பெண் வணங்கியதால் கோயிலுக்குத் தீட்டு ஏற்பட்டு விட்டதாம்!

shani

அண்மையில் ஐயப்பன் கோயிலுக்கு பெண்கள் அனுமதிக்கப்படுவது குறித்த கேள்விக்கு பதிலளித்த கோயில் நிர்வாகி, பெண்கள் மாதவிலக்கானதை கண்டறியும் எந்திரம் கண்டுபிடிக்கப்பட்டபின் அது நிறைவேறும் என்றார். இந்த விவகாரம் நாடு முழுவது பெண்கள் மத்தியில் கண்டனத்துக்கு உள்ளானது.

இந்நிலையில் மகாராஷ்டிர மாநிலம், அகமத் நகர் மாவட்டத்தில் உள்ள, சனி கோயிலில் பெண் ஒருவர் கடவுளை தொட்டு பூஜை செய்ததால் தீட்டுப் பட்டுவிட்டதாகக் கூறி, அந்த கற்சிலைக்கு சிறப்பு பூஜை செய்தனர்.

நூறாண்டுகளாக தடை

கடந்த நூறு ஆண்டுகளாக இந்தக் கோயிலில் பெண்கள் வழிபடுவது தடை செய்யப்பட்டிருக்கிறது. இந்நிலையில் சனிக்கிழமை மதிய நேரத்தில் இந்தக் கோயிலுக்கு வந்த பெண் ஒருவர், கற்சிலைக்கு பூஜை செய்தாராம். ஒரு சில நொடிகள் கோயில் நிர்வாகம் கவனக் குறைவாக இருந்ததால் இந்தத் தவறு நேர்ந்துவிட்டதாகவும், பிறகு அந்தப் பெண்ணை அழைத்து கண்டித்து அனுப்பிவிட்டதாகவும் கோயில் நிர்வாகி சாயாராம் பங்கர் தெரிவித்திருக்கிறார். இந்தச் சம்பவத்துக்கு காரணமானதாக இவர் உள்பட, ஏழு கோயில் ஊழியர்கள் இடைநீக்கம் செய்யப்பட்டிருக்கிறார்கள்.

தீட்டு கழிக்கப்பட்டது!

பெண் வணங்கியதால், கற்சிலைக்குத் தீட்டுப் பட்டுவிட்டதாகக் கூறி, பால் மற்றும் எண்ணெய் கொண்டு அபிஷேகம் செய்யப்பட்டது. மகாராஷ்டிரா ஷிரடி சாய்பாபா கோயிலுக்குச் செல்லும் பக்தர்கள் இந்த சனி கோயிலுக்கும் சென்று வழிபடுவது வழக்கம்.

மறுக்கப்படும் பெண்களின் வழிபாட்டு உரிமை

இந்தக் கோயில் மட்டுமல்லாது மகாராஷ்டிராவில் உள்ள பல கோயில்களில் பெண்கள் வழிபாடு செய்வதற்கு தடை உள்ளது. இந்துக் கோயில்களின் வழிமுறையை ஒட்டி சில தர்காக்களில் பெண்கள் மாதவிலக்கான நாட்களில் வருவதும் தடை செய்யப்பட்டுள்ளதாக இந்து ஆங்கில நாளேடு வெளியிட்டுள்ள செய்திக் கட்டுரையில் தெரிவிக்கப்பட்டுள்ளது.

நரேந்திர தபோல்கரின் போராட்டம்

இந்து சனாதன அமைப்பினரால் சுட்டுக்கொல்லப்பட்ட பகுத்தறிவாளர் நரேந்திர தபோல்கர், சனிக் கோயில் உள்பட மகாராஷ்டிராவில் உள்ள பல கோயில்களில் பெண்களுக்கு மறுக்கப்படும் வழிபாட்டு உரிமைக்காகப் போராடினார். பல முறை பெண்களை அழைத்துக் கொண்டு கோயில் நுழையும் போராட்டம் நடத்தி கைதானார் என்பதும் குறிப்பிடத் தகுந்தது. ‘மகாரஷ்டிர அந்தஸ்ரத்தா நிர்மூலன் சமிதி’ என்ற தன்னுடைய அமைப்பின் மூலம், 2000 வருடங்களாக பெண்களுக்கு வழிபடும் உரிமை மறுக்கப்பட்ட மகாலஷ்மி கோயிலில் 2011-ஆம் ஆண்டு வழிபடும் உரிமைப் பெற்றுத்தந்தவர் தபோல்கர். இந்தக் கோயிலில் பெண்கள் வழிபாடு நடத்த அனுமதிக்க வேண்டும் என்று தபோல்கர் தொடர்ந்த நீதிமன்ற வழக்கு தீர்ப்பு நோக்கி இருக்கிறது.

 

Advertisements

’இந்தியாவில் கருத்து சுதந்திரத்தை காப்பாற்றுங்கள்’ பிரிட்டன் பிரதமருக்கு உலக எழுத்தாளர்கள் கோரிக்கை

மூன்று நாள் பயணமாக பிரிட்டன் சென்றுள்ளார் இந்திய பிரதமர் நரேந்திர மோடி. இந்திய பிரதமராக பதவியேற்றப் பின் கிட்டத்தட்ட 25 நாடுகளுக்கு மேலாகச் சென்றிருக்கும் மோடிக்கு முன்னெப்போதும் இல்லாத வகையில் பிரிட்டன் பயணம் பல சர்ச்சைகளைக் கிளப்பியிருக்கிறது.

முதன்மையான காரணம் சமீப மாதமாக நடந்துவரும் எழுத்தாளர்களின் விருதைத் திரும்ப அளிக்கும் போராட்டமும், அதையொட்டி மற்ற துறை வல்லுநர்களும் தங்களுடைய எதிர்ப்பைத் தெரிவித்து விருதைத் துறந்து போராட்டத்தில் இணைத்துக் கொண்டதுமாகும்.

கருத்துச் சுதந்திரத்தின் மீதான தாக்குதலைக் கண்டித்து எழுத்தாளர்களின் குரல்களுக்கு ஆதரவு தெரிவித்திருந்தது எழுத்தாளர்களுக்கான சர்வதேச ‘பென்’ அமைப்பு. தற்சமயம் பிரிட்டன் சென்றிருக்கும் மோடியிடம் ‘இந்தியாவின் கருத்துச் சுதந்திரத்தை காப்பாற்ற’ பிரிட்டன் பிரதமர் டேவிட் கேமரூன் வலியுறுத்த வேண்டும் என்று அவருக்கு கடிதம் ஒன்றை எழுதியிருக்கிறது.

“எழுத்தாளர்களுக்கான அமைப்பு என்கிற வகையில் உலகில் கருத்துச் சுதந்திரத்துக்கு எதிரான செயல்பாடுகளை நாங்கள் கண்டிக்கிறோம். அந்த வகையில் இந்தியாவில் அதிகரித்துவரும் மாற்றுக்குரல்களுக்கு எதிரான வன்முறைகள், பழமைவாதங்கள் மீது விமர்சனம் வைக்கும் பகுத்தறிவாளர்களின் கொலைகள், மதவாத செயல்பாடுகள் கண்டிக்கத்தக்கவை” என்று கூறியிருக்கும் பென் எழுத்தாளர்களின் கூட்டறிக்கை,

“மூன்று நாள் பயணமாக பிரிட்டன் வந்திருக்கும் இந்திய பிரதமரிடம் நீங்கள்(டேவிட் கேமரூன்)இந்தியாவில் கருத்துச் சுதந்திரம் காப்பாற்றப்பட வேண்டும் என்பதை வலியுறுத்த வேண்டும். அதோடு அவருடைய நாட்டில் கருத்துச் சுதந்திரம் எந்த வகையில் மதிக்கப்படுகிறது என்பது குறித்து நீங்கள் உறுதி செய்துகொள்ள வேண்டும். இந்திய அரசியலமைப்புச் சட்டம் கொடுத்திருக்கும் கருத்துச் சுதந்திரத்தை பாதுகாக்கும்படி அவரிடம் நீங்கள் சொல்லவேண்டும்” என்று கேட்டுக் கொண்டுள்ளது. இந்த கூட்டறிக்கையில் பிரபல எழுத்தாளர்கள் சல்மான் ருஷ்டி,நீல் முகர்ஜி, மேகி கிப்சன் உள்பட 200 எழுத்தாளர்கள் கையெழுத்திட்டுள்ளனர்.

இந்த கடிதத்தில் எம்.எம்.கல்புர்கி, கோவிந்த் பன்சாரே, நரேந்திர தபோல்கர் போன்றோர் சுட்டுக்கொல்லப்பட்ட சம்பவம். அதைக் கண்டித்து எழுத்தாளர்களின் போராட்டம் போன்றவை விவரிக்கப்பட்டுள்ளன. புத்தக வெளியீட்டில் மைவீச்சு, பாகிஸ்தான் பாடகரின் நிகழ்ச்சிக்கு வந்த மிரட்டல் போன்ற சம்பவங்களும் குறிப்பிடப்பட்டுள்ளன.

“மனித உரிமையை நிலைநாட்டுவதில் குறிக்கோளுடன் செயல்படும் பிரிட்டன், இந்திய பிரதமரிடன் மேலே சொன்ன விஷயங்கள் குறித்து பேச வேண்டும். எழுத்தாளர்கள், விமர்சகர்கள், கலைஞர்களுக்கு பாதுகாப்பை உறுதிப்படுத்தி கருத்து சுதந்திரத்தை பேணிக் காக்க சொல்லுங்கள். இவை இன்றி அமைதியான சமூகம் சாத்தியமாகாது” என்று எழுத்தாளர்கள் கோரிக்கை வைத்துள்ளனர்.