தேசிய தலைவராகும் நிதிஷ்?

Bihar Cm

பீகார் மாநிலத்தின் ஐந்தாவது முதலமைச்சராக வெள்ளிக்கிழமை பதவியேற்றார் நிதிஷ்குமார். இந்தப் பதவி ஏற்பு விழாவை கோலாகலமாக மாற்ற முயற்சிக்கின்றன பாஜக எதிர்ப்பு அரசியல் செய்யும் கட்சிகள். பாஜவை எதிர்க்க பலமான சக்தியை உருவாக்க இந்த பதவியேற்பு விழா ‘கூடுதல்’ உதவி செய்யும் என்கிறார்கள் அரசியல் நோக்கர்கள்.

முக்கிய தலைவர்கள் அணிவகுக்கும் விழா

நிதிஷின் பதவியேற்பு விழாவுக்கு இந்தியாவின் பல முக்கிய அரசியல் பிரமுகர்கள் கலந்து கொள்கிறார்கள். காங்கிரஸ் துணைத் தலைவர் ராகுல் காந்தி, இந்திய கம்யூனிஸ்ட் கட்சியின் டி.ராஜா, முன்னாள் பிரதமர் ஹெச். தேவேகவுடா, முன்னாள் மத்திய அமைச்சர்கள் சரத்பவார், ஃபிரபுல் பட்டேல், ஜம்மு காஷ்மீர் முதல்வர் ஃபாரூக் அப்துல்லா, மக்களவை எதிர்க்கட்சித் தலைவர் மல்லிகார்ஜுன கார்கே போன்றோரும் பல மாநில முதல்வர்கள் வர இருக்கிறார்கள்.

குறிப்பாக மேற்கு வங்க முதலமைச்சர் மம்தா பானர்ஜி, உத்தரப் பிரதேச முதலமைச்சர் அகிலேஷ் யாதவ், டெல்லி முதலமைச்சர் அரவிந்த் கேஜ்ரிவால் ஆகியோர் இந்தப் பதவி ஏற்பு விழாவில் பங்கேற்கிறார்கள். அதோடு காங்கிரஸ் ஆளும் ஆறு மாநில முதல்வர்களான சித்தராமையா, தருண் கோகாய், பி.கே.சாம்லிங், இபாபி சிங், நபாம் டுகி, வீர்பத்ரா சிங் ஆகியோரும் பங்கேற்கிறார்கள்.

திமுக பொருளாளர் மு.க.ஸ்டாலின், அதிமுக சார்பில் தம்பிதுரையும் பங்கேற்கின்றனர். முன்னதாக, பதவியேற்பு விழாவில் பங்கேற்குமாறு நிதீஷ் குமார் விடுத்த அழைப்பை, பிரதமர் நரேந்திர மோடி ஏற்றுக்கொண்டுள்ளார். எனினும், அதே நாளில் வேறு நிகழ்ச்சிகளில் பங்கேற்க வேண்டியிருப்பதால், அவருக்குப் பதிலாக மத்திய அமைச்சர் வெங்கய்ய நாயுடு கலந்து கொள்கிறார் என்று தெரிவிக்கப்பட்டுள்ளது.

மோடிக்கு இணையான செல்வாக்கு

மக்களவைத் தேர்தலில் பெரும்பான்மை பெற்று பிரதமராக மோடி பதவியேற்றபோது, தெற்காசிய நாட்டின் தலைவர்களை அழைத்தார். தெற்காசிய பிராந்தியத்தில் தன்னுடைய ஆளுமையை பறைசாற்றிக்கொள்ள மோடி அப்படி செய்தார். அதேபோல, மோடிக்கு எதிரான அலையில் பீகாரில் வெற்றியைக் குவித்த நிதிஷ்குமார், தன்னுடைய அரசியலை தேசிய அரசியலாக மாற்றும் முயற்சியில் பதவியேற்பு விழாவை கோலாகலமாக நடத்துவதைப் பார்க்கலாம். மோடிக்கு இணையான செல்வாக்கும் அரசியலை வழிநடத்தும் திறமையும் தனக்குள்ளதாக நிதிஷ் நினைக்கிறார். அதற்கு கட்டியம் கூறுவதாகத்தான் நிதிஷின் பதவி ஏற்பு விழா அமைந்திருக்கிறது.

 

ராகுல் – ஜெட்லி சந்திப்பு: நாடாளுமன்ற நடவடிக்கைகள் சுமூகமாக இருக்குமா?

நாடாளுமன்றக் குளிர்காலக் கூட்டத்தொடர் வரும் 26-ஆம் தேதி தொடங்க இருக்கிறது. முந்தைய மழைக்காலக் கூட்டத்தொடரில் எதிர்க்கட்சிகளின் எதிர்ப்பு காரணமாக பல்வேறு முக்கிய மசோதாக்களை அரசால் நிறைவேற்ற முடியவில்லை.

தேங்கியிருக்கும் மசோதாக்கள்

மாநிலங்களவையில் நிறைவேற்றப்படாத நிலையில் 11 மசோதாக்களும், மக்களவையில் 13 மசோதாக்களும் இருக்கின்றன. இவற்றில் 5 மசோதாக்கள் பல்வேறு துறைகளின் நாடாளுமன்ற நிலைக் குழுக்களின் பரிசீலனையில் உள்ளன.
இதேபோல், மத்திய அரசு உத்தேசித்திருந்த சரக்கு – சேவை வரிகள் மசோதாவும் (ஜி.எஸ்.டி.) முந்தைய கூட்டத்தொடரில் நிறைவேற்றப்படவில்லை.

கூட்டத்தொடர் அறிவிப்பு

நாடாளுமன்றக் கூட்டத்தொடரானது நவம்பர் 26-ஆம் தேதி முதல் டிசம்பர் 23-ஆம் தேதி வரை நடைபெற இருக்கிறது. இந்திய அரசமைப்புச் சட்டம் ஏற்றுக்கொள்ளப்பட்ட தினத்தை (26-11-1949) நினைவுகூரும் விதமாக, கூட்டத்தொடரின் முதல் இரண்டு நாள்களான 26, 27 ஆகிய தேதிகளில் சிறப்பு அமர்வுகளுக்கு ஏற்பாடு செய்யப்பட்டுள்ளது. இந்த அமர்வுகளில் அரசமைப்புச் சட்டத்தில் நமது பங்களிப்பு குறித்தும், அரசியலமைப்புச் சட்டம் தொடர்பான கடமையுணர்வு, அரசமைப்புச் சட்டத்தை உருவாக்குவதில் அம்பேத்கரின் பங்கு குறித்தும் விவாதிக்க முடிவு செய்யப்பட்டுள்ளது. எனவே, அந்த தினங்களில் கேள்வி நேரங்கள் இருக்காது.

வெங்கய்ய நாயுடு கோரிக்கை

குளிர்காலக் கூட்டத்தொடரில் சரக்கு – சேவை வரி மசோதா உள்ளிட்ட முக்கிய மசோதாக்களை அரசு நிறைவேற்றும் என நம்பிக்கைத் தெரிவித்திருக்கிறார் நாடாளுமன்ற விவகாரங்களுக்கான அமைச்சர் வெங்கய்ய நாயுடு. இதுவரை முரண்டு பிடித்துக் கொண்டிருந்த மத்திய அரசு, “இந்த மசோதாக்களை நிறைவேற்ற எதிர்க்கட்சிகள் ஒத்துழைக்க வேண்டும். இந்த விவகாரத்தில் எதிர்க்கட்சிகளுடன் நாடாளுமன்றத்தில் விவாதம் நடத்த அரசு தயாராக உள்ளது” என கீழிறங்கி வந்துள்ளது.

‘பீகார் முடிவுகளை வைத்து நாடாளுமன்றத்தை முடக்கக்கூடாது’

சகிப்பின்மைக்கு எதிரான சூழலும் அதை எதிரொலித்த பீகார் தேர்தல் முடிவுகளும் நாடாளுமன்றத்தை முடக்கக் கூடும் என மத்திய அரசு தெரிந்து வைத்திருக்கிறது.

“பீகார் தேர்தல் முடிவு மக்கள் அளித்துள்ள தீர்ப்பு. அதை நாங்கள் வரவேற்கிறோம். பீகார் மக்கள், அவர்கள் விருப்பப்படி தீர்ப்பு வழங்கியுள்ளனர். இதனை எதிர்க்கட்சிகள் புரிந்துகொள்ள வேண்டும். ஒரு மாநிலத்தின் தேர்தல் முடிவானது அம்மாநிலத்தின் அரசியல், சூழ்நிலை ஆகியவற்றைப் பொருத்தது. அது ஒட்டுமொத்த தேசத்தின் மீதான தாக்கம் கிடையாது. பிகார் தேர்தல் முடிவுகளை முன்னிறுத்தி, நாடாளுமன்றத்தை எதிர்க்கட்சிகள் முடக்க வேண்டாம்” என்று வெங்கய்யா நாயுடு கேட்டுக்கொண்டுள்ளார்.

ராகுல்-ஜேட்லி சந்திப்பு

இதனிடையே இந்திய காங்கிரஸ் துணைத் தலைவர் ராகுல் காந்தியை மத்திய நிதியமைச்சர் அருண் ஜேட்லி புதன்கிழமை சந்தித்துப் பேசினார். அருண் ஜெட்லி, நாடாளுமன்றத்தில் சரக்கு, சேவை வரி மசோதாவை நிறைவேற்ற ராகுலிடம் பேசத் தயார் என அறிவித்திருந்தார். இந்நிலையில் இந்தச் சந்திப்பு நடந்திருக்கிறது. ஆனால் காங்கிரஸ் வட்டாரங்கள் இந்தச் சந்திப்பு தனிப்பட்ட முறையில் நடந்ததாக கூறுகின்றன. முன்னதாக அருண் ஜெட்லி காங்கிரஸ் தலைவர் சோனியா காந்தியையும் முன்னாள் பிரதமர் மன்மோகன் சிங்கையும் சந்தித்துப் பேசினார்.

மகளின் திருமணத்திற்கு அழைப்பு

சந்திப்பு குறித்து செய்தியாளர்களிடம் பேசிய அருண் ஜெட்லி, “எனது மகள் சோனாலியின் திருமண வரவேற்பு நிகழ்வு வரும் டிசம்பர் 9-ஆம் தேதி டெல்லியில் உள்ள எனது இல்லத்தில் நடக்க உள்ளது. ராகுலை அதற்காகவே சந்தித்தேன். அரசியல் நிகழ்வுகள் பற்றியும் பேசினேன்” என்றார்.

எதிர்க்கட்சியினரை தனித்தனியாக சந்தித்து பேச்சு

கடந்த பட்ஜெட் கூட்டத் தொடர், நாடாளுமன்றக் மழைக்காலக் கூட்டத் தொடர் அலுவல்கள் சுமுகமாக நடைபெற காங்கிரஸ், இடதுசாரிகள் உள்ளிட்ட கட்சிகளின் உறுப்பினர்கள் அனுமதிக்கவில்லை. இதனால், இரு அவைகளின் அலுவல்கள் முடிங்கின. அதேநிலை இம்முறையும் தொடரக்கூடாது என்பதற்காக எதிர்க்கட்சித் தலைவர்களை நாடாளுமன்ற விவகாரங்கள் துறை அமைச்சர் வெங்கய்ய நாயுடு, மத்திய இணையமைச்சர் ராஜீவ் பிரதாப் ரூடி ஆகியோர் தனித்தனியாகப் பேசி ஒத்துழைப்பு வழங்குமாறு கோரி வருகின்றனர். இதையொட்டி, வரும் 22-ஆம் தேதி தனது இல்லத்தில் இரு அவைகளிலும் உள்ள முக்கிய அரசியல் கட்சிகளின் தலைவர்களை வெங்கய்ய நாயுடு சந்தித்துப் பேசத் திட்டமிட்டிருக்கிறார்.

அவசியம் தெரிந்துகொள்ள வேண்டிய நிதிஷ்-லாலு வெற்றி ஃபார்முலா!

bihar-lalu-nitish

சமீப ஆண்டுகளில் இரண்டு தேர்தல்கள் முக்கியத்துவம் பெற்றிருக்கின்றன. ஒன்று டெல்லி சட்டப்பேரவை தேர்தல், இரண்டாவது பீகார் தேர்தல். இரண்டுமே எதிர்ப்பார்ப்புகளைத் தாண்டி டெல்லியில் ஆம் ஆத்மியும் பீகாரில் மகா கூட்டணியும் வெற்றியைக் குவித்த தேர்தல்கள்.

பொதுவாக ஒவ்வொரு மாநிலத்திலும் ஊழலற்ற, மதவாதம் இல்லாத, வளர்ச்சி நோக்கிய மாற்றுத் திட்டங்களுடன் அரசியல் கட்சிகள் இயங்குகின்றன. ஆனால் அவற்றால் ஏன் வெற்றி பெறமுடிவதில்லை? டெல்லி, பீகார் தேர்தல்கள் சொல்லும் பாடம் என்ன? நடந்து முடிந்த பீகார் சட்டப்பேரவைத் தேர்தலில் நிதி-லாலு கூட்டணியின் வெற்றி ஃபார்முலா என்ன?

ஒற்றுமையே பலம்

பீகாரில் வளர்ச்சித் திட்டங்களை முன்வைத்த நிதிஷ், ஊழலுக்குப் பெயர்பெற்ற தன்னுடைய பரம எதிரியாக இருந்த லாலு பிரசாத்துடன் கூட்டணி வைத்தது சந்தர்ப்பவாதம் என்று பாஜகவினரால் குற்றம்சாட்டப்பட்டது. 2014-ஆம் ஆண்டின் மக்களவைத் தேர்தலில் பாஜகவின் அமோக வெற்றிக்கு அடுத்தபடியாக லாலுவின் ராஷ்டிரிய ஜனதா தளம் அதிக இடங்களைப் பிடித்திருந்தது. அதனுடைய வாக்கு வங்கியும் அதிகமாகியிருந்தது.

லாலுவும் நிதிஷும் வி.பி.சிங்கிடம் அரசியல் பாடம் கற்றவர்கள். இருவருடைய கட்சிக் கொள்கைகளுக்கும் பெரிதாக வித்தியாசமில்லை. அதனால் அவர்கள் இருவரும் கொள்கைகளில் பாரதூரத்தில் இருந்த பாஜகவுக்கு எதிராக ஒன்றிணைந்ததை சந்தர்ப்பவாதமாக பீகார் மக்கள் பார்க்கவில்லை. அதைத் தேர்தல் வெற்றி மூலம் அங்கீகரித்திருக்கிறார்கள்.

நம்மூரில் அதிமுக, திமுகவின் ஊழல்களை விமர்சிக்கும் விஜயகாந்துக்கு ஊழலுக்கு எதிரான மாற்றாக சொல்லிக்கொள்ளும் மக்கள் நலக் கூட்டணியில் இணைய யோசிப்பதில் குறுகிய கால நலன்கள் மட்டுமே உள்ளன. தேமுதிகவுக்கு மட்டுமல்ல தமிழக மாற்று அரசியல் முன்னெடுக்கும் பல கட்சிகளின் நிலைப்பாடும் அத்தகையதே. மக்கள் நலக் கூட்டணியில் உள்ள கட்சிகள் தேர்தலை இணைந்து சந்திப்பார்களா என்பதே சந்தேகத்துக்குரியதுதான்!

ஒடுக்கப்பட்ட மக்களை ஒருங்கிணைத்தல்

நிதிஷ்-லாலு கூட்டணியின் மிக முக்கியமான வெற்றி ஃபார்முலா, அவர்கள் ஒடுக்கப்பட்ட மக்களை ஒருங்கிணைத்து வாக்குகளாக மாற்றிக்கொண்டார்கள் என்பதே. பிற்படுத்தப்பட்டோர், தலித்துகள், சிறுபான்மையினர், பெண்கள் என சாதி, வர்க்கத்தைத் தாண்டி, ஒடுக்கப்பட்ட மக்கள் என்ற ஒரே குடையின் கீழ் இவர்கள் அளித்த வாக்குகளே மகா கூட்டணிக்கு மாபெரும் வெற்றியைத் தந்திருக்கிறது. பள்ளிச் செல்லும் பெண்களுக்கு இலவச சைக்கிள் திட்டம், பஞ்சாயத்துகளில் பெண்களுக்கு 50 சதவிகித இடஒதுக்கீடு போன்ற நிதிஷின் திட்டங்கள் பெண்களின் வாக்குகளை கணிசமாகப் பெற்றன. அதோடு இந்தத் தேர்தலில் அரசு வேலைகளில் பெண்களுக்கு 35 சதவிகித இடஒதுக்கீடு வழங்கப்படும் என்றும் வாக்குறுதி அளித்திருந்தது மகா கூட்டணி.

இடஒதுக்கீட்டுக்கு எதிராக ஆர்எஸ்எஸ் தலைவர் மோகன் பகவத்தின் பேச்சு, மகா கூட்டணிக்கு தூண்டில் இரையாகப் பயன்பட்டது. இடஒதுக்கீட்டால் பலனடைந்த பீகார் மக்களுக்கு ஏற்பட்ட பயம், மகா கூட்டணிக்கு வாக்குகளாக மாறியது. லாலு பிரசாத் மேடைக்கு மேடை இந்தப் பிரச்சினையை முன்வைத்து பேசினார் என்பது குறிப்பிடத்தக்கது.

தமிழக அரசியல் கட்சிகள் எந்த விதத்திலும் சமூக மாற்றத்துக்கு வித்திடாத இலவச பொருட்களைத் தருவதையே விரும்புகின்றன. குறுகிய கால நோக்கம் ஐந்து ஆண்டுகளுக்கு மேல் பலன் தருவதில்லை. டிவி தருவதோ, மிக்ஸி, கிரைண்டர், ஃபேன் தருவதோ இனிமேலும் பலன் தருமா என்பதை அரசியல் கட்சிகள் சிந்திக்க வேண்டும். அதிமுக அரசின் இலவச சைக்கிள், மடிக்கணினி திட்டங்கள், கிராமப்புற மக்களுக்கு ஆடு, மாடு வழங்கும் திட்டங்கள் வரவேற்கத்தக்கவை. இத்தகைய திட்டங்களோடு சமூக மாற்றத்தை உண்டாக்கும் அரசுப் பணிகளில் பெண்களுக்கும் சிறுபான்மையினருக்கும் இடஒதுக்கீடு போன்றவற்றை கொண்டுவருவது குறித்து பரிசீலிக்க வேண்டும்.

திறமையாளர்களை பயன்படுத்துதல்

தொழிற்நுட்ப மேலாண்மை வல்லுநரான பிரசாந்த் கிஷோரும் டெல்லி பல்கலைக் கழகத்தின் சமூகவியல் பேராசிரியரும் ராஷ்ட்ரிய ஜனதா தளத்தின் தேசிய செய்தித் தொடர்பாளருமான பிரகாஷ் ஜா ஆகிய இருவரும் மகா கூட்டணியின் வெற்றி ஃபார்முலாவை வடிவமைத்தவர்களாக கைக்காட்டப்படுகிறார்கள்.

மகா கூட்டணியின் வேட்பாளர்களைத் தேர்வு செய்வதிலிருந்து, சமூகத்தின் வேர் வரைச் சென்று மக்களின் பிரச்சினைகளை தேவைகளை சேகரித்து அதை வைத்து தேர்தல் பிரச்சார உத்தியை வடிவமைத்தவர்கள் இவர்கள். சமூகத்தின் வேர்களைத் தேடிச் சென்றதே டெல்லியில் ஆம் ஆத்மியின் வெற்றிக்காரணமாக அமைந்தது என்பது இந்த இடத்தில் சுட்டிக்காட்டத் தகுந்தது.

தமிழகத்தில் மக்கள் நலக் கூட்டணியில் உள்ள வைகோ அநேகமாக மக்களை பாதிக்கும் அனைத்து பிரச்சினைகளுக்காகவும் குரல் கொடுக்கிறார். விடுதலைச் சிறுத்தைகள் தலித் பிரச்சினைகளை அறிந்து வைத்திருக்கிறது(தலித் பிரச்சினைகளுக்காக குரல் கொடுக்கிறதா என்பது கேள்விதான்) அதேபோல மார்க்சிஸ்ட், இந்திய கம்யூனிஸ்ட் கட்சிகள் தலித், சிறுபான்மையினர், விவசாயிகள், தொழிலாளர் பிரச்சினைகளுக்கு களத்தில் இறங்கிப் போராடுகிறது. ஆனால், இவர்களால் இந்த அடித்தள மக்களை ஒன்றிணைக்கும் வல்லமை இல்லை. அதை வசமாக்க சரியான திட்டமிடல் தேவை, அதை நிபுணர்களால் மட்டுமெ செய்ய முடியும்.

எதிரியைப் பேச விடுங்கள்

எதிரியை பேச விட்டுப் பார்ப்பது ஒரு வகை தந்திரம். அதை சரியாகச் செய்தார்கள் லாலுவும் நிதிஷும். நாட்டின் பிரதமே நேரடியாக களத்தில் இறங்கில் 40 பொதுக்கூட்டங்களில் பேசுகிறார் என்றால் எத்தகைய தலைவருக்கும் கலக்கம் இருக்கத்தான் செய்யும். ஆனால் அதை மிக சாதுர்யமாகக் கையாண்டது மகா கூட்டணி.

மோடியின் பேரணி, பொதுக்கூட்டம் நடந்த பிறகே, நிதிஷின் கூட்டம் நடக்கும். மோடி என்ன பேசினாரோ அதற்கு பதிலடி கொடுக்கும் வகையில் அந்தக் கூட்டத்தில் நிதிஷ் பேசுவார். லாலு தன்னுடைய நகைச்சுவையான பேச்சு மூலம் பாஜகவினரை விமர்சனம் செய்தார். படோபடமாக நடந்த மோடியின் கூட்டங்களைப் போல் அல்லாமல் நிதிஷின் கூட்டங்கள் இயல்பாக இருந்தன.

பாக்சர் என்ற இடத்தில் நரேந்திர மோடியின் பேச்சும், அமித் ஷா ரக்சல் என்ற இடத்தில் பேசியது மக்களை பிளவுபடுத்தக் கூடியவையாக இருந்தன. பிரதமரின் மாண்பை குலைப்பவையாக அவை இருந்தன என்று விமர்சனம் வைக்கப்பட்டது. நிதிஷின் பதிலடி பேச்சு அவரை மரியாதைக்குரிய அரசியல்வாதியாக மக்கள் முன் நிறுத்தியது.

தமிழக அரசியலில் பதிலடி, விமர்சனம் என்பது சில நேரங்களில் கீறங்கிவிடுவதுண்டு. அதற்கொரு உதாரணம் ஈவிகேஎஸ் இளங்கோவனின் ஜெயலலிதா குறித்த விமர்சனம். தமிழகத்தில் சரிந்திருந்த காங்கிரசின் செல்வாக்கை சரிசெய்துகொண்டிருந்த இளங்கோவனின் மோடி-ஜெயலலிதா சந்திப்பு குறித்த பேச்சு அவருடைய இமேஜை சரித்தது என்பதில் மாற்றுக் கருத்து இல்லை.

ஊடகத் தொடர்பு அவசியம் மன்னரே!

மத்தியில் ஆளும் நரேந்திர மோடி தலைமையிலான பாஜக அரசுக்கு பெரும்பாலான ஊடகங்கள் முக்கியத்துவம் தந்து செய்திகளை வெளியிட்டன. நரேந்திர மோடியின் பீகார் தேர்தல் பேரணிகள், பொதுக்கூட்டங்கள் தேசிய தொலைக்காட்சிகளில் நேரடியாக ஒளிபரப்பப்பட்டன. தாத்ரி படுகொலைக்கும் எழுத்தாளர்கள் சகிப்பின்மைக்கு எதிராக அறிவிஜீவிகள் முன்னெடுத்த போராட்டத்துக்கும் வாய்த் திறக்காத மோடி, தேர்தல் பிரச்சார மேடைகளில் இடைவிடாமல் பேசினார்.

ஆனால் நிதிஷ் தனக்குக் கிடைத்த ஊடக வாய்ப்பை சரியாகப் பயன்படுத்திக்கொண்டார். தனது உறுதியான தெளிவான கருத்துக்களை ஊடகங்கள் முன்வைத்தது மகா கூட்டணி. ஊடகங்களில் பேசியது சமூக வலைத்தளங்களில் பகிரப்பட்டது.

தேமுதிக தலைவர் எங்களுக்கு ஊடகங்களின் தயவு தேவையில்லை, நாங்கள் மக்களிடம் நேரடியாகப் பேசிக் கொள்கிறோம் என்கிறார். ஊடகமே வாழ்க்கையாகிவிட்ட இந்தக் காலத்தில் இப்படி பேசுவதற்குப் பெயர்தான் அறியாமை. நேரடியாக எல்லா மக்களையும் தேவையான நேரத்தில் சந்திக்க முடிவதில்லை. அதை ஊடகங்கள் எளிமையாக்குகின்றன. ஊடகங்களில் வெளியாகும் செய்திகள் சமூக வலைத்தளங்கள் மூலம் இன்னும் பல லட்சம் பேரை சென்றடைகின்றன. இதை உணராமல் 20 ஆண்டுகள் பிந்தைய அரசியல் செய்தால், 10, 20 சீட்டுகளுக்காகத்தான் கணக்குப் போட வேண்டியிருக்கும்.

விஜயகாந்த் மட்டுமல்ல, தமிழக அரசியல்வாதிகள் பெரும்பாலானவர்கள் ஊடகத்தொடர்பில் மோசமான நிலையில் இருக்கிறார்கள். செய்தி தொலைக்காட்சிகளின் வருகைக்குப் பின் இந்த நிலை மாறியிருக்கிறது என்றாலும் ஊடகத் தொடர்ப்பு இன்னும் பலப்பட வேண்டும் என்பதை இவர்கள் புரிந்துகொள்ள வேண்டும்.

 

‘பீகார் தீர்ப்பு என் தந்தைக்கு கிடைத்த அஞ்சலி’ முகமது அக்லக்கின் மகன்

alaqe

கடந்த மாதம் உத்தர பிரதேச மாநிலத்தின் தாத்ரியில் மாட்டிறைச்சி சாப்பிட்டதாகக் கூறி முகமது அக்லக் அடித்துக் கொல்லப்பட்டார்; அவருடைய இளைய மகன் கடுமையாக தாக்கப்பட்டார். உலகம் முழுவதில் கடும் கண்டனத்துக்கு உள்ளானது இந்தச் சம்பவம். இதைக் கண்டித்து இந்தியாவின் புகழ்பெற்ற எழுத்தாளர்கள், சிந்தனையாளர்கள், அறிவியலாளர்கள், கலைஞர்கள் தங்களுடைய மதிப்பிற்குரிய விருதுகளை துறந்தனர்.

இந்நிலையில், பீகார் சட்டப் பேரவைத் தேர்தல் ஆளும் பாஜக அரசுக்கு மிகக் கடுமையான சோதனையாக அமைந்தது. அந்தச் சோதனையில் கடும் தோல்வியைச் சந்தித்தது வெறுப்பு அரசியலை முன்னெடுத்த பாஜக.

பீகார் மக்கள் அளித்த தீர்ப்பு குறித்து கருத்து தெரிவித்துள்ள முகமது அக்லக்கின் மூத்த மகன் முகமது சர்தாஜ், “பீகார் மக்கள் தன்னுடைய தந்தைக்கு மிகச் சிறந்த அஞ்சலியைச் செலுத்தியிருக்கின்றனர்” என்று டைம்ஸ் ஆஃப் இந்தியா நாளிதழுக்கு அளித்துள்ள பேட்டியில் குறிப்பிட்டுள்ளார்.

“வெறுப்பு அரசியலுக்கு இந்தியாவில் இடமில்லை என்பதையே பீகார் தேர்தல் உணர்த்துகிறது. மதவாதத்துக்கு எதிராக மக்கள் தீர்ப்பு எழுதியிருக்கிறார்கள். மதத்தை முன்வைத்து சண்டை போடுவதால் ஒரு பயனும் ஏற்படப்போவதில்லை என்பதை மக்கள் உணர வேண்டும். அரசியல் அதிகாரத்துக்காக நாட்டை பிளவுபடுத்தி விடாதீர்கள் என்று இந்த நேரத்தில் அரசியல்வாதிகளுக்கு சொல்லிக் கொள்ள விரும்புகிறேன்” என்று கூறியிருக்கிறார் சர்டாஜ்.

 

பீகார் தேர்தலில் பாஜகவுக்கு தோல்வி: இறங்கு முகத்தில் பங்குச் சந்தைகள்

stock_market_1

வெறுப்பு அரசியலை முன்னெடுத்த பாஜக மற்றும் அதனுடும் தொடர்புடைய அமைப்புகளின் நடவடிக்கைகள் இந்தியாவின் வளர்ச்சியைப் பாதிக்கும் என்று உலக வர்த்தக மதிப்பீட்டு நிறுவனமான மூடிஸ் எச்சரித்தது. பாஜகவின் செயல்பாடுகளுக்கு எதிர்ப்புத் தெரிவித்து எதிர்க்கட்சியாக அரசியல் சாராத அறிவுஜீவிகள் போராட்டத்தில் குதித்தனர்.

இந்திய சமூக சூழலில் நிலவிய தெளிவற்ற சூழ்நிலை காரணமாக இந்திய பங்குச் சந்தை வர்த்தகமும் வீழ்ச்சியை சந்தித்திருக்கிறது. அதன் உச்சமாக மத்தியில் ஆளும் பாஜக பீகார் தேர்தலில் படுதோல்வி கண்டுள்ளது. இதனால் திங்கள்கிழமை பங்குச்சந்தைகள் சரிவில் முடிந்தன.

வார வர்த்தகத்தின் முதல் நாளான திங்கள் கிழமை, தொடக்கத்தில் சென்செக்ஸ் கடும் சரிவை சந்தித்தது. வர்த்தக நேர தொடக்கத்தில், மும்பை பங்குச்சந்தை குறியீட்டு எண் சென்செக்ஸ் 502 புள்ளிகள் சரிந்தது. வர்த்தக நேர இறுதியில் தன்னுடைய பென்ச் மார்க் அளவான 26,000 புள்ளிகளுக்குக் கீழே சரிந்தது. அதுபோல தேசிய பங்குச்சந்தை குறியீட்டு எண் நிஃப்டி தன்னுடைய பென்ச் மார்க் அளவான 7900 புள்ளிகளுக்கும் கீழே சரிந்தது.

பொதுவாக தீபாவளி சமயத்தில் பங்குச் சந்தை உச்சத்தில் இருக்கும். காரணம், தீபாவளியில் பங்குவாங்கினால் அந்த வருடம் முழுதும் வணிகம் சிறப்பாக இருக்கும் என்ற நம்பிக்கை. அந்த நம்பிக்கையையும்கூட தகர்த்திருக்கிறது பாஜகவின் முடிவு.