஊழல் குறித்து பேசுவதும், உண்மை பேசுவதும் குற்றம் என்றால், அந்த குற்றத்தை தொடர்ந்து செய்வேன்” என்று தெரிவித்துள்ளார்.

வன்முறையை தூண்டும் படியாக பேசுபவர்கள், ஊழல் குற்றச்சாட்டுக்கு ஆளானவர்களுக்கு அரவணைத்துச் செல்லும் பாஜக, தன் கட்சியைச் சேர்ந்தவர்கள் தவறு செய்கிறார்கள் என்று சுட்டிக்காட்டியவர்களை நீக்கம் செய்வதும் அவர்களை கட்சியில் ஓரங்கட்டுவதையும் செய்கிறது பாஜக.
Advertisements

பாஜக மூத்த தலைவர்கள் போர்க்கொடி: அமித் ஷாவுக்கு வலுக்கும் எதிர்ப்பு

கடந்த ஜுன் மாதம் “தற்போதைய சூழலில், ஜனநாயகத்தை ஒடுக்கும் சக்திகளின் ஆதிக்கம் நாட்டில் மேலோங்கி இருக்கின்றன. அரசியல் சாசன பாதுகாப்பு வலுவாக இருப்பினும் கூட ஜனநாயகத்தை ஒடுக்கும் சக்திகளின் ஆதிக்கமே வலுவாக இருக்கிறது. இப்போது உள்ள சட்டதிட்டங்கள் அவசர நிலையை தவிர்க்க போதுமானதாக இல்லை.

மீண்டும் அவசர நிலை ஏற்படாமல் தடுக்கும் அளவிற்கு முதிர்ச்சியுடைய அரசியல் தலைமை இந்தியாவில் இல்லை என நான் கூறவில்லை. ஆனால், அந்த தலைமைக்கு அத்தகைய சூழலை தடுக்கும் வலிமையில்லை என்பதே எனது நம்பிக்கையின்மையை அதிகரித்துள்ளது. எனவே, நாட்டில் மீண்டும் அவசர நிலை ஏற்பட வாய்ப்பில்லை என நான் முழுமையாக நம்பவில்லை” எனக் கூறியிருந்தார் பாஜக மூத்தத் தலைவர் எல்.கே.அத்வானி.

பாஜகவின் மற்றொரு மூத்தத் தலைவரான அருண் சோரி, “முன்னெப்போதும் இல்லாத வகையில் ஒரு பலகீனமான பிரதமர் நாட்டை ஆள்வதாக நான் உணர்கிறேன். பொருளாதார நிர்வாகம் என்பதை இந்த அரசு தலைப்புச் செய்திகளை நிர்வகிப்பது என்று தவறாக புரிந்துகொண்டிருக்கிறது” என்று தெரிவித்திருந்தார்.

நாடு முழுவதும் பாஜகவும் பாஜக ஆதரவு அமைப்புகளும் முன்னெடுத்த வெறுப்பு அரசியல் பீகார் தேர்தலில் எதிரொலித்தது. 40 தேர்தல் பேரணிகளில் கலந்துகொண்டு பிரதமர் நரேந்திர மோடி தேர்தல் பிரச்சாரம் செய்தபோது பாஜக 50 இடங்களை ம்ட்டுமே கைப்பற்றி படுதோல்வி அடைந்தது.

இந்தத் தோல்விக்கு ஆர் எஸ் எஸ் தலைவரின் இடஒதுக்கீட்டுக்கு எதிரான பேச்சும் பாஜக தலைவர் அமீத் ஷாவின் வெறுப்பு பேச்சுகளும்தான் தோல்விக்குக் காரணம் என கூட்டணி கட்சிகளின் தலைவர்களே பேசினார். பாஜகவுக்குள் சலசலப்பு எழுந்தது. பாஜக எம்பி சத்ருஹன் சின்ஹா வெளிப்படையாக பீகார் தேர்தல் பிரச்சாரங்களின் போதே விமர்சனம் வைத்தார்.

இந்நிலையில், பீகார் தேர்தலில் பாஜக தோல்வி அடைந்ததன் எதிரொலியாக பாஜக மூத்த தலைவர்கள் முரளி மனோகர் ஜோஷி, யஷ்வந்த் சின்கா, சாந்தகுமார், அத்வானி ஆகியோர் இணைந்து கூட்டறிக்கை ஒன்றை வெளியிட்டுள்ளனர். அதில் பீகார் தோல்விக்கு அனைவரும் காரணம் என்பதை ஏற்கமுடியாது என சுட்டிக்காட்டியுள்ளதோடு, டெல்லி சட்டசபை தேர்தல் தோல்வி முடிவில் இருந்தும் பாடம் கற்காததால் தான் பீகாரிலும் தோல்வி அடைந்ததாக கூறியுள்ள மூத்த தலைவர்கள் பீகார் தோல்வி குறித்து முழுமையான மறுஆய்வு தேவை எனவும் தெரிவித்துள்ளனர்.

மோடி மற்றும் அமித் ஷாவின் தன்னிச்சையான எதேச்சதிகார நிலைப்பாட்டையே அவர்கள் மறைமுகமாகச் சுட்டிக்காட்டியுள்ளனர். செவ்வாய்கிழமை முரளி மனோகர் ஜோஷியின் இல்லத்தில் கூடிய மூத்தத் தலைவர்கள் கலந்தாலோசித்து இந்த அறிக்கையை வெளியிட்டுள்ளதாக தகவல்கள் கூறுகின்றன. அருண் சோரி இந்த அறிக்கையை தயாரித்ததாகவும் ஊடகங்கள் சொல்லியிருக்கின்றன.

“கட்சியின் கருத்தொருமிப்பு அழிக்கப்பட்டுவிட்டதும் அதன் பின்விளைவாக கடந்த ஓராண்டாக கட்சி பலவீனப்பட்டு வருவதும் பீகார் தேர்தல் தோல்விக்கு காரணம்” என்று தங்களுடைய கூட்டறிக்கையில் தெரிவிக்கிறார்கள் பாஜக மூத்தத் தலைவர்கள்.

திங்கள்கிழமை நடந்த பாஜக ஆட்சிமன்றக் குழு கூட்டத்தின் முடிவில் பேசிய அருண் ஜெட்லி, “அமித் ஷாவை மாற்றும் எண்ணத்துக்கே இடமில்லை” என திட்டவட்டமாகத் தெரிவித்திருந்தார்.

’மோடியின் ஆட்சி விரைவில் முடியப்போகிறது’

மாட்டிறைச்சி விவகாரம், எழுத்தாளர் படுகொலைகள் குறித்து சிறுபான்மையினரை அச்சப்படுத்தும் வகையில் பாஜக-அதனுடன் தொடர்புடைய இந்துத்துவ அமைப்பினரின் சர்ச்சைக்குரிய நடவடிக்கைகளை பிரதமர் மோடி கட்டுக்குள் கொண்டு வர வேண்டும் என சர்வதேச பொருளாதார மதிப்பீட்டு நிறுவனமான மூடிஸ் கடந்த வாரம் எச்சரித்தது. இந்த அசாதாரண சூழல் நீடித்தால் தனது மதிப்பை உள்நாட்டு அளவிலும் உலக அளவிலும் இந்தியா இழக்க நேரிடும் என்றும் அது கூறியது.

இந்நிலையில் பொருளாதார நிபுணரும், முன்னாள் மத்திய அமைச்சருமான அருண்ஷோரி, தனியார் தொலைக்காட்சி ஒன்றிற்கு அளித்த பேட்டியில், “தாத்ரி படுகொலை, ஹரியானாவில் தலித் குழந்தைகள் எரிக்கப்பட்ட சம்பவம் குறித்து பிரதமர் மோடி வேண்டுமென்றே மவுனம் காத்து வருகிறார். அவரது சகாக்கள் சர்சைக்குரிய வகையில் பேசுவதை தொடர்ந்துகொண்டே இருக்கின்றனர். மோடி இந்தியாவை அடிப்படைவாதச் சாக்கடைக்குள் தள்ளுகிறார்” என தனது கருத்தினை பதிவுசெய்தார்.

ஆனால், நாட்டில் நடந்துவரும் அசாதாரண சம்பவங்கள் குறித்து கருத்தோ, விளக்கமோ தெரிவிக்காத பிரதமர் மோடி,“சகிப்புதன்மை பற்றி பேசும் காங்கிரஸ்காரர்களுக்கு 1984–ம் ஆண்டு நவம்பர் 2–ந் தேதி நினைவு இருக்கிறதா? டெல்லியில் என்ன நடந்தது? சீக்கியர்கள் படுகொலை செய்யப்பட்டார்கள். சீக்கியர்கள் படுகொலை நடந்த இந்த நினைவு நாளில் சகிப்புத்தன்மை பற்றி பேச காங்கிரசுக்கு எந்த தகுதியும் இல்லை’ என்று திங்கள்கிழமை பேசியிருக்கிறார்.

இந்நிலையில் குடியரசுத் தலைவர் பிரணாப் முகர்ஜியை சந்தித்துப் பேசினார் காங்கிரஸ் தலைவர் சோனியா காந்தி. இந்த சந்திப்புக்குப் பின் மாட்டிறைச்சி விவகாரம், எழுத்தாளர்கள் மீதான தாக்குதல் உள்ளிட்ட பிரச்னைகளை முன்னிறுத்தி காங்கிரஸ் கட்சி டெல்லியில் செவ்வாய்கிழமை பேரணி நடத்தும் என்று அறிவிக்கப்பட்டது.

பேரணியைத் தொடர்ந்து குடியரசுத் தலைவர் பிரணாப் முகர்ஜியை சந்தித்து வகுப்புவாத பிரச்னை, எழுத்தாளர்கள் மீதான தாக்குதல் உள்ளிட்ட சகிப்புத் தன்மைக்கு எதிரான நிகழ்வுகள் குறித்து முறையிட காங்கிரஸ் கட்சியினர் திட்டமிட்டுள்ளனர்.

பிரதமர் மோடி பேசாத நிலையில் குடியரசுத் தலைவர் நான்கைந்து முறை இந்தியாவின் பன்முக கலாச்சாரம் குறித்து பேசியிருக்கிறார் என்பது குறிப்பிடத்தக்கது. இந்தச் சூழலில் பீகார் மாநிலத்தில் நடைபெற்ற தேர்தல் பிரச்சாரக் கூட்டத்தில் ராகுல் காந்தி பேசியிருப்பது முக்கியத்துவம் பெற்றிருக்கிறது.

“மத்தியில் ஆளும் பாஜக தலைமையிலான தேசிய ஜனநாயகக் கூட்டணி அரசின் பதவிக்காலம் விரைவில் முடிவுக்கு வந்துவிடும்; பிரதமர் நரேந்திர மோடியின் நடவடிக்கைகளே, மத்தியில் காங்கிரஸ் கட்சியை விரைவில் ஆட்சிக்கு வரச் செய்யும்” என்று காங்கிரஸ் கட்சியின் துணைத் தலைவர் ராகுல் காந்தி பேசியிருப்பது பரபரப்பை ஏற்படுத்தியிருக்கிறது.

“தலித் குழந்தைகள் கொலை செய்யப்பட்டதை நாய் மீது கல்லெறிதல் சம்பவத்துடன் ஒப்பிட்டு மத்திய அமைச்சர் பேசியிருக்கிறார். அந்தக் குழந்தைகள் ஒன்றும், நாய்கள் கிடையாது. அவர்கள், நம் நாட்டின் குடிமக்கள். நமது நாட்டின் எதிர்காலம். பாஜக, ஆர் எஸ் எஸ் அமைப்புகளின் எண்ணமே மக்களை பிரித்து ஆள்வதுதான்” என்று கடுமையாக சாடியிருக்கிறார்.

பாஜகவின் மூத்தத் தலைவர் எல்.கே. அத்வானி மூன்று மாதங்களுக்கு முன் எமர்ஜென்ஸி போன்ற சூழல் நிலவுவதாக சொன்னது, தீர்க்க தரிசனம் மிக்க வார்த்தைகள் என்பதை தற்போதைய சூழலை நோக்கும்போது தெரிகிறது. மோடியை ஆதரித்த நாராயணமூர்த்தி போன்ற தொழிலதிபர்கள், ரகுராம் ராஜன் போன்ற பொருளாதார நிபுணர்கள், உலக அமைப்புகள் ஒருபுறம் இருந்தாலும் மோடிக்கு முன்னோடியாக இருந்து ரத யாத்திரை நடத்தி புகழ்பெற்ற அத்வானியின் வார்த்தைகளை புறம்தள்ளிவிட முடியாது. கடந்த மூன்று மாத சம்பவங்களும் அதையே சொல்லவருகின்றன. ராகுலின் பேச்சும் அதையே உணர்த்துகிறது!