இந்திய – இலங்கை உறவு பிராந்திய நலனுக்காகவா? மோடி நண்பர்களின் நலனுக்காகவா?

இலங்கை போரின் இறுதிக் காலக்கட்டங்களில் இந்தியாவில் பாஜக ஆட்சிக்கு வந்தால் தங்களுக்கு சாதகமாக நடந்துகொள்ளும் என தீவிரமாக நம்பிக்கொண்டிருந்தனர் விடுதலை புலிகள்.  போர் முடிந்து ஆறு ஆண்டுகளுக்குப் பிறகே பாஜக ஆட்சியில் அமர்ந்திருக்கிறது.  ஆனால், காங்கிரஸ் அரசைக் காட்டிலும் பாஜக அரசு இலங்கையுடன் நெருக்கம் காட்டி வருகிறது. பாஜக அரசு இலங்கை அரசுடன் கைக்கோர்ப்பதற்கான காரணங்கள் ஏராளமாக உண்டு. தேசிய நலன் என்பதைக் காட்டிலும் பாஜக அரசு தன்னுடைய தனிப்பட்ட பலன்களுக்காக இலங்கையுடன் நெருக்கமான உறவைப் பேண நினைக்கிறது.

இலங்கையின் தமிழர் வசிக்கும் பகுதிகளில் ஆர் எஸ் எஸ், போருக்குப் பிறகான சீரமைப்புப் பணிகளில் தன்னார்வ தொண்டு நிறுவனங்களின் பெயரில் ஆழமாக காலூன்றி இருக்கிறது. தமிழ் ஆர்வலராக காட்டிக் கொள்ளும் பாஜக எம்பி தருண் விஜய், இந்துசமய நிகழ்ச்சிகளில் அடிக்கடி கலந்துகொள்கிறார். யாழ்பாண பல்கலையில் இந்து சமய இயக்கங்களின் நிகழ்ச்சிகளில் பங்கெடுத்து வருகிறார். அதுபோல புத்த பல சேனா போன்ற அடிப்படைவாத புத்தமத இயக்கங்களுடன் ஆர் எஸ் எஸ் நெருக்கமான உறவைப் பேணி வருகிறது.

எல்லாவற்றுக்கும் மேலாக போருக்குப் பிறகு, இலங்கையின் தொழிற்துறையில் திறந்துவிடப்பட்டுள்ள வாய்ப்புகளை இந்திய தொழிலதிபர்களுக்குப் பெற்றுத்தருவதில் மோடி அரசு முனைப்பாக இருக்கிறது. இதே கண்ணோட்டத்துடன் தனக்கிருக்கும் வர்த்தக லாபங்களுக்காக இந்தியாவின் உறவை வலிமையாக வைத்துக்கொள்ள விரும்புகிறது இலங்கை அரசு.

கடந்த ஆண்டு, மோடியின் இலங்கை பயணத்தின் போது, “டயர் உற்பத்தி, இருசக்கர, மூன்று சக்கர வாகன உற்பத்திகளில் இந்தியா-இலங்கை கூட்டு வர்த்தகத்தின் மூலம் இலங்கையின் போருக்கு பின்னான பொருளாதாரத்தில் உடனடியான பலனை பெற முடியும்” என்று இலங்கையின் மைய வங்கியின் கவர்னர் சொன்னார்.  இலங்கையுடன் இந்தியாவின் வர்த்தக உறவு மற்ற நாடுகளுடன் ஒப்பிடும்போது முன்னிலையில்தான் இருக்கிறது. இரண்டு நாடுகளுக்கிடையே 2014-ஆம் ஆண்டு  4.6 பில்லியன் டாலர் மதிப்பிலான வர்த்தகம் நடைபெற்றிருக்கிறது. வர்த்தக அளவு ஆண்டுக்கு ஆண்டு அதிகமாகும் என்பதே அரசு மற்றும் வர்த்தக துறையினர் எதிர்பார்ப்பு.

இந்த நிலையில், கடந்த வாரம் பாகிஸ்தான் பிரதமர் நவாஸ் ஷெரீப் மூன்று நாள் பயணமாக இலங்கை சென்றிருந்தார். இலங்கை ராணுவத்துக்கு போர் விமானங்கள் வாங்குவது உள்ளிட்ட பல ஒப்பந்தங்கள் கையெழுத்தாகும் என இலங்கை-பாகிஸ்தான் பத்திரிகைகள் தெரிவித்திருந்தன. ஆனால், அதே சமயத்தில் இந்திய பாகிஸ்தான் எல்லையோர பதன்கோட் பகுதியில் நடந்த தீவிரவாதிகள் தாக்குதல் இந்த ஒப்பந்தங்களில் மாற்றத்தை ஏற்படுத்தியிருக்கிறது.

‘விடுதலை புலிகளுடம் போர் முடிந்துவிட்ட சூழலில் இராணுவ விமானங்கள் வாங்குவதற்கு ஏன் பெரிய தொகையை செலவழிக்க வேண்டும்?’ இந்தியா வாய்மொழியில் கேட்டுக்கொண்டதன் அடிப்படையில் 400மில்லியன் டாலர் மதிப்பிலான ஜெ எஃப் 17 ரக விமானங்கள் வாங்கும் ஒப்பந்தத்தை தற்காலிகமாக இலங்கை ரத்து செய்திருப்பதாக செய்திகள் வெளியாகியிருக்கின்றன.

சீனாவின் தொழிற்நுட்பத்தில் தயாரான இந்த விமானங்கள் பாகிஸ்தானின்  காம்ரா விமான கட்டுமான நிலையத்தில் ஒன்றிணைக்கப்பட்டவை(மேன் இந்தியா போல, மேன் இன் பாகிஸ்தான்). இலங்கையில் பாகிஸ்தான், சீனாவின் மேலாதிக்கத்தை தடுக்கவே இத்தகைய நடவடிக்கைகளில் இறங்கியுள்ளதாகக் கூறுகிறது. சீன-பாகிஸ்தான் மேலாதிக்கத்தை தடுக்கவா அல்லது  அனில் அம்பானி போன்ற இராணுவ தளவாடங்களை உற்பத்தி செய்யும் மோடியின் நண்பர்களின் வர்த்தக நலனுக்காகவா என்பதை பொறுத்திருந்துதான் பார்க்க வேண்டும்!

ராகுல் காந்தி Vs ஆர் எஸ் எஸ்: வலுக்கும் யுத்தம்!

காங்கிரஸ் துணைத்தலைவர் ராகுல் காந்திக்கும் பாரதிய ஜனதா கட்சியின் தாயான ராஷ்டிரிய ஸ்வயம் சேவக் அமைப்புக்கும் மோதல் உச்சக் கட்டத்தை எட்டியுள்ளது. பாஜகவைவிட ஆர் எஸ் எஸ்ஸை கடுமையாக எதிர்க்கிறார் ராகுல் காந்தி. அதுபோல மற்ற எந்த தலைவரைக் காட்டிலும் ராகுல் காந்தியை தொடந்து தாக்கி வருகிறது ஆர் எஸ் எஸ். கொஞ்சம் ஃபிளாஷ் பேக்குக்குப் போவோம்…
கடந்த மக்களவைத் தேர்தலின்போது, மகாராஷ்டிர மாநிலம், தாணே மாவட்டத்தின் சோனாலி என்னும் இடத்தில் நடைபெற்ற தேர்தல் பிரசாரக் கூட்டத்தில் பேசிய ராகுல் காந்தி, “காந்தி ஆர் எஸ் எஸ் காரர்களால் சுட்டுக்கொல்லப்பட்டார். இப்போது ஆர்எஸ்எஸ் காரர்கள் காந்தியைக் கொண்டாடுகிறார்கள்” என்று பேசியிருந்தார். ஆர் எஸ் எஸ் குறித்து  ராகுல் காந்தி வெளிப்படையாக விமர்சனத்துக்கு பிள்ளையார் சுழி போட்டது இந்தப் பேச்சுதான்.
ஆர் எஸ்  எஸ் அமைப்பின் தீவிர ஊழியரான நரேந்திர மோடி பிரதமர் வேட்பாளராக அறிவித்தது எத்தகைய விபரீதத்தை ஏற்படுத்தும் என்று அறிந்து வைத்திருந்ததாலே ராகுல் காந்தி அப்படி பேசியிருக்ககூடும்.  நரேந்திர மோடி பதவியேற்றி ஒவ்வொரு முறையும் பாஜகவினராலும் குறிப்பால ஆர் எஸ் எஸுடன் நெருங்கிய உறவைப் பேணும் அமைச்சர், எம்பிகள்,  எம் எல் ஏக்கல் வெறுப்பு பேச்சு பேசும்போது ராகுல் காந்தி கடுமையாக ஆர் எஸ் எஸை சாடினார்.
மக்களவைத் தேர்தல் நேரத்தில் ராகுல் காந்தி பேசியதற்கு,  தாணே மாவட்ட ஆர்எஸ்எஸ் செயலாளர் ராஜேஷ் குண்டே, பிவாண்டி நடுவர் நீதிமன்றத்தில் ராகுல் காந்தி மீது அவதூறு வழக்குத் தொடர்ந்தியிருக்கிறார்.  அண்மையில் விசாரணைக்கு வந்த இந்த வழக்கில் நீதிபதிகள் ராகுல் காந்தி மன்னிப்பு கோரினால் வழக்கை முடித்துக் கொள்ளலாம் என்ற யோசனையை சொன்னார்கள். ஆனால், ராகுல் காந்தி அதற்கு மறுத்துவிட்டார்.
அதுபோல கடந்துபோன ஜவஹர்லால் நேருவின் பிறந்த நாள் விழாவில் பேசிய ராகுல் காந்தி, “ஆர் எஸ் எஸ்ஸை எதிர்க்கும் மிகப் பெரிய சக்தியாக காங்கிரஸ் இருக்கும். மதச்சார்பின்மை எங்களுடைய மரபணுவில் உள்ளது. அது ஆர் எஸ் எஸ் போன்ற மதவாத அமைப்பை நசுக்கிவிடும்” என்று தெரிவித்தார். இதற்கு பதிலளித்த பாஜக மத்திய அமைச்சர் கிரிராஜ் சிங், “அரசியலில் புதிதாகப் பிறந்த குழந்தையெல்லாம் ஆர் எஸ் எஸ் பற்றி கருத்துச் சொல்லக்கூடாது” என்றார்.
அண்மையில் தொலைக்காட்சி விவாத நிகழ்ச்சி ஒன்றில் பேசிய நிதின் கட்கரி, “ஆர் எஸ் எஸ் தேசப் பக்தர்களின் அமைப்பு. மக்களவைத்தேர்தலுக்குப் பிறகு  காங்கிரஸ் தண்ணீரில் இருந்து தவறி விழுந்த மீனாக நடந்து கொள்கிறது” என்று தெரிவித்தார்.
இதுவரை ‘சாத்வீகமாக’ நடந்துகொண்ட ஆர் எஸ் எஸ், கடந்த வாரம் அஸ்ஸாம் சென்ற ராகுல் காந்தியை கோயிலுக்குள் நுழைய விடாமல் வலுக்கட்டாயமாக தடுத்துள்ளனர். இந்தியாவின் முக்கிய கட்சியின் தலைவர் ஒருவரை கோயிலுக்குள் நுழையவிடாமல் தடுப்பது இந்திய வரலாற்றில் இதுதான் முதல்முறையாக இருக்கும்! இத்தனைக்கும் அஸ்ஸாமில் ஆள்வது காங்கிரஸ் தலைமையிலான அரசு.
மத்தியில் பாஜக ஆட்சியில் இருப்பதால் ஆர் எஸ் எஸ் போன்ற இந்துத்துவ அமைப்புகளுக்கு மாநில அரசின் மீது எவ்வித பயமும் இல்லை. அதன் வெளிப்பாடுதான் இந்த நிகழ்ச்சி என்கிறது காங்கிரஸ். இதுகுறித்து திங்கள் கிழமை நாடாளுமன்றத்துக்கு வெளியே பேசிய ராகுல் காந்தி, “என்னை கோயிலுக்குள் நுழையக் கூடாது என்று சொல்ல இவர்களுக்கு என்ன உரிமை இருக்கிறது?” என வெடித்துத் தள்ளியிருக்கிறார்.
பீகாரில் முன்னெடுத்த மதவாத, வகுப்புவாத அரசியல் பாஜகவுக்கும் ஆர் எஸ் எஸ் போன்ற அமைப்புகளுக்கும் படுதோல்வி தந்துள்ளன. இந்நிலையில் நடிகர் வடிவேலுவின் பாணியில் சொல்வதென்றால் ‘வாண்டட்டா வண்டியில ஏர்றது’ என்பதுபோல இத்தகைய நடவடிக்கைகளால் விரைவில் வரவிருக்கும் அஸ்ஸாம் சட்டப் பேரவைத் தேர்தலில் எதிர்மறை விளைவுகள் ஏற்படும் என்பதை பாஜக-ஆர் எஸ் எஸ் அமைப்பினர் உணர வேண்டும்!

தினச்செய்தி(15-12-2015) நாளிதழில் வெளியான என்னுடைய கட்டுரை.

தலித் குழந்தைகள் எரித்துக் கொலை: ஆணவமா? நாயின் மீது கல்லெறிவது போன்ற நிகழ்வா?

hariyana children

“நாடு முழுவதும் நம்பிக்கை மற்றும் புத்துணர்ச்சி நிலவுகிறது. சிறு சிறு சம்பவங்களால், இந்துக்களின் பண்பாட்டையும், இந்தியாவையும் சிதைத்துவிட முடியாது” என்று ராஷ்டிரிய ஸ்வயம் சேவக் அமைப்பின் 90வது ஆண்டுவிழாவில் பேசியிருக்கிறார் அந்த அமைப்பின் தலைவர் மோகன் பகவத்.

உ.பியில் மாட்டிறைச்சி சாப்பிட்டதாக கொல்லப்பட்ட முகமது அக்லக், ஹரியானா மாநிலம் ஃபாரிதாபாத்தில் சாதியத்தால் எரித்துக்கொல்லப்பட்ட இரண்டு தலித் குழந்தைகள் என சிறுபான்மையினரை பதற்றத்துக்குள்ளாக்கியிருக்கும் சம்பவங்கள் ஆளும் பாஜகவுக்கு வழிகாட்டியாக இருக்கும் ஆர்எஸ்எஸ் அமைப்பின் தலைவருக்கும் சிறு பிரச்சினையாகத் தெரிகின்றன. வளர்ந்துவரும் மதவாத வன்முறைகளுக்கு எதிர்ப்புத் தெரிவித்து கிட்டத்தட்ட 50க்கும் மேற்பட்ட எழுத்தாளர்கள் தங்களுடைய விருதுகளை அங்கீகாரங்களை அரசின் முகத்தில் விட்டெறிந்துகொண்டிருக்கிறார். எழுத்தாளர்களின் இந்தப் போராட்டம் இந்தியாவைத் தாண்டி உலகம் முழுவதும் கவனிக்கப்படுகிறது.

மாட்டிறைச்சி அரசியலுக்கு காஷ்மீரிலும் ஹிமாச்சல் பிரதேசத்திலும் அடுத்தடுத்த உயிர்கள் பலியாகிக் கொண்டிருக்கின்றனர். இந்துக் கடவுளின் உருவத்தை பச்சைக் குத்தியிருந்தார் என்பதற்காக ஆஸ்திரேலியா பயணி, கடுமையான சொற் தாக்குதலுக்கு ஆட்பட்டு, பச்சைக் குத்திக்கொண்டதற்காக காவல் நிலையத்தில் எழுதிக் கொடுத்து மன்னிப்புக் கேட்கிறார். மாட்டிறைச்சி விருந்துகொடுத்தார் என்பதற்காக மக்களால் தேர்ந்தெடுக்கப்பட்ட ஒரு பிரதிநிதி மக்கள் மன்றத்திலேயே அடிக்கப்படுகிறார், பத்திரிகையாளர் மன்றத்தில் வைத்து அவர் மீது மை பூசப்படுகிறது. தொலைக்காட்சி நிகழ்ச்சிகளில் பகிரங்கமாக இந்துத்துவ பயங்கரவாதிகள் எதிர்கருத்து பேசுபவர்களை மிரட்டுகிறார்கள். அடுத்து தாக்கப்படுவது நீங்களாகவும் இருக்கலாம் அல்லது நானாகவும் இருக்கலாம் என்கிற பதற்றத்தை பரவவிட்டு “புத்துணர்ச்சி” நிலவுவதாகச் சொல்வதன் பெயர்தான் பயங்கரவாதம்.

வியாழக்கிழமை நடந்த ஆர்எஸ்எஸ் 90-வது ஆண்டு விழா கூட்டத்தில் மத்திய சாலை மற்றும் கப்பல் போக்குவரத்துத் துறை அமைச்சர் நிதின் கட்கரியும் மகாராஷ்டிர பாஜக முதல்வர் தேவேந்திர ஃபட்னாவிஸும் அந்த அமைப்பின் பிரத்யேக உடையான அரை நிஜார் உடையுடன் கலந்துகொண்டார்கள். பாஜகவுக்கும் ஆர்எஸ்எஸுக்கும் உள்ள உறவு வெளிப்படையானதுதான். ஆர்எஸ்எஸ்ஸின் தீவிர கருத்துக்களை உள்வாங்கி, அதைச் செயல்படுத்தும் பணியில் இருக்கும் பாஜகவினரிடம் இரக்கத்தை எதிர்ப்பார்ப்பது அறியாமையாகிவிடுகிறது.

பாஜகவின் மக்கள் பிரதிநிதிகளாகத் தேர்ந்தெடுக்கப்பட்ட பலரும் மத்தியில் ஆட்சி அமைந்ததிலிருந்து மதவாதத்தை ஊக்குவிக்கும் பேச்சுக்களையும் சிறுபான்மையினருக்கு எதிராக பெரும்பான்மையினரை தூண்டிவிடும் பேச்சுக்களையும் பேசிவருகின்றன. அந்த வகையில் முன்னாள் ராணுவ ஜெனரலும் மத்திய அமைச்சருமான வி.கே.சிங், ஹரியானாவில் ஆதிக்க சாதியினரால் தலித் குழந்தைகள் எரித்துக் கொல்லப்பட்டது குறித்து தன்னுடைய கருத்தைச் சொல்லியிருக்கிறார்.

“நாய் மீது கல்லெறிவது போன்ற சம்பவத்துக்கெல்லாம் அரசாங்கத்தைக் குறை சொல்லலாமா?” என்கிறார். ஹரியானாவில் ஆட்சியில் இருப்பதும் பாஜகதான். இரண்டு பிஞ்சுக் குழந்தைகள் எரிக்கப்பட்டு, துணியால் பொட்டலாமாக சுற்றிக் கிடத்தப்பட்டிருக்கிறார்கள். இதெல்லாம் ஒரு விஷயமா என்றுகூட மத்திய அமைச்சர் சொல்லியிருக்கலாம். ஆனால், அவர் நாய் மீது கல்லெறிவது போன்ற நிகழ்வாக அதைச் சொல்வது ஆணவத்தின் உச்சமன்றி வேறென்ன? அந்தக் குழந்தைகளையும் அவர்களுடைய பெற்றோர்களையும் எரித்த ஆணவ நெருப்புதானே, மத்திய அமைச்சரின் பேச்சிலும் இருக்கிறது?

 

சமாளிக்கும் பாஜக : தூண்டிவிடும் ஆர்எஸ்எஸ்

மதத்தின் பெயரால் நாட்டில் அதிகரித்துவரும் பதற்றமான சூழ்நிலையை அரசுக்கு உணர்த்தும்பொருட்டு கிட்டத்தட்ட 50 எழுத்தாளர்கள் தங்களுடைய விருதுகளை திரும்ப அளித்துக் கொண்டிருக்கிறார்கள். இந்தப் போராட்டத்துக்கு 150 நாடுகளைச் சேர்ந்த எழுத்தாளர்கள் இணைந்திருக்கும் ‘பென்’ அமைப்பு ஆதரவு தெரிவித்துள்ளது. போராட்டத்தின் தீவிரத்தை உணர்ந்த பிரதமர் நரேந்திர மோடி, தாத்ரி படுகொலைக்கும் எழுத்தாளர்கள் மீதான தாக்குதல்களுக்கும் வருத்தம் தெரிவித்தார்.

சமாளிக்கும் பாஜக

ஆனால் பாஜகவினர் விடுவதாகத் தெரியவில்லை. ஹரியாணா மாநில முதல் மனோகர் கத்தார், ‘முஸ்லிம் இந்தியாவில் வாழ வேண்டுமானால் மாட்டிறைச்சி சாப்பிடக்கூடாது’ என்று கூறினார். பீகார் தேர்தலில் பாஜக பின்னடைவைச் சந்திக்க வேண்டியிருக்குமோ என்கிற அச்சத்தில் இருந்த பாஜக தலைமைக்கு இந்தப் பேச்சுக்கள் மீண்டும் தலைவலியாக அமைந்தன.

பாஜக தலைவர் அமித் ஷா, இதைச் சமாளிக்கும் விதமாக, மனோகர் கத்தார், பாஜக எம்பி ஷாக்‌ஷி மகராஜ், மத்திய அமைச்சர் சஞ்சீவ் பல்யான், பாஜக எம் எல் ஏ சங்கீத் சாம் ஆகியோரிடம் மாட்டிறைச்சி தொடர்பாக அவர்கள் பேசிய கருத்துக்கு விளக்கம் அளிக்கும்படி கேட்டிருக்கிறார். மேலும் அவர், பாஜக முன்னெடுக்கும் வளர்ச்சி அரசியலை இந்தப் பேச்சுக்கள் மறைப்பதாக பேசியிருக்கிறார்.

தூண்டிவிடும் ஆர்எஸ்எஸ்

இந்நிலையில் மாட்டிறைச்சி உண்டதாகக் கூறி, உத்திரப் பிரதேச மாநிலம் தாத்ரியில் அடித்துக் கொல்லப்பட்ட முகமது அக்லக்கின் படுகொலையை நியாயப்படுத்தும் வகையில் “பசுவதை செய்வோரைக் கொல்லச் சொல்லி வேதங்கள் ஆணையிட்டுள்ளன” என்று ஆர்எஸ்எஸ் இதழான ‘பாஞ்ச சன்யா’வில் கட்டுரை ஒன்று வெளியாகியிருக்கிறது. இந்த இதழின் ஆசிரியர் ஹிதேஷ் சங்கர் எழுதியிருக்கும் இந்தக் கட்டுரையில், இந்துக்களை முஸ்லிம்களாக மாற்றும் பொருட்டே மாட்டிறைச்சி உண்பது முஸ்லிம்களால் பரப்படுகிறது. இந்தியாவில் உள்ள முஸ்லிம்கள் அனைவரும் மூன்று, நான்கு தலைமுறைக்கு முன் இந்துக்களாக இருந்தவர்கள்தான். மாடுகளை பலியிடுபவர்கள் பாவிகளாக வேதங்களில் சொல்லப்படுகிறார்கள். நியூட்டனின் மூன்றாம் விதி சொல்வதுபோல ஒவ்வொரு வினைக்கும் அதற்குச் சமமான எதிர்வினை உண்டு. அக்லக் கொல்லப்பட்டது இயற்கையான எதிர்வினையால் நடந்தது; அவர் செய்த பாவத்துக்கு பலியாக்கப்பட்டார்” என்று கட்டுரையில் சொல்லப்பட்டிருக்கிறது.

தொடரும் சம்பவங்கள்

மாடுகளை கடத்தியதாகக் கூறி, ஜமீத் அகமது பட் என்ற 24 வயது இளைஞர் பஜ்ரங் தள் என்ற அமைப்பினரால் அடித்துக் கொல்லப்பட்டிருக்கிறார். இந்தச் சம்பவம் காஷ்மீரில் நடந்திருக்கிறது. இதேபோல் ஹிமாச்சல் பிரதேசத்தில் நோமன் என்ற 22 வயது இளைஞரும் மாடுகளைக் கடத்தினார் என்ற குற்றச்சாட்டில் அடித்துக் கொல்லப்பட்டிருக்கிறார்.

மாட்டிறைச்சி அரசியல் வேகமாக ‘வளர்ச்சி’ கண்டு வருவதையே இந்த சம்பவங்கள் உணர்த்துகின்றன. அதே சமயத்தில் மோடி பிம்பமும் வீழ்ச்சியை சந்தித்துக்கொண்டிருக்கிறது என்பதையும் மறுப்பதற்கில்லை.

 

லக்ஷ்மணானந்தா கொலையை துப்பு துலக்கினார் குருசாமி!

kandhamal violence

ஒரிசாவில் இந்துத்துவம் பின்னணி

ஒரிசாவின் கந்தமால் மாவட்டம் இந்துத்துவதீவிரவாதத்திற்கு உதாரணமாகும் சிறப்புத் தகுதி உடையது. காலங்காலமாக சமூகத்தில் ஒடுக்கப்பட்டு வாழும் தலித்துகளும் பழங்குடிகளும் இம்மாவட்ட மக்கள். கிறித்துவ மிஷனரிகள்  தலித்,பழங்குடிகள் மத்தியில் பணியாற்றிவருகிறார்கள். விளைவாக மதமாற்றங்களும் நடைபெற்றுக்கொண்டிருக்கின்றன. பழங்குடிகள் கிறித்துவர்களாக மாறும்போது பழங்குடிகளுக்குண்டான அரசாங்க உரிமைகள் அத்தனையும் கிடைக்கும் என்பதும் தலித்துகள் கிறித்துவர்களாக மாறும் தலித்துகளுக்குரிய உரிமைகள் இல்லை, அதனால் மிஷனரிகள் பிரத்யேக உரிமைகளை தலித்துகளுக்குப் பெற்றுத்தர முயற்சித்தார்கள் என்பதும் இங்கு தலித்பழங்குடிகளிடையே புகைச்சல் ஏற்பட்டதன் பின்னணி. இதை ஆர்.எஸ்.எஸ், விஷ்வ ஹிந்து பரிஷத், பா..க போன்ற இந்துத்துவ சக்திகள் பயன்படுத்திக் கொண்டன. இந்த புகைச்சலை ஊதிப்பெரிதாக்கிள எரிய விட்டு வேடிக்கைப் பார்க்க ஆரம்பித்தன். 1994 முதல் தலித்பழங்குடி மோதல் கிறித்துவர்கள்இந்துக்கள் இடையேயான மோதலாக உருவெடுத்தது. விஷ்வ ஹிந்து பரிஷத்,ஆஸ்ரமங்கள் என்ற பெயரில் கந்தாஸ் பழங்குடி இன மக்களை வன்முறையாளர்களாக இந்துத்துவ ரவடிகளாக மாற்றத் தொடங்கியது. இதில் முக்கியமானவர் லக்ஷ்மாணனந்தா சாமியார் 1960களிலே கர சேவை செய்வதற்காக கந்தமால் மாவட்டத்தில் ஆசிரமம் அமைத்தவர். கிறித்துவத்துக்கு மாறும் தாழ்த்தப்பட்ட மக்களுக்கு எதிராக பழங்குடி மக்களை இந்துத்துவ விஷத்தை ஊட்டி ஏவி விட்டுக்கொண்டிருந்தவர். கிறித்துவதுக்கு மதம் மாறிய தாழ்த்தப்பட்ட மற்றும் பழங்குடி மக்களை தாய்மதத்திற்கு திருப்புவதுதான் பல பத்தாண்டுகளாக இவர் செய்து வந்த குறிப்பிடத்தகுந்த மற்றொரு வேலை!

 

கிறிஸ்துமசுக்கு முன் தினமான டிசம்பர் 24, 2007ல் சதாரணமாக இருதரப்பினருக்கிடையே ஆரம்பித்த வாய்ச்சண்டை கிறித்துவ தலித்துகளுக்கு எதிராக பெரும் கலவரமாக வெடித்தன் பின்னணியில் லக்ஷ்மணானந்தா சாமியார் இருந்ததாக கைகாட்டுகிறார்கள். சர்ச்சுகளுக்கு முன்பு தலித் கிறித்துவர்கள் உயிரேடு கொலுத்தப்பட்டது, கிராமம் கிராமமாக கிறித்துவர்களின் வீடுகள்,இருந்த சுவடே தெரியாமல் அடித்து நொறுக்கப்பட்டது, குழந்தை,பெண்கள் உள்பட பல கிறித்துவர்கள் தேடிக் கொல்லப்பட்டது என வன்முறைகள் இந்துத்துவதீவிரவாதிகளால் திட்டமிட்டு கட்டவிழ்க்கப்பட்டன. (தலையில் காவித்துணி கட்டி, இரண்டு கைகளும் வாள் ஏந்தி விண்ணை அதிரவைக்கும்படி கூவிக்கொண்டு வன்முறையை காட்டிய ஒரு காவித்தொண்டரின் புகைப்படம் அத்தனை நாளிதழ்களின் முதல் பக்கத்தில் வந்தது நினைவிருக்கலாம்!) பா..க ஆதரவோடு ஆட்சியை அலங்கரித்துக்கொண்டிருந்த நவீன் பட்நாயக் அரசு வன்முறையை தடுத்து நிறுத்தும் நோக்கில் எதுவும் செய்யவில்லை, கைகட்டி வேடிக்கைப் பார்த்தது. அந்த தாக்குதலின் போது சேதமான வீடுகள்கூட இன்னும் அங்கே சீரமைக்கப்படவில்லை.

 லக்ஷ்மணானந்தா கொலையை துப்பு துலக்கினார் குருசாமி!

கடந்த வாரம் என்னுடைய தோழியை சந்திப்பதற்காக எத்திராஜ் கல்லூரிக்குச் சென்றிருந்தேன். தோழியை பார்க்க நேரமெடுத்ததில் எதிரே இருந்த ஷாப்பிங் காம்ளக்ஸ்சுக்குள் நுழைந்து பராக்கு பார்த்துக்கொண்டிருந்தபோதுதான் அந்த அடுக்கி வைக்கப்பட்டிருந்த ஜெராக்ஸ் காப்பிகள் கண்ணில் பட்டன. ‘லக்ஷ்மணானந்த படுகொலை யார் கொலையாளி?’ தலைப்பில் எஸ்.குருமூர்த்தி துக்ளத் பத்திரிகையில் எழுதிய கட்டுரையின் நகல்கள் அவை. அந்தக்கடைக்காரர் காவித்தொண்டர் போலும் இலவச விநியோகம் செய்துகொண்டிருந்தார்.

ஆகஸ்ட் 2008ல் லக்ஷ்மணானந்தா என்ற விஷ்வ ஹிந்து பரிஷத் சாமியார் சுட்டுக்கொலை செய்யப்பட்டதை ஆராய்ந்து எழுதியிருக்கிறார் குருசாமி. கட்டுரையின் சாரம் லக்ஷ்மணானந்தா, ஒரிசாவில் ஆற்றிய தொண்டுகள், அப்பாவியான அவரை கிறித்துவ தீவிரவாத அமைப்புகளும் மாவோயிஸ்டுகளும் சேர்ந்து தீர்த்துக்கட்டினர் என்பதே. அவர் துணைக்கு அழைத்திருந்தது ஒரிசா முன்னாள் டி.ஜி.பி. அசோக் சாகு என்பவரை.

” ‘இந்த(கந்தமால்) தாக்குதலில் ஈடுபட்டவர்கள் எல்லோரும் புதிதாக மதம்மாறிய கிறிஸ்தவர்கள்என்று ஒரிஸ்ஸாவின் முன்னாள் கூடுதல் டி.ஜி.பி. அசோக் சாகு என்பவர் தன்னுடைய கட்டுரையில் எழுதியிருக்கிறார்என்று தன் கட்டுரையில் குறிப்பிட்டு..

“மலைவாழ் மக்களிடையே நடக்கும் மத மாற்றங்கள் நாகாலாந்து, மிசோரம், மேகாலயா, திரிபுரா போன்ற மாநிலங்களில் கிறித்துவ தீவிரவாதமாகவும் பயங்கரவாதமாகவும் மாறி பிரிவினை சக்திகளை தூண்டி விட்டிருக்கிறது என்கிறார் அசோக் சாகுஎன்று தன்னுடைய துப்பு துலக்கலுக்கு ஆதாரம் காட்டுகிறார் குருசாமி. வடகிழக்கு மாநிலங்களில் தீவிரவாதம் தழைக்க நிதர்சனமான காரணங்களான அரசாங்க புறக்கணிப்பும் தொடரும் வறுமையும் வேலையின்மையும் வசதியாக மூடி மறைக்கப்பட்டு, கிறித்துவர்களாக மாறியதே காரணமென கண்டுபிடித்துச் சொல்கிறது காவிப்படை. அந்த காரணத்தை ஒரிசாவுக்கும் பொறுத்தப்பார்க்கிறது. இந்த காரணத்தை கண்டுபிடித்தமைக்காக குருசாமி சிபாரிசு செய்தாரோ என்னவோ.. அதே அசோக் சாகுதான், கந்தமால் தொகுதி பா... வேட்பாளர்.

 

 

sadhu violence

வேட்பாளரைக் காணவில்லை!

இந்துத்துவ தீவிரவாதிகளுக்கு பா..கவில் தனித்த இடம் உண்டு. நான்கு சிறுபான்மையினரை வெட்டிக்கொன்றால் அல்லது 40 சிறுபான்மையினர் வீடுகள் நாசமா போகக்காரணமாக இருந்தால் இந்தா புடி எம்.பி சீட்டு என்று வெளியே சொல்லப்படாத சட்டம் இருக்கும்போல. போன மாதம்தான் குஜராத் கலவரத்தில் தேடப்பட்டு வந்த மோடி அமைச்சரவையின் உயர் கல்வித்துறை அமைச்சர் போலீசில் சரணடைந்தார். இப்போது கந்தமால் தொகுதி வேட்பாளர் அசோக் சாகுவைத் தேடுகிறது மாநில போலீஸ். எம்.பி ஆகி அமைச்சர் ஆவதற்குள் விதி விளையாடிவிட்டது. முன்னாள் விஷ்வ ஹிந்து தொண்டரும் ஐபிஎஸ் படித்தவருமான அசோக் சாகு, ஒரிசாவின் குருசாமி! தேடித்தேடி கிறித்துவபயங்கரவாதம், ‘முஸ்லிம்தீவிரவாதம் என்றெல்லாம் கட்டுரை எழுதுவார். (சங்க் பரிவார் இணைய தளத்தில் இவருடைய கட்டுரைகள் படிக்கக் கிடைக்கும்) எழுதுவதோடு, காவித்தொண்டாற்றுவதோடு நிறுத்திக்கொண்டிருக்கலாம். எம்.பி.சீட்டுக்கு ஆசைப்பட்டு தேர்தல் களத்தில் இறங்கிவிட்டார். போதாத காலம்தேர்தல் பிரச்சாரக் கூட்டத்தில் இவர் பேசிய எழுச்சியூட்டும் பேச்சு‘(‘லக்ஷ்மணானந்தா சாமிகளை கொன்றது யார்? கொலை செய்தவனுக்குத் தெரியுமா இதற்கு பயங்கரமான பின்விளைவுகள் ஏற்படும் என்று?’) தேர்தல் ஆணைய விதிகளின்படி சர்ச்சைக்குரிய பேச்சாகிவிட்டது. மூன்று பிரிவுகளில் வழக்குப்பதிவு செய்து கைது செய்ய காவல்துறை காத்திருக்க அப்ஸ்கான்ட் ஆகிவிட்டார் அசோக் சாகு!

இப்படிப்பட்ட மதிப்பிற்குரியவர் எழுதிய கட்டுரைகளைத் தோண்டித்துருவி ஆராய்ந்து கந்தமால் மக்களின் ரட்சகர்களாக காவித்தொண்டர்களை முன்னிறுத்த கட்டுரை எழுதியிருக்கிறார் குருசாமி. அப்பட்டமான மத படுகொலைகளுக்குப் பின்னணியில் இருக்கும் உண்மையை மூடிமறைக்கப் பார்க்கிறது காவித்துணி. இப்போதைக்கு அது கிழிந்து தொங்கிக்கொண்டிருக்கிறது!