இந்திய – இலங்கை உறவு பிராந்திய நலனுக்காகவா? மோடி நண்பர்களின் நலனுக்காகவா?

இலங்கை போரின் இறுதிக் காலக்கட்டங்களில் இந்தியாவில் பாஜக ஆட்சிக்கு வந்தால் தங்களுக்கு சாதகமாக நடந்துகொள்ளும் என தீவிரமாக நம்பிக்கொண்டிருந்தனர் விடுதலை புலிகள்.  போர் முடிந்து ஆறு ஆண்டுகளுக்குப் பிறகே பாஜக ஆட்சியில் அமர்ந்திருக்கிறது.  ஆனால், காங்கிரஸ் அரசைக் காட்டிலும் பாஜக அரசு இலங்கையுடன் நெருக்கம் காட்டி வருகிறது. பாஜக அரசு இலங்கை அரசுடன் கைக்கோர்ப்பதற்கான காரணங்கள் ஏராளமாக உண்டு. தேசிய நலன் என்பதைக் காட்டிலும் பாஜக அரசு தன்னுடைய தனிப்பட்ட பலன்களுக்காக இலங்கையுடன் நெருக்கமான உறவைப் பேண நினைக்கிறது.

இலங்கையின் தமிழர் வசிக்கும் பகுதிகளில் ஆர் எஸ் எஸ், போருக்குப் பிறகான சீரமைப்புப் பணிகளில் தன்னார்வ தொண்டு நிறுவனங்களின் பெயரில் ஆழமாக காலூன்றி இருக்கிறது. தமிழ் ஆர்வலராக காட்டிக் கொள்ளும் பாஜக எம்பி தருண் விஜய், இந்துசமய நிகழ்ச்சிகளில் அடிக்கடி கலந்துகொள்கிறார். யாழ்பாண பல்கலையில் இந்து சமய இயக்கங்களின் நிகழ்ச்சிகளில் பங்கெடுத்து வருகிறார். அதுபோல புத்த பல சேனா போன்ற அடிப்படைவாத புத்தமத இயக்கங்களுடன் ஆர் எஸ் எஸ் நெருக்கமான உறவைப் பேணி வருகிறது.

எல்லாவற்றுக்கும் மேலாக போருக்குப் பிறகு, இலங்கையின் தொழிற்துறையில் திறந்துவிடப்பட்டுள்ள வாய்ப்புகளை இந்திய தொழிலதிபர்களுக்குப் பெற்றுத்தருவதில் மோடி அரசு முனைப்பாக இருக்கிறது. இதே கண்ணோட்டத்துடன் தனக்கிருக்கும் வர்த்தக லாபங்களுக்காக இந்தியாவின் உறவை வலிமையாக வைத்துக்கொள்ள விரும்புகிறது இலங்கை அரசு.

கடந்த ஆண்டு, மோடியின் இலங்கை பயணத்தின் போது, “டயர் உற்பத்தி, இருசக்கர, மூன்று சக்கர வாகன உற்பத்திகளில் இந்தியா-இலங்கை கூட்டு வர்த்தகத்தின் மூலம் இலங்கையின் போருக்கு பின்னான பொருளாதாரத்தில் உடனடியான பலனை பெற முடியும்” என்று இலங்கையின் மைய வங்கியின் கவர்னர் சொன்னார்.  இலங்கையுடன் இந்தியாவின் வர்த்தக உறவு மற்ற நாடுகளுடன் ஒப்பிடும்போது முன்னிலையில்தான் இருக்கிறது. இரண்டு நாடுகளுக்கிடையே 2014-ஆம் ஆண்டு  4.6 பில்லியன் டாலர் மதிப்பிலான வர்த்தகம் நடைபெற்றிருக்கிறது. வர்த்தக அளவு ஆண்டுக்கு ஆண்டு அதிகமாகும் என்பதே அரசு மற்றும் வர்த்தக துறையினர் எதிர்பார்ப்பு.

இந்த நிலையில், கடந்த வாரம் பாகிஸ்தான் பிரதமர் நவாஸ் ஷெரீப் மூன்று நாள் பயணமாக இலங்கை சென்றிருந்தார். இலங்கை ராணுவத்துக்கு போர் விமானங்கள் வாங்குவது உள்ளிட்ட பல ஒப்பந்தங்கள் கையெழுத்தாகும் என இலங்கை-பாகிஸ்தான் பத்திரிகைகள் தெரிவித்திருந்தன. ஆனால், அதே சமயத்தில் இந்திய பாகிஸ்தான் எல்லையோர பதன்கோட் பகுதியில் நடந்த தீவிரவாதிகள் தாக்குதல் இந்த ஒப்பந்தங்களில் மாற்றத்தை ஏற்படுத்தியிருக்கிறது.

‘விடுதலை புலிகளுடம் போர் முடிந்துவிட்ட சூழலில் இராணுவ விமானங்கள் வாங்குவதற்கு ஏன் பெரிய தொகையை செலவழிக்க வேண்டும்?’ இந்தியா வாய்மொழியில் கேட்டுக்கொண்டதன் அடிப்படையில் 400மில்லியன் டாலர் மதிப்பிலான ஜெ எஃப் 17 ரக விமானங்கள் வாங்கும் ஒப்பந்தத்தை தற்காலிகமாக இலங்கை ரத்து செய்திருப்பதாக செய்திகள் வெளியாகியிருக்கின்றன.

சீனாவின் தொழிற்நுட்பத்தில் தயாரான இந்த விமானங்கள் பாகிஸ்தானின்  காம்ரா விமான கட்டுமான நிலையத்தில் ஒன்றிணைக்கப்பட்டவை(மேன் இந்தியா போல, மேன் இன் பாகிஸ்தான்). இலங்கையில் பாகிஸ்தான், சீனாவின் மேலாதிக்கத்தை தடுக்கவே இத்தகைய நடவடிக்கைகளில் இறங்கியுள்ளதாகக் கூறுகிறது. சீன-பாகிஸ்தான் மேலாதிக்கத்தை தடுக்கவா அல்லது  அனில் அம்பானி போன்ற இராணுவ தளவாடங்களை உற்பத்தி செய்யும் மோடியின் நண்பர்களின் வர்த்தக நலனுக்காகவா என்பதை பொறுத்திருந்துதான் பார்க்க வேண்டும்!

நீதித்துறையின் சுதந்திரத்தை நிலைநிறுத்திய தீர்ப்பு!

supremecourt

இந்திய நாடாளுமன்றம் ஏகமனதாக உருவாக்கிய தேசிய நீதிபதிகள் நியமன ஆணையம் சட்டவிரோதமானது என உச்சநீதிமன்றம் மிக முக்கியமான தீர்ப்பைச் சொல்லியிருக்கிறது.

நீதிபதிகள் நியமனத்திற்கான தேசிய சட்ட ஆணையம் அமைக்கப்படுவதை எதிர்த்து தொடரப்பட்ட வழக்கில், உச்ச நீதிமன்ற அரசியல் சாசன அமர்வு வெள்ளிக்கிழமை மிக முக்கியமான தீர்ப்பை அளித்துள்ளது. நீதிபதிகள் J.S. கெஹர், மதன் B. லோகூர், சலமேஷ்வர், குரியன் ஜோசஃப், A.K. கோயல் ஆகியோர் அடங்கிய ஐந்து நபர் கொண்ட அமர்வு இந்தத் தீர்ப்பை வழங்கியிருக்கிறது.

அதில் “நீதிபதிகள் நியமனத்திற்கான தேசிய ஆணையத்தை உருவாக்கும் சட்டம் அரசியல் சாசனத்திற்கு எதிரானது. நாடாளுமன்றம் ஏகமனதாக உருவாக்கிய இந்த நியமன ஆணையம் சட்டவிரோதமானது. நீதித்துறையின் சுதந்திரத்தில் தலையிடுவதாக உள்ளது. நீதிபதிகளை நியமிக்கும் கொலிஜியம் முறை என்பது 99-வது அரசமைப்பு திருத்தச் சட்டத்திற்கு முன்பிருந்தே வழக்கத்தில் உள்ளது. எனவே, தற்போது நடைமுறையில் இருக்கும் கொலிஜியம் முறையே தொடர்ந்து அமலில் இருக்கும்” என்று தீர்ப்பளித்தனர். மேலும் இந்த வழக்கை பெரிய அமர்வுக்கு மாற்றக்கோரிய மத்திய அரசின் மனுவையும் உச்ச நீதிமன்றம் நிராகரித்துள்ளது.

உச்சநீதிமன்றம் மற்றும் உயர்நீதிமன்றங்களுக்கு புதிய நீதிபதிகளை நியமிக்கவும், நீதிபதிகள் பதவி உயர்வு மற்றும் இடமாற்றம் போன்றவற்றை இறுதி செய்யவும், கொலிஜியம் எனப்படும் தேர்வுக்குழு முறை பின்பற்றப்பட்டு வந்தது.

நரேந்திரமோடி தலைமையிலான பாஜக அரசு பதவியேற்றதும் இந்த முறையை மாற்றி, நீதிபதிகள் நியமனத்திற்கான தேசிய ஆணையத்தை உருவாக்கும் சட்டத்தைக் கொண்டுவந்தது. முன்னாள் உச்சநீதிமன்றத் தலைமை நீதிபதி லோதா, தற்போதைய உச்சநீதிமன்ற தலைமை நீதிபதி எச். எல்.தத்து உள்பட பல நீதிபதிகள் இந்த முறைக்கு எதிர்ப்புத் தெரிவித்திருந்தனர்.

இந்த சட்டத்திற்கு எதிராகவும், சட்டத்திற்கு அரசியல் அங்கீகாரம் அளிக்கும் சட்டத் திருத்தத்திற்கு எதிராகவும், உச்சநீதிமன்றத்தில் பதிவு பெற்ற வழக்கறிஞர்கள் சங்கம், இந்திய வழக்கறிஞர்கள் சங்கம் மற்றும் சில தனிநபர்கள் சார்பில் வழக்கு தொடரப்பட்டிருந்தது.

மனுதாரர்கள் சார்பாக பிரபல வழக்கறிஞர் பாலி நாரிமனும், மத்திய அரசு சார்பாக தலைமை வழக்கறிஞர் முகல் ரோஹத்கியும் ஆஜராகி வாதங்களை முன்வைத்தனர். இருதரப்பு வாதங்களும் நிறைவடைந்த நிலையில் உச்ச நீதிமன்றம் தீர்ப்பை வழங்கியிருக்கிறது.

இந்தத் தீர்ப்பு குறித்து உயர்நீதிமன்ற முன்னாள் நீதிபதி சந்துருவிடம் இப்போது.காம் கருத்து கேட்டது ‘இது சரியல்ல’ என்று ஒற்றை வாக்கியத்தில் முடித்துக்கொண்டார் அவர்.

வழக்கறிஞர் சுதா ராமலிங்கம், இந்தத் தீர்ப்பு எதிர்பார்த்த ஒன்றுதான். எந்த ஒரு அமைப்பிலும் தங்களுடைய சுதந்திரத்தில் தலையீடு வருவதை விரும்பமாட்டார்கள் என்று சொன்னார்.

மேலும் அவர், “கொலிஜியம் முறைக்கு மாற்றாக மத்திய அரசாங்கம் கொண்டு வந்த நியமன ஆணையத்தில் பிரபலமானவர்கள் இருப்பார்கள் என்று சொல்லப்பட்டது. அந்தப் பிரபலமானவர்கள் யார் என்பதும் அவர்களுடைய பின்னணி என்ன என்பது பற்றியும் நமக்குத் தெரியாது. இந்த ஆணையத்துக்கு பிரதமரும் எதிர்க்கட்சித் தலைவரும் உச்சநீதிமன்ற தலைமை நீதிபதியும் தலைமை வகிப்பார்கள் என்று சொல்லப்பட்டது. இதில் இரண்டு பேர் அரசியல்வாதிகள் வருகிறார்கள் என்பதும் இது நீதித்துறையின் செயல்பாட்டில் தலையிடுவதாக இருக்கும் என்பதும் நீதித்துறை சார்ந்தவர்களிடம் அதிருப்தியை ஏற்படுத்தியிருந்தது. வெள்ளிக்கிழமை வழங்கப்பட்ட தீர்ப்பிலும் நீதிபதிகள் இதைச் சுட்டிக்காட்டியிருக்கிறார்கள்.

அரசியல் தலையீடு அதிகமாக இருந்த 90களில் கொண்டுவரப்பட்ட கொலிஜியம் முறை, ஆரம்பித்த காலக்கட்டத்தில் மிகச் சரியாகவே இயங்கியது. நல்ல நீதிபதிகளை நீதித்துறையில் இருக்கிறவர்கள்தான் கண்டுபிடிக்க முடியும் என்பதுபோல பல நல்ல நீதிபதிகள் கிடைத்தார்கள். போகப்போக எல்லா அமைப்புகளும் புரையோடிப் போவதுபோல நீதித்துறை நியமனங்களிலும் பல கோளாறு ஏற்பட ஆரம்பித்தது.

வேண்டியவர்களை நியமிப்பது, நீதிபதி பதவிக்காக லாபி செய்வது, சாதி, மதம், பணம் போன்று பல்வேறு காரணங்களால் கொலிஜியம் முறையில் நீதிபதிகளை நியமிக்கு முறையில் குறைகள் தோன்ற ஆரம்பித்தன.
இந்தக் குறைகளைக் கருத்தில் கொண்டே வரும் நவம்பர் மாதம் மீண்டும் கூடி கொலிஜியம் முறையை எப்படி மேம்படுத்தலாம் என்று பேச இருப்பதாக நீதிபதிகள் தெரிவித்திருக்கிறார்கள். அந்தவகையில் இந்தத் தீர்ப்பு முக்கியமானது, வரவேற்கக்கூடியது” என்கிறார் மூத்த வழக்கறிஞர் சுதா ராமலிங்கம்.

மத்திய சட்ட அமைச்சர் சதானந்த் கவுடா இந்தத் தீர்ப்பை மிகவும் அதிர்ச்சியளிப்பதாகக் குறிப்பிட்டிருக்கிறார். நீதிபதிகள் நியமனத்தில் அரசியல் தலையீட்டைக் கொண்டு வந்து அதைச் சட்டமாகவும் இயற்றி பல தரப்பினரிடையே அதிர்ச்சியை ஏற்படுத்தியது மோடி அரசு. அந்தவகையில் இந்தத் தீர்வு நீதிமன்றத்தின் சுதந்திரத்தை நிலைநிறுத்தியிருப்பதாக பலரும் வரவேற்றிருக்கிறார்கள்.