சோட்டா ராஜனுக்கு உதவிய புலனாய்வுத் துறை

chota-rajan

ஆள் கடத்தல், ஆயுத கடத்தல், போதைப் பொருள் விற்பனை, வட்டித்தொழில் என அத்தனை கிரிமினல்தனங்களும் செய்து வந்த சோட்டா ராஜன் மிகப் ‘புகழ்’ பெற்றது காண்ட்ராக்ட் கில்லிங் எனப்படும் கொலைத் தொழிலுக்காகத்தான்! கிட்டத்தட்ட 20 ஆண்டுகள் ஓட்டத்துக்குப் பின் இப்போது ‘ஓய்வெ’டுக்க இந்தியா அழைத்து வரப்பட்டிருக்கிறார் என்கின்றன புலனாய்வுத் துறை வட்டாரங்கள்.

புலனாய்வுத் துறை வட்டாரங்களில் இருந்து இன்னொரு செய்தியும் வெளிவந்திருக்கிறது. மும்பை குண்டுவெடிப்புக்குப் பிறகு ‘நாட்டுப்பற்று’ காரணமாக தாவூத் இப்ராஹிமை பிடிக்க இந்திய புலனாய்வுத் துறைக்கு சோட்டா ராஜன் உதவியதாகவும் அதன் பேரிலேயே சோட்டா ராஜனை தாவூத்தின் கொலை விரட்டல்களிலிருந்து காப்பாற்ற இந்திய புலனாய்வுத் துறையே அதற்கான ஏற்பாடுகளைச் செய்ததாகவும் தற்போது செய்திகள் வெளிவந்துள்ளன.

ஆஸ்திரேலியாவின் சிட்னி நகரின் புறநகர் பகுதி ஒன்றில் வசித்துவந்த சோட்டா ராஜனை விரட்டிப் பிடித்த தாவூத்தின் ஆட்கள் அவரைக் கொல்ல பல முறை முயன்றதாகவும் அதிலிருந்து தப்பிக்க இந்தோனேஷியாவின் பாலிக்கு வந்து கைதாகியிருப்பதாகவும் சொல்லப்படுகிறது. இவை அத்தனையும் இந்திய புலனாய்வுத் துறை ஆலோசகர் அஜித் நோவலின் கட்டளைப்படி நடந்ததாகவும் இந்தியன் எக்ஸ்பிரஸ் நாளிதழ் செய்தி வெளியிட்டுள்ளது.

இந்திய புலனாய்வுத் துறை சோட்டா ராஜனுக்கு உதவியதற்கான ஆதாரங்கள்..

* வெளிநாட்டில் வசிக்கும் ஒருவர் இந்திய தூதரகத்தில் பாஸ்போர்ட் பெற வேண்டுமானால் கடுமையான விதிமுறைகளை பின்பற்றியாக வேண்டும். ஆனால் சோட்டா ராஜனுக்கு அப்படி எந்த விதிமுறைகளும் இல்லாமலேயே பாஸ்போர்ட் வழங்கப்பட்டுள்ளது.

* 2008-ஆம் ஆண்டு ஜூலை 8-ஆம் தேதி சிட்னியில் உள்ள இந்திய தூதரகம் சோட்டா ராஜனுக்கு மோகன் குமார் என்ற பெயரில் பாஸ்போர்ட் வழங்கியிருக்கிறது.

* இந்தியாவின் தேடப்படும் முக்கிய நபராக உள்ள ஒருவருக்கு எளிதாக பாஸ்போர்ட் கிடைத்திருப்பது ஆச்சரியத்துக்குரியது.

* அக்டோபர் 12-ந் தேதி பாலிக்கு சோட்டா ராஜன் வரும்போது கைது செய்ய வேண்டும் என்பதை இந்தோனேஷியா அரசுக்கு தெரிவித்திருக்கிறது இந்திய புலனாய்வுத் துறை. இதன் மூலம் இது திட்டமிடப்பட்ட கைது என்று நிரூபணமாகியுள்ளது.

சோட்டா ராஜனை வைத்து தாவூத்துக்கு வலைவீச்சு

சோட்டா ராஜனை கைது செய்திருப்பதன் மூலம் தாவூத்தை பிடித்துவிடலாம் என்கிற கருத்தைச் சொல்லிக் கொண்டிருக்கிறது மத்திய அரசு. தாவூத்திடமிருந்து ஓடி தப்பித்துக்கொண்டிருக்கு சோட்டா ராஜனால் எப்படி தாவூத்தை பிடிக்க உதவு முடியும் என்கிற அடிப்படை கேள்வி எழுகிறது.

ஓடி ஓய்ந்த சோட்டா ராஜன்

சோட்டா ராஜனுக்கு சர்க்கரை வியாதியும் சிறுநீரகத்தில் பிரச்சினையும் உள்ளது. சிறுநீரகப் பிரச்சினையால் டயாலிசிஸ் செய்தால் மட்டுமே உயிர் பிழைக்க முடியும் என்கிற நிலைமை. இந்நிலையில் விடாமல் துரத்திக்கொண்டிருந்த தாவூத்தின் பிடியில் இருந்து தப்பித்து பாதுகாப்பான இடத்தில் இருக்க விரும்பினார் சோட்டா ராஜன். அதன் அடிப்படையிலே இந்திய புலனாய்வுத் துறையும் மத்திய அரசும் சோட்டா ராஜனுக்கு ‘உதவி’யிருக்கின்றன.

மங்களூருவில் விரிந்த சோட்டா ராஜனின் ராஜ்ஜியம்

தாவூத்தின் துரத்தல்களுக்குப் பயந்து வெளிநாடுகளுக்குப் பறந்தாலும் சோட்டா ராஜன் தன்னுடைய சாம்ராஜ்யத்தை கர்நாடகத்தின் கடலோர மாவட்டங்களில் விரிவுபடுத்தியிருக்கிறார். 90களுக்குப் பிறகு ரியல் எஸ்டேட் தொழில் வேகமாக வளர்ச்சியடைந்ததைப் பயன்படுத்தி மங்களூரு போன்ற கர்நாடக கடலோரப் பகுதிகளில் தன்னுடைய ‘தொழில்’களை செய்ய ஆட்களை நியமித்திருக்கிறார் சோட்டா ராஜன். தன்னுடைய ஆட்கள் மூலம் தாவூத்தின் போதைப் பொருள் கடத்தல் தொழிலை முடக்கியதாகவும் தற்போது செய்தி வெளியாகியிருக்கிறது.

 

சோட்டா ராஜன்,சிவ சேனா,பாஜக

Untitled

இந்தியாவால் 20 ஆண்டுகளுக்கும் மேலாக தேடப்பட்டு வந்த மும்பை நிழல் உலக தாதா சோட்டா ராஜன், இந்தோனேசியா நாட்டின் பாலித் தீவில் ஞாயிற்றுக்கிழமை கைது செய்யப்பட்டிருக்கிறார். ஆள் கடத்தல், ஆயுத கடத்தல், போதைப் பொருள் விற்பனை, வட்டித்தொழில் என அத்தனை கிரிமினல்தனங்களும் செய்து வந்த இவர் மிகப் ‘புகழ்’ பெற்றது காண்ட்ராக்ட் கில்லிங் எனப்படும் கொலைத் தொழிலுக்காகத்தான்! மும்பை பாலிவுட் சினிமாக்களுக்கு ஃபைனான்ஸ் செய்ததால் பாலிவுட்காரர்கள் இவரின் கதையை படங்களாக எடுத்தார்கள். ராம்கோபால் வர்மாவின் இயக்கத்தில் 2002-ஆம் ஆண்டு வெளிவந்த ‘கம்பெனி’ இவருடைய கதையை தழுவியது.

ரவுடிகளை, கொலைக்காரர்களை ஹீரோவாக்கும் சினிமாக்காரர்கள், அவர்கள் செய்த குற்றங்களுக்கு நியாயம் கற்பிக்கும்வகையில் காரணம் தேடிக்கொண்டிருப்பார்கள். நிஜ வாழ்வில் எல்லா குற்றங்களுக்கும் காரணம் இருப்பதில்லை. சோட்டா ராஜனின் வாழ்க்கையை எடுத்துக்கொண்டால், அவர் தொடர் குற்றங்களில் ஈடுபடுவதற்கு எவ்வித காரணகாரியமில்லை என்பது தெரியவரும். சோட்டா ராஜன் எப்படி கிரிமினல் ஆனார்?

ராஜேந்திர சதாசிவ நிகல்ஜி என்ற சோட்டா ராஜன், மும்பை செம்பூர், திலக் நகர் பகுதியில் மராத்தி குடும்பத்தில் பிறந்து, வளர்ந்தவர். 80களில் சினிமா தியேட்டர்களில் பிளாக் டிக்கெட் விற்பதிலிருந்து தன்னுடைய ‘தொழிலை’ ஆரம்பித்தார் சோட்டா ராஜன். பிறகு படிப்படியாக பிக்பாக்கெட் அடிப்பது, கள்ளச்சாராயம் விற்பது என முன்னேறினார். படா ராஜன் என்ற பிரபல தாதாவிடம் கிரிமினல்தனங்கள் குறித்து பாடம் படிக்கிறார் ராஜன். படா ராஜன் தாதாக்களுக்கிடையேயான யுத்தத்தில் கொல்லப்படவே, ராஜன் ‘சோட்டா’ ராஜனாக முடிசூட்டிக்கொள்கிறார்.

சோட்டா ராஜனுடன், பின்னாளில் புகழ்பெற்ற மேலும் இரண்டு தாதாக்களான தாவூத் இப்ராஹுமும் அருண் கவுலியும் சேர்ந்துகொள்கிறார்கள், காண்ட்ராக்ட் கொலைகளில் முத்திரை பதிக்கிறார்கள். போதைப் பொருள் கடத்தல் டீல் தொடர்பாக கவுலியின் தம்பி கொல்லப்படுகிறார். பிறகு, இந்த மூவர் கூட்டணி உடைகிறது. சோட்டா ராஜன், துபைக்குச் சென்றுவிடுகிறார். இதன் பிறகும் தாவூத்-ராஜன் நட்பு தொடர்கிறது. 1993-ஆம் ஆண்டு நடந்த மும்பை குண்டு வெடிப்பு தொடர்பாக இருவருக்கும் பிரச்சினை ஏற்பட்டு பிரிந்ததாகச் சொல்லப்படுகிறது.

இதனால், தாவூத் இப்ராஹிமுக்கும் அவருக்கும் மோதல் வெடித்தது. இருவரது ஆதரவாளர்களும் பரஸ்பரம் ஒருவரையொருவர் கொலை செய்யத் தொடங்கினர். இதையடுத்து, சோட்டா ராஜனைக் கைது செய்யும் முயற்சியில் மும்பை காவல் துறை இறங்கவே, இந்தியாவில் இருந்து நிரந்தரமாக வெளியேறி அவர் தலைமறைவானார்.

2000-ஆம் ஆண்டு பாங்காக்கில் ஒரு ஹோட்டலில் தங்கியிருந்த சோட்ட ராஜனை கொல்லும் முயற்சியில், தாவூத் அனுப்பிய சோட்டா ஷகில் ஈடுபட்டதும், அந்தத் தாக்குதலில் இருந்து சோட்டா ராஜன் தப்பியதும் பரபரப்பாகப் பேசப்பட்டது.

பல கிரிமினல் வழக்குகளுக்காக சோட்டா ராஜன் இந்தியாவால் தேடப்படும் நபராக இன்டர்போல் அமைப்பால் “ரெட் கார்னர்’ நோட்டீஸ் பிறப்பிக்கப்பட்டவர். 20 ஆண்டுகளுக்கும் மேலாக தேடப்பட்டு வந்த சோட்டா ராஜன், மோகன் குமார் என்ற போலி பெயரில் சிட்னியில் இருந்து பாலித் தீவுக்கு வந்தபோது இண்டர்போல் போலீசிடம் பிடிபட்டார்.

இந்தோனேசியாவில் சோட்டா ராஜன் கைது செய்யப்பட்டதை மத்திய உள்துறை அமைச்சர் ராஜ்நாத் சிங்கும், சிபிஐ இயக்குநர் அனில் சின்ஹாவும் உறுதிப்படுத்தியிருக்கிறார்கள். இந்நிலையில், பல ஆண்டுகளாக சோட்டா ராஜனின் நடவடிக்கைகளை கண்காணித்து வருவதாக சொல்லியிருக்கும் சிபிஐ, இந்தச் சமயத்தில் சோட்டா ராஜனை கைது செய்திருப்பதற்குக் காரணம் இருக்கிறது. பாஜக தலைவர் சுப்ரமணியன் சாமி ட்விட்டரில் பகிரங்கமாக மத்திய அமைச்சர் வி.கே.சிங், சோட்டா ராஜனுடன் பேசினார் என்று குறிப்பிடுகிறார்.

swam tweets

சமீபத்தில் மகாராஷ்டிராவில் ஆளும் பாஜகவுக்கு நெருக்கடி தரும் சிவ சேனைக்கு பதிலடி கொடுக்கத்தான் சோட்டா ராஜனின் கைது நடவடிக்கை. சோட்டா ராஜனுக்கும் சிவ சேனைக்கும் உள்ள தொடர்பு ஊரறிந்த ரகசியம்!