மத போதகருக்கு மொட்டையடித்து, கழுதையில் ஏற்றி ஊர்வலம்: கிறித்துவர்களை குறிவைக்கும் இந்துத்துவ அமைப்புகள்!

ஒடிசா மாநிலம் கந்தமால் பகுதியில் 2008-ஆம் ஆண்டு கிறித்துவர்களின் மதமாற்றத்தை தடுப்பதாகக் கூறி விஷ்வ ஹிந்து பரிஷத் தூண்டிவிட்ட கலவரம் மறக்கக் கூடியதல்ல.  இந்தக் கலவரத்தில் 60 பேர் கொல்லப்பட்டதும் 50 ஆயிரம் மக்கள் தங்கள் உடைமைகளை இழந்து அகதிகளானதும் நடந்தது.  அப்போது ஆட்சியில் இருந்த காங்கிரஸ் தலைமையிலான அரசின் பிரதமர் மன்மோகன் சிங், ‘நாட்டின் அவமானம்’ என்று இதை சொல்லியிருந்தார்.

இந்து மதத்தின் தனித்துவத்தை காப்பாற்றும் பொருட்டு, பழங்குடி மக்கள் கிறித்துவ மதத்துக்கு தாவுவதை தடுக்கும் வகையில் கலவரங்கள் தூண்டிவிடப்பட்டன. விஷ்வ ஹிந்து பரிஷத் அமைப்பின் சாமியார்கள் இதை முன்னின்று நடத்தினர். இந்த சம்பவங்களுக்கெல்லாம் முன்னோடியாக 1999-ஆம் ஆண்டு ஆஸ்திரேலியாவைச் சேர்ந்த பாதிரியார் கிரஹாம் ஸ்டெயின்ஸ் தன்னுடைய இருமகன்களுடன் ஜீப்பில் உறங்கிக் கொண்டிருந்தபோது எரித்துக் கொல்லப்பட்டார். இதைச் செய்தது விஷ்வ ஹிந்து பரிஷத்தைச் சேர்ந்த தாராசிங் என்பவர்.

இந்தச் சம்பவங்களை நினைவுபடுத்தும் வகையில் உத்தர பிரதேசத்தில், வெள்ளிக்கிழமை கிறித்துவ போதகர் ஒருவர் மிகக் கடுமையான முறையில் அவமானப்படுத்தப்பட்டிருக்கிறார். பாதி மழித்த மீசை, பாதி மழித்த தலைமுடி, புருவ முடியும்கூட பாதி மழிக்கப்பட்டநிலையில், செருப்பு மாலைகள் அணிவிக்கப்பட்டு கழுதையில் ஏற்றப்பட்டு ஊர்வலமாக அழைத்து வரப்பட்டிருக்கிறார். இவரை இப்படி ஊர்வலமாக பஜ்ரங் தள் அமைப்பைச் சேர்ந்த 200க்கும் மேற்பட்ட ஆட்கள் அழைத்துச் சென்றனர்.
பஜ்ரங் தள் அமைப்பினர் போதகர் மேல் குற்றச்சாட்டு, மூன்று இந்துக்களை ஏமாற்றி கிறித்துவர்களாக மதம் மாற்றி அவர்களை மாட்டிறைச்சி உண்ண வைத்தார் என்பதே. மாட்டிறைச்சியை வேண்டுமென்றே உண்ண வைத்தார் என்று இவர்கள் அழுத்தம் சேர்த்துக் கொள்கின்றனர்.

தனக்கு விருப்பமான மதத்தை பின்பற்றவும் அதைப் பற்றி போதனை செய்யவும் இந்திய அரசியலமைப்புச் சட்டம் ஒவ்வொரு இந்தியரின் அடிப்படை உரிமையாக வரையறுக்கிறது. இந்நிலையில் மதத் தூய்மைவாதம் பேணுகிறோம் என்கிற பெயரில் இந்துத்துவ அமைப்புகள், அடிப்படை உரிமைகளை பறிக்கும்வகையிலும் மனிதத் தன்மையற்ற முறையிலும் இத்தகைய செயல்களைச் செய்கின்றன. உபியில் மனிதத்தன்மையற்று போதகரிடம் நடந்து கொண்டவர்கள் யாரும் இதுவரை கைது செய்யப்படவில்லை.

இந்தியாவில் பாஜக ஆட்சிக்கு வந்த பிறகு, 2015-ஆம் ஆண்டில் மட்டும் முஸ்லிம், கிறித்துவ மதத்தினருக்கும் எதிராக 600க்கும் மேற்பட்ட வன்முறைகள் பதிவாகியுள்ளதாக புள்ளிவிவரம் ஒன்று கூறுகிறது. இந்த வன்முறைகளில் 40 பேர் கொல்லப்பட்டிருப்பதாகவும் அந்த விவரம் சொல்கிறது. கிறித்துவர்களுக்கு எதிராக மட்டும் 149 வன்முறைச் சம்பவங்கள். இதில் கொல்கத்தாவில் 70 வயது கன்னிகாஸ்திரி ஒருவர் பாலியல் வன்கொடுமைக்கு உள்ளாக்கப்பட்டதும் அடங்கும்.

பெரும்பாலும் முஸ்லிம்களை குறிவைத்தே அரங்கேறிய வன்முறை சம்பவங்கள், இப்போது கிறித்துவர்களை நோக்கி படர ஆரம்பித்துள்ளன. மவுனப் பிரதமராக பெயர் பெற்ற மன்மோகன் சிங், மத வெறியாட்டங்களைப் பார்த்துக்கொண்டு எப்போதும் மவுனமாக இருந்ததில்லை. ஆனால், அக்லக் அடித்துக் கொல்லப்பட்ட விவகாரமாகட்டும் சிறுபான்மையினருக்கு எதிரான எந்தவொரு வன்முறையாகப்பட்டும் இன்றைய பிரதமர் மோடி, வாயைத் திறக்காமல் மவுனம் காக்கிறார். இந்த மவுனம்தான் இந்துத்துவ அடிப்படைவாதிகளுக்கு வன்முறையை அவிழ்த்துவிட சம்மதமாகத் தெரிகிறதோ என்னவோ?!

தினச்செய்தி(31-01-2016) நாளிதழில் வெளியானது.

Advertisements

இந்தியாவின் நம்பர்-1 தீவிரவாத அமைப்பு ஆர்எஸ்எஸ்தான்!

இந்தியாவின் நம்பர் ஒன் தீவிரவாத அமைப்பு ராஷ்டிரிய ஸ்வயம் சேவக் அமைப்புதான் என்கிறார் மகாராஷ்டிர மாநிலத்தின் முன்னாள் ஐஜி முசரிஃப் தெரிவித்திருக்கிறார். டைம்ஸ் ஆஃப் இந்தியா நாளிதழுக்கு அளித்த பேட்டியில் ஆர் எஸ் எஸின் குற்றச்செயல்களை குற்றச்செயல்கள் மீதான நடவடிக்கைகளை பட்டியலிட்டிருக்கிறார்.

* ஆர்டிஎக்ஸ் வெடிபொருட்களைப் பயன்படுத்தி 13 தீவிரவாத குற்றச்செயல்களில் ஆர்எஸ்எஸ் ஈடுப்பட்டிருக்கிறது.

* பஜ்ரங் தள் செய்த குற்றங்களையும் சேர்த்துக் கொண்டால் இந்த எண்ணிக்கை 17-ஆக உயரும்.

* 2007-ஆம் ஆண்டு ஹைதராபாத் மக்கா மசூதி குண்டுவெடிப்பு

* 2006 மற்றும் 2008-ஆம் ஆண்டுகளில் மாலேகான் குண்டுவெடிப்பு

* 2007 -ஆம் ஆண்டு சம்ஜவுதா எக்ஸ்பிரஸ் குண்டுவெடிப்பு உள்ளிட்டவை ஆர் எஸ் எஸ் மீது குற்றம்சாட்டு நிரூபணமாகி குற்றப்பத்திரிக்கை தாக்குதலான 17 வழக்குகளில் முக்கியமானவை.

* ஆர்எஸ்எஸ் ஒரு தீவிரவாத அமைப்பு, அரசியல் அதிகாரத்தால் அது ஒன்றும் சாதிக்கப் போவதில்லை.அவர்கள் எந்தக் கட்சி ஆட்சியில் இருந்தாலும் தங்களுடைய திட்டங்களை செயல்படுத்திக் கொண்டே இருப்பார்கள்.

* ஆர்எஸ்எஸ், சாதீய படிநிலைகளுடன் இயங்குகிறது. அதாவது அவர்களுடைய இயங்குதல் என்பது ஒடுக்குதல், அடிமைப்படுத்துதல் என்பதாக இருக்கிறது.

* இப்போதுதான் நாட்டில் சகிப்பின்மை அதிகரித்துவருவதாகச் சொல்வது தவறு, அந்த வேலைகள் எப்போதும் நடந்துகொண்டேதான் இருக்கின்றன.

* இந்து தீவிரவாதத்தைக் கண்டறிந்து சொன்ன ஹேமந்த் கார்கரே மும்பை தாக்குதலில் கொல்லப்பட்டார். இந்த கொலைக்கு காரணமாக இருந்தது இந்திய உளவுத்துறைதான்.

அணமையில் மும்பை தாக்குதல் நினைவு நாள் கொண்டாடப்பட்டது. இதையொட்டி தாங்குதலில் உயிரிழந்த ஹேமந்த் கார்கரே உள்ளிட்ட வீரர்களுக்கு அஞ்சலி செலுத்தும் நிகழ்ச்சி நடைபெற்றது. இந்த நிகழ்ச்சியில் பேசிய முசரிஃப் இந்த விஷயங்களைப் பேசினார்.

‘ஹேமந்த் கார்கரேவைக் கொன்றது யார்?’ என்கிற புத்தகத்தை எழுதியிருக்கிறார் முசரிஃப்.

 

 

ஹரீஷ் பூஜாரியைக் கொன்றது பஜ்ரங் தள் சகாக்களே: வெளிவந்த உண்மை

மாட்டிறைச்சியை வைத்திருந்ததாக பரப்பட்ட வதந்தியில் அடித்துக் கொல்லப்பட்ட தாத்ரி அக்லக் பற்றி பேசுபவர்கள் மூடுபித்ரியில் மாடுகளைக் காப்பாற்றும் ஆர்வலராக இருந்த ஹரிஷ் பூஜாரி கொலையை பேசவில்லையே ஏன் என அங்கலாய்த்தனர் இந்துத்துவத்தை முன்னெடுக்கும் அமைப்பினர்.

அப்பாவி முஸ்லிமானாலும் தீவிர இந்துவானாலும் அடித்துக் கொல்வதை மனிதத்தை விரும்பும் எவரும் ஏற்றுக்கொள்ளமாட்டார்கள். ஆனால் யார் எந்த சூழ்நிலையில் எப்படி கொல்லப்படுகிறார் என்பதும் அதில் உள்ள அரசியலும் கவனிக்கப்பட வேண்டியதாக இருக்கிறது. வன்முறைக்கான எந்த பின்னணியும் இல்லாமல் வாழ்ந்த அக்லக்கின் கொலை அசாதாரணமானது, அதன் பின்னால் இருந்த திட்டமிடல், அரசியல் எல்லாம் ஒவ்வொன்றாக அடுத்தடுத்த நாட்களில் விளங்கின. அதனால்தான் நாடு தழுவிய கண்டனமும் அறிவுஜீவிகளின் தன்னிச்சையான எழுச்சிப் போராட்டமும் வலுப்பெற்றது.

கர்நாடக மாநிலம், மூடு பித்ரியைச் சேர்ந்த ஹரிஷ் பூஜாரியை எடுத்துக் கொள்வோம். அவர் பஜ்ரங் தள் அமைப்பின் தீவிர செயல்பாட்டாளர். கர்நாடகாவை காங்கிரஸ் ஆண்டாலும் இந்து அமைப்புகளின் செயல்பாடு எந்தவிதத்திலும் குறைந்துவிடவில்லை. அதற்கொரு உதாரணம்தான் பேராசிரியர் எம். எம்.
கல்புர்கி கொலை. பாஜக மத்தியில் ஆட்சிக்கு வந்ததிலிருந்து இந்து அமைப்புகள் புது உத்வேகத்துடன் செயல்பட்டுக் கொண்டிருக்கின்றன.

இந்நிலையில் இந்து அமைப்புகளுக்கு எதிராக உள்ள அமைப்புகள் ஹரிஷ் பூஜாரியை கொன்றிருப்பதற்கான சாத்தியக்கூறுகள் மிகக் குறைவே. சிறுபான்மையினர் அச்சுறுத்தலில் வாழும் சூழலில் இத்தகைய கொலை செயல்கள் என்னவிதமான பாதிப்புகளை ஏற்படுத்தும் என்று சிறுபான்மை அமைப்புகள் தெரிந்தே
வைத்திருக்கின்றன. இந்த அடிப்படையில்தான் ஹரிஷ் பூஜாரியின் கொலையை விவாதத்துக்குரிய ஒரு விஷயமாக யாரும் பார்க்கவில்லை. இது ஒரு உள்ளூர் ரவுடிகளின் கட்டபஞ்சாயத்து மோதலாகவே பார்க்கப்பட்டது.

ஆனால், பாஜகவினர் ஏன் இந்த பாரபட்சம் என்று பதறினர். வலதுசாரி ஊடகங்கள் ஹரிஷ் பூஜாரியின் கொலைக்கு ‘மத’ சாயம் பூசின. ரங்கராஜ் பாண்டே போன்ற பத்திரிகையாளர்கள் தாத்ரியில் நடந்ததைப் போலவே மூடு பித்ரியை சம்பவத்தையும் பார்க்க வேண்டும். சேலத்தில்கூட இந்து முன்னணி செயலாளர்
கொல்லப்பட்டார் ஏன் அதுகுறித்து பேசுவதில்லை என்று கதறினார். ஆமாம், கொலையாளிகளின் கொலையும்கூட கண்டிக்கப்பட வேண்டியதுதான். அதில் மறுப்பில்லை. கொலையாளிகளையும் அப்பாவிகளையும் சமன்படுத்துவதைத்தான் மறுக்க வேண்டியிருக்கிறது.

கட்டப்பஞ்சாயத்துகளில் ஈடுபட்ட இந்து முன்னணி செயலாளர், சக அமைப்பினராலேயே கொல்லப்பட்டார் என்பது போலீஸ் விசாரணையில் தெரியவந்து அவர்களும் கைதானார்கள். இது ரங்கராஜ் பாண்டே போன்ற மூத்த பத்திரிகையாளர்கள் அறிந்திருக்க மாட்டார்கள் என்று சொல்ல முடியாது. தங்களுடைய ஊடக செல்வாக்கைப் பயன்படுத்தி பொது மக்கள் மத்தியில் ‘தர்க்கப் பூர்வமாக பேசி பொய்யை உண்மையாக்கும் முயற்சி இது.

தமிழகத்தில் நடந்ததுபோலத்தான் மூடு பித்ரி ஹரிஷ் பூஜாரி கொலையின் பின்னணியின் மூலம் இருக்கிறது. ஹரிஷ் பூஜாரியை அடித்துக் கொன்றது சக அமைப்பைச் சேர்ந்தவர்களே தான். கல்புர்கி கொலையானபோது அடுத்த கொலை கே.எஸ். பகவானுடையதுதான் என்று ட்விட்டனாரே அதே நபர்தான். பெயர் புவீத் ஷெட்டி. புவீத் ஷெட்டி(25)யும் அச்சுதா(28)வும் இணைந்து ஹரிஷ் பூஜாரியை அடித்துக் கொன்றிருக்கிறார்கள். சமியுல்லா என்ற மூஸ்லீமை கொல்லப்போய், ஹரிஷ் பூஜாரியைத் தவறுதலாகக் கொன்றுவிட்டார்களாம். தங்களுடைய வாக்குமூலத்தில் இவர்கள் ஒப்புக் கொண்டிருக்கிறார்கள்.

சமியுல்லாவை ஏன் கொல்லவேண்டும்? அவரைக் கொல்வதன் மூலம் அந்தச் சமூகத்தினரை பயமுறுத்த வேண்டுமாம். கல்புர்கி கொலையை நியாயப்படுத்தி சமூக வலைத்தளத்தில் எழுதியது மட்டுமில்லாமல், மற்றொரு மாற்றுக் கருத்தாளரும் அதுபோல் கொல்லப்படப் போவதாகவும் எழுதி புகழ்பெற்ற நபர், அடுத்து தன்னுடைய தீவிர அரசியலை ஒரு முஸ்லீமைக் கொல்வதன் மூலம் முன்னெடுக்கலாம் என நினைத்திருக்கிறார். அது திசைமாறி ஹரிஷ் பூஜாரியின் உயிரை வாங்கிவிட்டது.

தன்னை தீவிர இந்துவாகவும் இந்துக்களுக்கு எதிராக யார் பேசினாலும் அதைப் பொறுத்துக் கொள்ள முடியாது என்று ஊடகங்களில் பேசியிருக்கிறார் புவீத் ஷெட்டி. இந்து தேசத்தை நிறுவும் பொருட்டு, மத, சாதி சிறுபான்மையினரை திட்டமிட்டுக் கொன்றதாக கொலைக் குற்றம் சாட்டப்பட்டவர்கள் பெருமைமிக்க
ஜனநாயக பதவிகளில் அமர்ந்திருப்பதைப் பார்க்கும்போது புவீத் போன்ற அடிமட்ட தீவிர இந்து செயல்பாட்டாளரின் கனவு பரந்து விரிந்திருக்கும். அதனுடைய தொடர்ச்சியே இப்படியான ‘சொதப்பலான’ கொலைகள். இந்திய-பிரிட்டன் வாழ் சிற்பக்கலைஞர் அனிஷ் கபூர் சொன்னதுதான் நினைவுக்கு வருகிறது ‘இந்தியாவை இந்து தாலிபான்கள் ஆள்கிறார்கள்!’