ராகுல் – ஜெட்லி சந்திப்பு: நாடாளுமன்ற நடவடிக்கைகள் சுமூகமாக இருக்குமா?

நாடாளுமன்றக் குளிர்காலக் கூட்டத்தொடர் வரும் 26-ஆம் தேதி தொடங்க இருக்கிறது. முந்தைய மழைக்காலக் கூட்டத்தொடரில் எதிர்க்கட்சிகளின் எதிர்ப்பு காரணமாக பல்வேறு முக்கிய மசோதாக்களை அரசால் நிறைவேற்ற முடியவில்லை.

தேங்கியிருக்கும் மசோதாக்கள்

மாநிலங்களவையில் நிறைவேற்றப்படாத நிலையில் 11 மசோதாக்களும், மக்களவையில் 13 மசோதாக்களும் இருக்கின்றன. இவற்றில் 5 மசோதாக்கள் பல்வேறு துறைகளின் நாடாளுமன்ற நிலைக் குழுக்களின் பரிசீலனையில் உள்ளன.
இதேபோல், மத்திய அரசு உத்தேசித்திருந்த சரக்கு – சேவை வரிகள் மசோதாவும் (ஜி.எஸ்.டி.) முந்தைய கூட்டத்தொடரில் நிறைவேற்றப்படவில்லை.

கூட்டத்தொடர் அறிவிப்பு

நாடாளுமன்றக் கூட்டத்தொடரானது நவம்பர் 26-ஆம் தேதி முதல் டிசம்பர் 23-ஆம் தேதி வரை நடைபெற இருக்கிறது. இந்திய அரசமைப்புச் சட்டம் ஏற்றுக்கொள்ளப்பட்ட தினத்தை (26-11-1949) நினைவுகூரும் விதமாக, கூட்டத்தொடரின் முதல் இரண்டு நாள்களான 26, 27 ஆகிய தேதிகளில் சிறப்பு அமர்வுகளுக்கு ஏற்பாடு செய்யப்பட்டுள்ளது. இந்த அமர்வுகளில் அரசமைப்புச் சட்டத்தில் நமது பங்களிப்பு குறித்தும், அரசியலமைப்புச் சட்டம் தொடர்பான கடமையுணர்வு, அரசமைப்புச் சட்டத்தை உருவாக்குவதில் அம்பேத்கரின் பங்கு குறித்தும் விவாதிக்க முடிவு செய்யப்பட்டுள்ளது. எனவே, அந்த தினங்களில் கேள்வி நேரங்கள் இருக்காது.

வெங்கய்ய நாயுடு கோரிக்கை

குளிர்காலக் கூட்டத்தொடரில் சரக்கு – சேவை வரி மசோதா உள்ளிட்ட முக்கிய மசோதாக்களை அரசு நிறைவேற்றும் என நம்பிக்கைத் தெரிவித்திருக்கிறார் நாடாளுமன்ற விவகாரங்களுக்கான அமைச்சர் வெங்கய்ய நாயுடு. இதுவரை முரண்டு பிடித்துக் கொண்டிருந்த மத்திய அரசு, “இந்த மசோதாக்களை நிறைவேற்ற எதிர்க்கட்சிகள் ஒத்துழைக்க வேண்டும். இந்த விவகாரத்தில் எதிர்க்கட்சிகளுடன் நாடாளுமன்றத்தில் விவாதம் நடத்த அரசு தயாராக உள்ளது” என கீழிறங்கி வந்துள்ளது.

‘பீகார் முடிவுகளை வைத்து நாடாளுமன்றத்தை முடக்கக்கூடாது’

சகிப்பின்மைக்கு எதிரான சூழலும் அதை எதிரொலித்த பீகார் தேர்தல் முடிவுகளும் நாடாளுமன்றத்தை முடக்கக் கூடும் என மத்திய அரசு தெரிந்து வைத்திருக்கிறது.

“பீகார் தேர்தல் முடிவு மக்கள் அளித்துள்ள தீர்ப்பு. அதை நாங்கள் வரவேற்கிறோம். பீகார் மக்கள், அவர்கள் விருப்பப்படி தீர்ப்பு வழங்கியுள்ளனர். இதனை எதிர்க்கட்சிகள் புரிந்துகொள்ள வேண்டும். ஒரு மாநிலத்தின் தேர்தல் முடிவானது அம்மாநிலத்தின் அரசியல், சூழ்நிலை ஆகியவற்றைப் பொருத்தது. அது ஒட்டுமொத்த தேசத்தின் மீதான தாக்கம் கிடையாது. பிகார் தேர்தல் முடிவுகளை முன்னிறுத்தி, நாடாளுமன்றத்தை எதிர்க்கட்சிகள் முடக்க வேண்டாம்” என்று வெங்கய்யா நாயுடு கேட்டுக்கொண்டுள்ளார்.

ராகுல்-ஜேட்லி சந்திப்பு

இதனிடையே இந்திய காங்கிரஸ் துணைத் தலைவர் ராகுல் காந்தியை மத்திய நிதியமைச்சர் அருண் ஜேட்லி புதன்கிழமை சந்தித்துப் பேசினார். அருண் ஜெட்லி, நாடாளுமன்றத்தில் சரக்கு, சேவை வரி மசோதாவை நிறைவேற்ற ராகுலிடம் பேசத் தயார் என அறிவித்திருந்தார். இந்நிலையில் இந்தச் சந்திப்பு நடந்திருக்கிறது. ஆனால் காங்கிரஸ் வட்டாரங்கள் இந்தச் சந்திப்பு தனிப்பட்ட முறையில் நடந்ததாக கூறுகின்றன. முன்னதாக அருண் ஜெட்லி காங்கிரஸ் தலைவர் சோனியா காந்தியையும் முன்னாள் பிரதமர் மன்மோகன் சிங்கையும் சந்தித்துப் பேசினார்.

மகளின் திருமணத்திற்கு அழைப்பு

சந்திப்பு குறித்து செய்தியாளர்களிடம் பேசிய அருண் ஜெட்லி, “எனது மகள் சோனாலியின் திருமண வரவேற்பு நிகழ்வு வரும் டிசம்பர் 9-ஆம் தேதி டெல்லியில் உள்ள எனது இல்லத்தில் நடக்க உள்ளது. ராகுலை அதற்காகவே சந்தித்தேன். அரசியல் நிகழ்வுகள் பற்றியும் பேசினேன்” என்றார்.

எதிர்க்கட்சியினரை தனித்தனியாக சந்தித்து பேச்சு

கடந்த பட்ஜெட் கூட்டத் தொடர், நாடாளுமன்றக் மழைக்காலக் கூட்டத் தொடர் அலுவல்கள் சுமுகமாக நடைபெற காங்கிரஸ், இடதுசாரிகள் உள்ளிட்ட கட்சிகளின் உறுப்பினர்கள் அனுமதிக்கவில்லை. இதனால், இரு அவைகளின் அலுவல்கள் முடிங்கின. அதேநிலை இம்முறையும் தொடரக்கூடாது என்பதற்காக எதிர்க்கட்சித் தலைவர்களை நாடாளுமன்ற விவகாரங்கள் துறை அமைச்சர் வெங்கய்ய நாயுடு, மத்திய இணையமைச்சர் ராஜீவ் பிரதாப் ரூடி ஆகியோர் தனித்தனியாகப் பேசி ஒத்துழைப்பு வழங்குமாறு கோரி வருகின்றனர். இதையொட்டி, வரும் 22-ஆம் தேதி தனது இல்லத்தில் இரு அவைகளிலும் உள்ள முக்கிய அரசியல் கட்சிகளின் தலைவர்களை வெங்கய்ய நாயுடு சந்தித்துப் பேசத் திட்டமிட்டிருக்கிறார்.

பாஜக மூத்த தலைவர்கள் போர்க்கொடி: அமித் ஷாவுக்கு வலுக்கும் எதிர்ப்பு

கடந்த ஜுன் மாதம் “தற்போதைய சூழலில், ஜனநாயகத்தை ஒடுக்கும் சக்திகளின் ஆதிக்கம் நாட்டில் மேலோங்கி இருக்கின்றன. அரசியல் சாசன பாதுகாப்பு வலுவாக இருப்பினும் கூட ஜனநாயகத்தை ஒடுக்கும் சக்திகளின் ஆதிக்கமே வலுவாக இருக்கிறது. இப்போது உள்ள சட்டதிட்டங்கள் அவசர நிலையை தவிர்க்க போதுமானதாக இல்லை.

மீண்டும் அவசர நிலை ஏற்படாமல் தடுக்கும் அளவிற்கு முதிர்ச்சியுடைய அரசியல் தலைமை இந்தியாவில் இல்லை என நான் கூறவில்லை. ஆனால், அந்த தலைமைக்கு அத்தகைய சூழலை தடுக்கும் வலிமையில்லை என்பதே எனது நம்பிக்கையின்மையை அதிகரித்துள்ளது. எனவே, நாட்டில் மீண்டும் அவசர நிலை ஏற்பட வாய்ப்பில்லை என நான் முழுமையாக நம்பவில்லை” எனக் கூறியிருந்தார் பாஜக மூத்தத் தலைவர் எல்.கே.அத்வானி.

பாஜகவின் மற்றொரு மூத்தத் தலைவரான அருண் சோரி, “முன்னெப்போதும் இல்லாத வகையில் ஒரு பலகீனமான பிரதமர் நாட்டை ஆள்வதாக நான் உணர்கிறேன். பொருளாதார நிர்வாகம் என்பதை இந்த அரசு தலைப்புச் செய்திகளை நிர்வகிப்பது என்று தவறாக புரிந்துகொண்டிருக்கிறது” என்று தெரிவித்திருந்தார்.

நாடு முழுவதும் பாஜகவும் பாஜக ஆதரவு அமைப்புகளும் முன்னெடுத்த வெறுப்பு அரசியல் பீகார் தேர்தலில் எதிரொலித்தது. 40 தேர்தல் பேரணிகளில் கலந்துகொண்டு பிரதமர் நரேந்திர மோடி தேர்தல் பிரச்சாரம் செய்தபோது பாஜக 50 இடங்களை ம்ட்டுமே கைப்பற்றி படுதோல்வி அடைந்தது.

இந்தத் தோல்விக்கு ஆர் எஸ் எஸ் தலைவரின் இடஒதுக்கீட்டுக்கு எதிரான பேச்சும் பாஜக தலைவர் அமீத் ஷாவின் வெறுப்பு பேச்சுகளும்தான் தோல்விக்குக் காரணம் என கூட்டணி கட்சிகளின் தலைவர்களே பேசினார். பாஜகவுக்குள் சலசலப்பு எழுந்தது. பாஜக எம்பி சத்ருஹன் சின்ஹா வெளிப்படையாக பீகார் தேர்தல் பிரச்சாரங்களின் போதே விமர்சனம் வைத்தார்.

இந்நிலையில், பீகார் தேர்தலில் பாஜக தோல்வி அடைந்ததன் எதிரொலியாக பாஜக மூத்த தலைவர்கள் முரளி மனோகர் ஜோஷி, யஷ்வந்த் சின்கா, சாந்தகுமார், அத்வானி ஆகியோர் இணைந்து கூட்டறிக்கை ஒன்றை வெளியிட்டுள்ளனர். அதில் பீகார் தோல்விக்கு அனைவரும் காரணம் என்பதை ஏற்கமுடியாது என சுட்டிக்காட்டியுள்ளதோடு, டெல்லி சட்டசபை தேர்தல் தோல்வி முடிவில் இருந்தும் பாடம் கற்காததால் தான் பீகாரிலும் தோல்வி அடைந்ததாக கூறியுள்ள மூத்த தலைவர்கள் பீகார் தோல்வி குறித்து முழுமையான மறுஆய்வு தேவை எனவும் தெரிவித்துள்ளனர்.

மோடி மற்றும் அமித் ஷாவின் தன்னிச்சையான எதேச்சதிகார நிலைப்பாட்டையே அவர்கள் மறைமுகமாகச் சுட்டிக்காட்டியுள்ளனர். செவ்வாய்கிழமை முரளி மனோகர் ஜோஷியின் இல்லத்தில் கூடிய மூத்தத் தலைவர்கள் கலந்தாலோசித்து இந்த அறிக்கையை வெளியிட்டுள்ளதாக தகவல்கள் கூறுகின்றன. அருண் சோரி இந்த அறிக்கையை தயாரித்ததாகவும் ஊடகங்கள் சொல்லியிருக்கின்றன.

“கட்சியின் கருத்தொருமிப்பு அழிக்கப்பட்டுவிட்டதும் அதன் பின்விளைவாக கடந்த ஓராண்டாக கட்சி பலவீனப்பட்டு வருவதும் பீகார் தேர்தல் தோல்விக்கு காரணம்” என்று தங்களுடைய கூட்டறிக்கையில் தெரிவிக்கிறார்கள் பாஜக மூத்தத் தலைவர்கள்.

திங்கள்கிழமை நடந்த பாஜக ஆட்சிமன்றக் குழு கூட்டத்தின் முடிவில் பேசிய அருண் ஜெட்லி, “அமித் ஷாவை மாற்றும் எண்ணத்துக்கே இடமில்லை” என திட்டவட்டமாகத் தெரிவித்திருந்தார்.

அருண் ஜெட்லியின் அமைதியும் சாமியார் பிராச்சியின் சகிப்பின்மையும்

pirachi

காங்கிரஸார் சகிப்பின்மையை எதிர்த்து பேரணி சென்றபோது நாட்டில் எங்கே சகிப்பின்மை நிலவுகிறது? அமைதியும் சுபிட்சமும் நிலவுவதாகச் சொன்னார் மத்திய அமைச்சர் அருண் ஜேட்லி. அதே நேரத்தில் பாஜக தலைவர் ஒருவரும் பாஜகவின் ஆதரவான விஸ்வஹிந்து பரிஷத் அமைப்பின் தலைவரும் ஷாருக்கானை நாடு கடத்தச் சொல்லி கட்டளை இடுகிறார்கள்.

தனது 50-வது பிறந்த நாளின் போது பாலிவுட் நடிகர் ஷாருக்கான் இந்தியாவில் சகிப்பின்மை அதிகரித்துவருவதாகவும் இது நாட்டின் வளர்ச்சிக்கு நல்லதல்ல என்றும் பேசியிருந்தார். அரவிந்த் கெஜ்ரிவால் உள்ளிட்ட அரசியல்வாதிகளும் நடுநிலையாளர்களும் ஷாருக்கானின் கருத்துக்கு வரவேற்பு தெரிவித்திருக்கின்றனர்.

இந்நிலையில் வழக்கமாக இந்துத்துவ அடிபொடிகள் ஷாருக்கான் மீது வசைமாரி பொழிய ஆரம்பித்துள்ளனர். ஷாருக்கானை, பாகிஸ்தானுக்கு நாடு கடத்த வேண்டும் என பெண் சாமியார் சாத்வி பிராச்சி கூறியிருக்கிறார். அதோடு அவர் விட்டுவிடவில்லை ஷாருக்கானை பாகிஸ்தானின் ஏஜென்ட் என விளித்துள்ளார். சகிப்புத்தன்மை குறித்த அவரது கருத்திற்காக, அவர் மீது தேசதுரோக வழக்கு பதிவு செய்யப்பட்டு, அவரை பாகிஸ்தானிற்கு நாடு கடத்த வேண்டும் என்று சாத்வி கூறினார். மத்திய அரசு ஷாருக்கானுக்கு வழங்கியுள்ள விருதை, அவர் திருப்பியளிக்க வேண்டும் என்றும் அவர் தெரிவித்தார்.

சாத்வி பிராச்சி 2013-ஆம் ஆண்டு முசாபர் நகரத்தில் நடந்த கலவரத்திற்கு காரணமானவர் என குற்றம்சாட்டப்பட்டவர் என்பது குறிப்பிடத்தகுந்தது. இவரைப் போல மத்திய பிரதேசத்தில் ஆளும் பாஜகவைச் சேர்ந்த அமைச்சர் கைலாஷ் விஜயவர்கியா, ‘ஷாரூக்கான் இந்தியாவில் வசிக்கிறார். ஆனால், அவரது உயிர் பாகிஸ்தானில் உள்ளது. அவரது திரைப்படங்கள் நம் நாட்டில் கோடிக்கணக்கான ரூபாயை வசூல் செய்கின்றன. அவரோ சகிப்பின்மை உள்ளதாகப் பேசுகிறார்’ என்று பேசியிருக்கிறார்.

மாட்டிறைச்சி சாப்பிட்டால் பொது இடத்தில் தலையைத் துண்டிப்பேன் என கர்நாடக முதல்வருக்கு பாஜக தலைவர் எஸ்.என்.சன்னபசப்பா கொலை மிரட்டல் விடுக்கிறார். இதுதான் இந்தியாவில் நிலவும் அமைதியின் லட்சணமா? அருண் ஜெட்லியும் வெங்கய்யா நாயுடுவும் சகிப்புத்தன்மை நிலவுவதாக ஊடகங்களில் விளக்கம் தருவதை நிறுத்திவிட்டு, தங்களுடைய கட்சிக்காரர்களுக்கு சகிப்புத்தன்மை என்றால் என்ன என்று பாடம் எடுப்பதே நல்லது. உலக நாடுகளிலிருந்து அடுத்த பொருளாதார அறிக்கை வருவதற்குள் அதை செய்துவிடுவது மிகவும் நல்லது!

 

”அருண் ஜேட்லி இந்துவே அல்ல”

arun-jaitley

மகாராஷ்டிர மாநிலத்தில் ஆளும் பாஜகவுக்கும் ஆதரவளித்த சிவ சேனா கட்சிக்கும் இடையே ஏற்பட்டிருக்கும் பூசல் உச்சக்கட்டத்தை எட்டியிருக்கிறது. பாகிஸ்தான் பாடகர் குலாம் அலியை பாட அனுமதிக்க மாட்டோம் என மிரட்டல் விடுத்தது, பாகிஸ்தான் முன்னாள் அமைச்சரின் புத்தக வெளியீட்டுக்கு ஏற்பாடு செய்திருந்த சுதீந்திர குல்கர்னி மீது கருப்பு மைவீசியது என சிவ சேனா கட்சியினர் கையில் எடுத்திருக்கும் வெறுப்பு அரசியல் மாநில, மத்தியில் ஆளும் பாஜகவுக்கு சங்கடத்தை ஏற்படுத்தி வருகிறது. இந்நிலையில், திங்கள் கிழமை இந்திய கிரிக்கெட் வாரிய அலுவலகத்துக்கு வந்த பாகிஸ்தான் கிரிக்கெட் வர்ணையாளர் மற்றும் பயிற்சியாளரை, அலுவலகத்துக்குள் புகுந்து மிரட்டி வெளியேற்றியிருக்கிறார்கள் சிவ சேனா கட்சியினர்.

இதுகுறித்து கடுமையான கருத்துக்களைச் சொல்லியிருக்கிறார் மத்திய அமைச்சர் அருண் ஜெட்லி. “கருத்து வெளிப்பாடு என்ற பெயரில் வன்முறையைக் கையாளுபவர்கள், தங்களை சுய பரிசோதனை செய்து கொள்ள வேண்டும். இத்தகைய நடவடிக்கைகள் மூலம் நாட்டின் ஜனநாயகம் மேம்படுமா என்பதையும் இந்தியாவின் மீது உலக நாடுகள் வைத்துள்ள நன்மதிப்பு குறையுமா என்பதையும் சிந்தித்துப் பார்க்க வேண்டும்.

நாட்டின் நலன் குறித்து அக்கறை கொள்ளும் நல்லெண்ணம் கொண்டவர்கள் அனைவரும், வன்முறை நடவடிக்கைகளை அரங்கேற்றுவதிலிருந்து விலகி இருக்க வேண்டும். மாறுபட்ட கருத்துகளின் மீதான சகிப்புத்தன்மை குறைந்து வருவதும், வன்முறை நடவடிக்கைகள் அதிகரிப்பதும் கவலையளிக்கும்படியாக உள்ளது.

அண்டை நாடுகளுடனான சில பிரச்னைகளை பேச்சுவார்த்தை மூலமாகவும், ஆக்கப்பூர்வமான விவாதத்தின் வாயிலாகவும் மட்டுமே தீர்க்க வேண்டும். இதை அனைத்துக் கட்சிகளும், குறிப்பாக எனது நண்பர்களான சிவசேனைக் கட்சியினரும் புரிந்து கொள்ள வேண்டும். மத்திய அரசிலும், மகாராஷ்டிர மாநில அரசிலும் அங்கம் வகிக்கும் சிவசேனைக் கட்சியினருக்கு சில பொறுப்புகள் உள்ளன என்பதை அவர்களிடத்தில் வலியுறுத்த மட்டுமே என்னால் முடியும்” என்று பேசியிருந்தார் அருண் ஜேட்லி.

இந்தக் கருத்தை முன்வைத்தும் சிவ சேனா கட்சியினரின் வன்முறை நடவடிக்கைகள் குறித்து புதிய தலைமுறைத் தொலைக்காட்சி செவ்வாய் அன்று நேர்படப்பேசு நிகழ்ச்சியில் விவாதம் நடத்தியது. அருண் ஜெட்லி பேசியது குறித்து சிவ சேனா கட்சி சார்பில் கலந்து கொண்ட ராதாகிருஷ்ணனிடம் நெறியாளர் தியாகச் செம்மல் கருத்து கேட்டார். அதற்கு ராதாகிருஷ்ணன், ‘அருண் ஜெட்லி நல்ல இந்துவே அல்ல, நல்ல இந்துஸ்தானியும் அல்ல, இன்னும் சொல்லப்போனால் நல்ல இந்துவே அல்ல, அவர் சொல்வதையெல்லாம் கேட்கமுடியாது’ என்றார்.