மத போதகருக்கு மொட்டையடித்து, கழுதையில் ஏற்றி ஊர்வலம்: கிறித்துவர்களை குறிவைக்கும் இந்துத்துவ அமைப்புகள்!

ஒடிசா மாநிலம் கந்தமால் பகுதியில் 2008-ஆம் ஆண்டு கிறித்துவர்களின் மதமாற்றத்தை தடுப்பதாகக் கூறி விஷ்வ ஹிந்து பரிஷத் தூண்டிவிட்ட கலவரம் மறக்கக் கூடியதல்ல.  இந்தக் கலவரத்தில் 60 பேர் கொல்லப்பட்டதும் 50 ஆயிரம் மக்கள் தங்கள் உடைமைகளை இழந்து அகதிகளானதும் நடந்தது.  அப்போது ஆட்சியில் இருந்த காங்கிரஸ் தலைமையிலான அரசின் பிரதமர் மன்மோகன் சிங், ‘நாட்டின் அவமானம்’ என்று இதை சொல்லியிருந்தார்.

இந்து மதத்தின் தனித்துவத்தை காப்பாற்றும் பொருட்டு, பழங்குடி மக்கள் கிறித்துவ மதத்துக்கு தாவுவதை தடுக்கும் வகையில் கலவரங்கள் தூண்டிவிடப்பட்டன. விஷ்வ ஹிந்து பரிஷத் அமைப்பின் சாமியார்கள் இதை முன்னின்று நடத்தினர். இந்த சம்பவங்களுக்கெல்லாம் முன்னோடியாக 1999-ஆம் ஆண்டு ஆஸ்திரேலியாவைச் சேர்ந்த பாதிரியார் கிரஹாம் ஸ்டெயின்ஸ் தன்னுடைய இருமகன்களுடன் ஜீப்பில் உறங்கிக் கொண்டிருந்தபோது எரித்துக் கொல்லப்பட்டார். இதைச் செய்தது விஷ்வ ஹிந்து பரிஷத்தைச் சேர்ந்த தாராசிங் என்பவர்.

இந்தச் சம்பவங்களை நினைவுபடுத்தும் வகையில் உத்தர பிரதேசத்தில், வெள்ளிக்கிழமை கிறித்துவ போதகர் ஒருவர் மிகக் கடுமையான முறையில் அவமானப்படுத்தப்பட்டிருக்கிறார். பாதி மழித்த மீசை, பாதி மழித்த தலைமுடி, புருவ முடியும்கூட பாதி மழிக்கப்பட்டநிலையில், செருப்பு மாலைகள் அணிவிக்கப்பட்டு கழுதையில் ஏற்றப்பட்டு ஊர்வலமாக அழைத்து வரப்பட்டிருக்கிறார். இவரை இப்படி ஊர்வலமாக பஜ்ரங் தள் அமைப்பைச் சேர்ந்த 200க்கும் மேற்பட்ட ஆட்கள் அழைத்துச் சென்றனர்.
பஜ்ரங் தள் அமைப்பினர் போதகர் மேல் குற்றச்சாட்டு, மூன்று இந்துக்களை ஏமாற்றி கிறித்துவர்களாக மதம் மாற்றி அவர்களை மாட்டிறைச்சி உண்ண வைத்தார் என்பதே. மாட்டிறைச்சியை வேண்டுமென்றே உண்ண வைத்தார் என்று இவர்கள் அழுத்தம் சேர்த்துக் கொள்கின்றனர்.

தனக்கு விருப்பமான மதத்தை பின்பற்றவும் அதைப் பற்றி போதனை செய்யவும் இந்திய அரசியலமைப்புச் சட்டம் ஒவ்வொரு இந்தியரின் அடிப்படை உரிமையாக வரையறுக்கிறது. இந்நிலையில் மதத் தூய்மைவாதம் பேணுகிறோம் என்கிற பெயரில் இந்துத்துவ அமைப்புகள், அடிப்படை உரிமைகளை பறிக்கும்வகையிலும் மனிதத் தன்மையற்ற முறையிலும் இத்தகைய செயல்களைச் செய்கின்றன. உபியில் மனிதத்தன்மையற்று போதகரிடம் நடந்து கொண்டவர்கள் யாரும் இதுவரை கைது செய்யப்படவில்லை.

இந்தியாவில் பாஜக ஆட்சிக்கு வந்த பிறகு, 2015-ஆம் ஆண்டில் மட்டும் முஸ்லிம், கிறித்துவ மதத்தினருக்கும் எதிராக 600க்கும் மேற்பட்ட வன்முறைகள் பதிவாகியுள்ளதாக புள்ளிவிவரம் ஒன்று கூறுகிறது. இந்த வன்முறைகளில் 40 பேர் கொல்லப்பட்டிருப்பதாகவும் அந்த விவரம் சொல்கிறது. கிறித்துவர்களுக்கு எதிராக மட்டும் 149 வன்முறைச் சம்பவங்கள். இதில் கொல்கத்தாவில் 70 வயது கன்னிகாஸ்திரி ஒருவர் பாலியல் வன்கொடுமைக்கு உள்ளாக்கப்பட்டதும் அடங்கும்.

பெரும்பாலும் முஸ்லிம்களை குறிவைத்தே அரங்கேறிய வன்முறை சம்பவங்கள், இப்போது கிறித்துவர்களை நோக்கி படர ஆரம்பித்துள்ளன. மவுனப் பிரதமராக பெயர் பெற்ற மன்மோகன் சிங், மத வெறியாட்டங்களைப் பார்த்துக்கொண்டு எப்போதும் மவுனமாக இருந்ததில்லை. ஆனால், அக்லக் அடித்துக் கொல்லப்பட்ட விவகாரமாகட்டும் சிறுபான்மையினருக்கு எதிரான எந்தவொரு வன்முறையாகப்பட்டும் இன்றைய பிரதமர் மோடி, வாயைத் திறக்காமல் மவுனம் காக்கிறார். இந்த மவுனம்தான் இந்துத்துவ அடிப்படைவாதிகளுக்கு வன்முறையை அவிழ்த்துவிட சம்மதமாகத் தெரிகிறதோ என்னவோ?!

தினச்செய்தி(31-01-2016) நாளிதழில் வெளியானது.

#2015 : இந்துத்துவ பரிசோதனைகளின் ஆண்டு!

2014-ஆம் ஆண்டு மக்களவைத் தேர்தல் காங்கிரஸுக்கு பின்னடைவைத் தரும் என்பது அனைவரும் எதிர்ப்பார்த்தது. இந்திய சுதந்திரத்திற்குப் பிறகு, காங்கிரஸ் தவிர, மற்ற கட்சிகள் மத்தியில் பெரும்பான்மைப் பெற்றதில்லை. அந்த வகையில் 2014-ஆம் ஆண்டு மக்களவைத் தேர்தலில் அதிருப்தி காரணமாக காங்கிரஸும் பெரும்பான்மை பெறாது; மற்ற கட்சிகளும் பெரும்பான்மை பெற முடியாது என்றே அரசியல் ஆரூடங்கள் சொல்லிவந்தன. பாரதிய ஜனதா கட்சியை பெரும்பான்மை பெறக்கூடிய கட்சியாக எவரும் கணிக்கவில்லை.

பாரதிய ஜனதா கட்சியின் தேர்தல் திட்டம் ’சிறப்பானதாக’ நடைமுறைப்படுத்தக்கூடியதாக மாற்றி அமைக்கப்பட்டது. இதை மாற்றி அமைத்தது ராஷ்ட்ரிய ஸ்வயம் சேவக் சங்கம்! கூட்டணி ஆட்சி மத்தியில் அமையலாம், அப்படி அமைந்தால் பிரதமர் ஆக்கப்படலாம் என்கிற கனவில் இருந்த எல்.கே. அத்வானியை புறம்தள்ளிவிட்டு, நரேந்திர மோடி முன்னிலைப்படுத்தப்பட்டார்.  அத்வானியும் ஆர் எஸ் எஸ்ஸின் தீவிர தொண்டர்தான், ஆனால் அவருடைய ‘அரசியல்’ காலாவதியாகிவிட்டதாகக் கருதியது ஆர். எஸ். எஸ்.
போலியை மறைக்கும் பொலிவான வளர்ச்சி முகமாகத் தெரிந்தார் மோடி. குஜராத்தில் அவர் முன்வைத்த ‘மத அரசியல்’, ‘வளர்ச்சி’ என்ற பூச்சால் அழகாக பூசி மெழுகப்பட்டிருந்தது. இதை குஜராத் மக்கள் ஏற்றுக்கொண்டார்கள்; அதுபோல இந்த பூச்சை நாடு முழுவதிலும் பரப்புவதற்கு நரேந்திர மோடியைத் தேர்ந்தெடுத்தது ஆர்.எஸ்.எஸ்.

இல்லாததை இருப்பதென காட்ட தொழில்முறை காப்பொரேட் நிறுவனங்கள் தேர்தல் பணியாற்ற அமர்த்தப்பட்டார்கள். வெற்றி எதிர்பாராததாக அமைந்தது. மிகப் பெரும்பான்மையுடன் பாஜக ஆட்சியில் ஏறியது. முதல் ஆறு மாதங்கள் ஆரம்பக் கட்ட அதிகார டாம்பீகங்களைக் காட்டிக் கொள்வதுமாக சென்றது. இந்துத்துவ அமைப்புகள் இந்தக் காலத்தில் எதிர்காலத்திட்டங்களை கூர்தீட்டிக் கொண்டார்கள்.

வழக்கமாக பாஜகவின் மக்கள் பிரதிநிதிகளாக இருக்கும் இந்து சாமியார்கள் ‘சர்ச்சைக்குரிய’ கருத்துக்களை சொல்ல ஆரம்பித்திருந்தார்கள்.  அவற்றை ஆரம்பம் முதலே அது அவர்களுடைய சொந்தக் கருத்து என்று தப்பித்துக்கொள்ளும் வழிமுறையை பாஜக சொல்லக் கற்று வைத்திருந்தது. டெல்லியில் கர்வாப்ஸி(தாய் மதத்துக்கு திரும்புதல்) என்ற பெயரில் ஒடுக்கப்பட்ட இஸ்லாமியர்களையும் கிறித்துவர்களையும் இந்து மதத்துக்கு திருப்பிக் கொண்டிருந்தன இந்துத்துவ அமைப்புகள். அதன் அடுத்த கட்டமாக  2015 ஜனவரியில் டெல்லியில் கிறித்துவ ஆலயங்கள் மீது தாக்குதல் நடந்தது. குடியரசு தின விழாவில் சிறப்பு விருந்தினராகக் கலந்து கொண்ட ஒபாமா, அமெரிக்காவுக்குச் சென்று தேவாலய தாக்குதல்கள் குறித்து கண்டித்தார்.

“மதமாற்றத்தை மத்திய அரசு முழுமையாக தடை செய்யும் வரை தாய் மதம் திரும்பும் நிகழ்வுகள் தொடர்ந்து நடைபெறும்” என விசுவ இந்து பரிஷத் தலைவர் ப்ரவீன் தொகாடியா பேசினார்.  ஆனால் அரசு தரப்பில் இருந்து கண்டிப்புக்கு பதிலாக கண்டுகொள்ளாத தன்மை வெளிப்பட்டது. இந்த கண்டுகொள்ளாத தன்மையை இந்த அமைப்புகளுக்கு பாஜக அரசு தரும் க்ரீன் சிக்னலாக புரிந்து கொள்ள வேண்டும்.

நாடுமுழுவதும் அடுத்த மூன்று மாதங்கள் கர்வாப்ஸி நிகழ்வுகள் ஜரூராக நடந்தன. தமிழகத்திலும் ஆங்காங்க ஒரு சிலர் இந்துக்களாக மதம் மாறினர். இந்துக்களாக மதம் மாற இந்து அமைப்புகள் பணம் கொடுத்ததாக பத்திரிகைகள் துப்பு துலக்கிய நேரத்தில், இந்து அமைப்புகள் அடுத்த விவகாரத்துக்கு தாவின. இந்த முறை அவர்களின் கவனம் பகுத்தறிவாளர்கள் பக்கம் திரும்பியது.

மகாராஷ்டிரத்தைச் சேர்ந்த கோவிந்த் பன்சாரே, சமகாலச் சூழலில் இந்துத்துவ மோசடிகளை, மூடநம்பிக்கைகளை கேள்வி கேட்டவர். கோயில்களில் தலித்துகள், பெண்களுக்கு மறுக்கப்படும் வழிபாட்டு உரிமைகளுக்காக அவர் தொடர்ந்து குரல் கொடுத்தார்; இயக்கம் நடத்தினார்.  சிவாஜியை முன்னிறுத்தி சிவ சேனாவும் மற்ற இந்து அமைப்புகளும் மத அரசியலை முன்னெடுத்துக் கொண்டிருந்த வேளையில் பன்சாரே எழுதிய ‘சிவாஜி யார்?’ என்கிற புத்தகம் சிவாஜியின் உண்மையான வரலாற்றைச் சொன்னது. ஏற்கனவே தங்களின் ‘எதிரி’கள் பட்டியலில் இடம்பெற்றிருந்த அவரை, பாஜக ஆட்சிக்கு வந்த பிறகு ஒழிப்பது இந்துத்துவ அமைப்புகளுக்கு மிக எளிதான செயலாகத்தான் இருந்தது. அதிகாலையில் நடைபயிற்சிக்குச் சென்றிருந்த பன்சாரே நெற்றிப் பொட்டில் சுடப்பட்டார்.

நாடு முழுவதும் இந்துத்துவ அமைப்புகளின் எழுச்சி ஆரம்பித்த அதே காலக்கட்டத்தில் தமிழகத்தில் அந்த எழுச்சியானது எழுத்தாளர் பெருமாள் முருகனை முன்வைத்து நடந்தேறியது. பெருமாள் முருகன் எழுதிய மாதொருபாகன் வெளியானபோது வராத விமர்சனம், இரண்டு ஆண்டுகளுக்குப் பிறகு வருகிறது.  தங்கள் சாதி மக்களை தவறாக சித்தரிப்பதாக ஒரு குறிப்பிட்ட சாதி சங்கங்கள் போராட்டங்கள் என்ற பெயரில் கட்டப் பஞ்சாயத்துக்களை நடத்தின. அதற்கு இந்துத்துவ அமைப்புகள் முழு ஆதரவும் கொடுத்தனர். இறுதியில் பெருமாள் முருகன் என்ற எழுத்தாளர் இறந்துவிட்டார் என்று அவரையே எழுத வைத்தார்கள்.

இந்துத்துவம் முன்வைக்கும் ‘புனித’ பிம்பங்களுக்கு எதிராக எழுதுவதையோ, விமர்சிப்பதையோ வேரறுக்க வேண்டும் என்பதை முதல் பணியாக இந்துத்துவ அமைப்புகள் கொண்டன. அடுத்த ‘பலி’யை அவர்கள் தேடிக்கொண்டிருந்தார்கள். எம். எம். கல்புர்கி, பசவண்ணரின் தத்துவ சாரத்தை மீண்டும் மக்கள் முன்வைத்த சிந்தனையாளர், பேராசிரியர். கர்நாடகத்தில் இந்து மதம் முன்வைத்த சாதி தீண்டாமையை ஒழிக்க புதிய மதத்தை தோற்றுவித்தவர் பசவண்ணர்.

காலப் போக்கில் பசவண்ணரை இந்துத்துவ சக்திகள் இந்து மத ஞானியாக மாற்றினர், அவருடைய கொள்கைகளை மழுங்கடித்தனர். இதனை மீண்டும் கர்நாடக மக்களுக்கு நினைவுபடுத்தும் பணியைச் செய்து வந்தார் கல்புர்கி. இந்து மதம் உருவ வழிபாட்டை முன்வைத்த போது, அதை மறுத்த பசவண்ணிரின் கருத்துக்களை கல்வி மேடைகளில் பேசினார். இதுதான் இந்துத்துவ அமைப்புகளுக்கு  பிரச்சினையாக இருந்தது. கோவிந்த் பன்சாரே கொல்லப்பட்ட அதே பாணியில் கல்புர்கியும் சுட்டுக்கொல்லப்பட்டார்.

கல்புர்கியின் மரணம்தான் இந்தியாவின் மனசாட்சியை எழுப்பி விட்டது. சமூகத்தின் மனசாட்சிகளாக கருதப்படும் எழுத்தாளர்கள் போராட்டத்தில் இறங்கினார்கள்.  இந்தியாவின் பெருமைக்குரிய விருதாகக் கருதப்படும் சாகித்ய அகாடமி விருதுகளைத் திருப்பி அளித்தார்கள். அரசியல் சார்பற்று தன்னெழுச்சியாக நடந்தது இந்தப் போராட்டம். தமிழ் எழுத்தாளர்களைத் தவிர, அனைத்து இந்திய மொழிகளில் எழுதும் விருது பெற்ற எழுத்தாளர்கள் தங்களுடைய விருதைத் திருப்பி அளிப்பதன் மூலம் இந்துத்துவ அமைப்புகளின் ‘தாலிபான்’ கலாச்சாரத்தைக் கண்டித்தார்கள்.

ஒருபுறம் எழுத்தாளர்களின் விருதைத் திருப்பி அளிக்கும் போராட்டம் வலுக்க ஆரம்பித்த அதே நேரத்தில், மாட்டிறைச்சி அரசியலை பாஜகவும் இந்துத்துவ அமைப்புகளும் கையில் எடுத்தன. ‘புனித பசு’ என்னும் முன்னிறுத்தி இவர்கள் செய்து வந்த ‘வெறுப்பு’ அரசியலின் விளைவாக உத்திர பிரதேசத்தில் முகமது அக்லக் என்னும் அப்பாவியின் உயிர் பறிக்கப்பட்டது. ‘அடித்துக் கொல்லுதலை’ நியாயப்படுத்த புராணங்களை துணைக்கு வரவழைத்துக் கொண்டார்கள் இந்துத்துவ சக்திகள். முகமது அக்லக்கின் கொலையில் உள்ளூர் பாஜகவினரே குற்றவாளிகளாக இருந்தார்கள்.

‘300 ஆண்டுகளுக்குப் பிறகு இந்து ஆட்சி’ அமைந்ததில் 300 ஆண்டுகாலமாக செய்ய மறுக்கப்பட்ட அத்தனை விஷயங்களையும் பாஜகவின் ஐந்தாண்டுகால ஆட்சியில் செய்து விடலாம் என்கிற முனைப்பில் பாஜகவின் மறைமுக அஜெண்டாவாக இருக்கிறது என்பதும் அதற்கான முன்னோட்டமாக இந்த ஆண்டின் அடுத்தடுத்த நிகழ்வுகளை அரங்கேற்றின இந்து அமைப்புகள்.  முஸ்லிம், கிறித்துவர் உள்ளிட்ட சிறுபான்மையினரை தாய் மதம் திரும்ப அழைப்பது, மறுப்பவர்களை பாகிஸ்தானுக்குப் போ என்று சொல்வது, உணவை முன்வைத்து மக்களைப் பிரிப்பது, கல்வி அமைப்புகளில் இந்துத்துவ ஆட்களை நியமிப்பது, அறிவியலுக்குப் புறம்பான புராண கதைகளை உண்மையென நிறுவ முயல்வது, பகுத்தறிவாளர்களை அச்சுறுத்துவது என இந்த ஆண்டு இந்துத்துவத்தின் ‘எழுச்சி’ ஆண்டாகவே அமைந்துவிட்டது.

மக்களால் தேர்ந்தெடுக்கப் பட்ட அரசு என்கிற முத்திரையுடன் பாஜக அரசு மிக நுணுக்கமான வேலைகளைச் செய்ய ஆரம்பித்திருக்கிறது. அடுத்தடுத்த ஆண்டுகளில் இந்த நுணுக்கங்கள் வெளிப்படையாக அரசிடமிருந்தே வெளிப்படலாம். ராமர் கோயில் கட்டுவது உள்ளிட்ட ஏராளமான திட்டங்களை வைத்து  பிரித்தாளக் காத்திருக்கிற இந்துத்துவ சக்திகளிடமிருந்து மக்கள் எப்படி தங்களைக் காத்துக்கொள்ளப் போகிறார்கள்? புத்தாண்டை வரவேற்கும் வேளையில் இந்தக் கேள்விக்கான பதிலையும் தேடுவோம்…

தினச்செய்தி(1-1-2016) நாளிதழில் வந்த கட்டுரை.

அணுகுண்டு, கேரள இல்லத்தில் மாட்டிறைச்சி, இந்தியாவின் மகள்

geetha q

நாட்டில் பரவிவரும் ஆபத்தான மதவாதத்தை தடுத்து நிறுத்துமாறு குடியரசுத் தலைவர் பிரணாப் முகர்ஜிக்கு கடிதம் எழுதியிருக்கிறார்கள் இந்திய அறிவியலாளர்கள். மதவாத செயல்பாடுகளுக்கு எதிர்ப்புத் தெரிவித்து தங்களுடைய சாகித்ய அகாதமி விருதுகளைத் திருப்பி அளித்தார்கள் எழுத்தாளர்கள். அடுத்து ஓவியக் கலைஞர்கள்- விமர்சகர்கள் தங்களுடைய எதிர்ப்பை பதிவு செய்திருந்தனர். அதேபோல் சமூகவியலாளர்களும் தங்களுடைய எதிர்ப்பை சொல்லியிருந்தனர். இந்த வரிசையில் தற்போது அறிவியலாளர்களும் இணைந்திருக்கிறார்கள்.

அறிவியலாளர்கள் குடியரசுத் தலைவருக்கு எழுதியுள்ள கடிதத்தில், “மக்களைப் பிரித்தாளும் சூழ்ச்சி அணுகுண்டைவிட மோசமானது. அது எந்த நேரத்திலும் வெடித்து சமூகத்துக்கு மாபெரும் சேதங்களை நிகழ்த்தக்கூடியது.

பன்முகத்தன்மையுள்ள நமது கலாச்சாரத்தை தக்கவைத்துக்கொள்ளும் நிலைக்கு நாம் இப்போது தள்ளப்பட்டுள்ளோம். புத்தரும் காந்தியும் சொன்ன அறவழிகளை நாம் மறந்துவிட்டோமா என்கிற கேள்வி இப்போது எழுந்திருக்கிறது. அமைதிக்காக எழுந்து நின்ற மாபெரும் அறிவியல் மேதையான ஐன்ஸ்டீனின் சார்புக் கொள்கையின் நூற்றாண்டைக் கொண்டாடிக் கொண்டிருக்கும் இந்த நேரத்தில் அவருடைய வழியில் அமைதியையும் நல்லிணக்கத்தையும் வலியுறுத்துகிறோம்.

மதவாத, பிரிவினைவாத சக்திகளின் சமீபத்திய நடவடிக்கைகள் அப்பாவிகளையும் பகுத்தறிவாளர்களையும் பலிவாங்கிக் கொண்டிருக்கிறது. இனியாவது அரசாங்கம் விழித்துக் கொண்டு மாட்டிறைச்சியின் பேரில் நடக்கும் கொலைகளையும் கருத்து சுதந்திரத்தை எதிர்க்கும் சக்திகளையும் ஒடுக்க நடவடிக்கை வேண்டும்” என தெரிவித்துள்ளனர்.

இந்த கடிதத்தில் 16 அறிவியலாளர்கள் கையெழுத்திட்டுள்ளனர்.

1. நரேஷ் தாதிச்

2. பேரா. ஜி.ராஜசேகரன்

3.பேரா. ஏ.பி. பாலச்சந்திரன்

4. பேரா. ஜி. பாஸ்கரன்

5. பேரா. வருண் சாஹ்னி

6. பேரா. டி.ஆர்.கோவிந்தராஜன்

7. பேரா.பார்த்தா மஜும்தார்

8. பேரா.தாபிஸ் குரேஷி

9. பேரா. அஞ்சன் அனந்த சென்

10. பேரா. சுரேஷ் கோவிந்தராஜன்

11. பேரா. விக்ரம் சோனி

12. பேரா. தாவூத் கோத்வாலா

13. பேரா. சுதிப்தா சராக்கர்

14. பேரா. எச். எஸ்.மணி

15. பேரா.சுமதி ராவ்

16. பேரா. அசோகி சென்

17. பேரா. அஜித் மோகன் ஸ்ரீவத்சவா

18. பேரா. டெபாசிஸ் கோஷல்

19. பேரா. என்.டி. ஹரிதாஸ்

 

திங்கள்கிழமை டெல்லி கேரள இல்லத்தில் பசு மாட்டிறைச்சி பரிமாறப்படுவதாக வந்த புகாரின் அடிப்படையில், கேரள இல்ல உணவகத்துக்குள் நுழைந்து சோதனை செய்தது டெல்லி காவல்துறை. இதுகுறித்து கேரள முதல்வர் கடும்கண்டனம் தெரிவித்திருந்தார். டெல்லி முதல்வர் அரவிந்த் கெஜ்ரிவாலும் இதைக் கண்டித்திருந்தார்.

இதையும் படியுங்கள்: டெல்லி போலீஸ் பாஜக சேனைப் போல் செயல்படுகிறது:கெஜ்ரிவால்

செவ்வாய்கிழமை பிரதமர் நரேந்திர மோடிக்கு, கேரள முதல்வர் உம்மன் சாண்டி கடிதம் எழுதியிருந்தார். அதில், கேரள இல்லத்துக்குள் அனுமதி இல்லாமல் நுழைந்த டெல்லி காவல்துறையின் நடவடிக்கை குறித்து உள்துறை அமைச்சகம் விசாரிக்க வேண்டும் என்று சொல்லியிருந்தார்.

மத்திய அமைச்சகத்தில் இருந்து பதில் ஏதும் வராத நிலையில்,கேரள முதல்வர் உம்மன் சாண்டி டெல்லி காவல் துறை மீது சட்ட நடவடிக்கை எடுக்கவிருப்பதாக அறிவித்திருக்கிறார்.

காவல்துறை சோதனையைக் கண்டித்து கேரள எம்பிக்கள் போராட்டம்
காவல்துறை சோதனையைக் கண்டித்து கேரள எம்பிக்கள் போராட்டம்

தவறான புகாரை பதிவு செய்த இந்து சேனா என்ற அமைப்பைச் சேர்ந்த விஷ்ணு குப்தா, பாஜக தலைவர்களுடன் நெருக்கமான தொடர்பில் இருப்பதாக புகைப்படங்களுடன் சமூக வலைத்தளங்களில் செய்தி பரவி வருகிறது. இந்நிலையில், விஷ்ணு குப்தாவை கைது செய்திருக்கிறது டெல்லி காவல்துறை.

இதையும் படியுங்கள்: “காங்கிரஸ்+பசு=பாஜக”

சர்ச்சையை ஏற்படுத்தியிருக்கும் இந்த சூழ்நிலையில் புதன்கிழமை முதல் வழக்கம்போல மாட்டிறைச்சி உணவுகள் பரிமாறப்படும் என அறிவித்திருக்கிறது கேரள இல்ல உணவக நிர்வாகம்.

இந்தியாவின் மகள் என்று கொண்டாடப்படும் கீதாவை காப்பாற்றி வளர்த்ததற்கு நன்றி சொல்லி ‘எதி’ என்ற பாகிஸ்தானிய அமைப்புக்கு ரூ. ஒரு கோடி நிதி அளிப்பதாக அறிவித்தார் இந்திய பிரதமர் நரேந்திர மோடி. இதை வெளிப்படையான காரணங்கள் எதுவும் சொல்லாமல் வேண்டாம் என்று நாசூக்காக மறுத்திருக்கிறார் ‘எதி’அமைப்பின் நிறுவனர் ஃபைசல் எதி.

பாகிஸ்தானில் செயல்பட்டுவரும் தன்னார்வத் தொண்டு நிறுவனமான எதி, 64 வருடங்களாகச் செயல்பட்டு வருகிறது. இதுவரை 40 ஆயிரம் குழந்தைகளுக்கு உதவியிருக்கிறது. 50 ஆயிரம் ஆதரவற்றோர்களுக்கு வாழ்வளித்திருக்கிறது. இந்நிலையில் இந்திய பிரதமர் அளிப்பதாகச் சொன்ன கணிசமான நிதி, நிறுவனத்தின் மூலம் உதவி தேவைப்படும் பலரை சென்றடைந்திருக்கும். ஆனால், எதி அதை மறுத்திருக்கிறது. ஏன் மறுத்தது?

கடந்த மாதம் பாகிஸ்தானில் இருந்த வந்த ஒரு குடும்பம், மும்பை ஹோட்டல் ஒன்றில் தங்க இடம் கேட்டது. ஆனால் அந்த ஹோட்டல் தங்க இடம் தரவில்லை. இதனால் அந்தக் குடும்பம் ஓர் இரவை மும்பை வீதிகளில் கழிக்க நேர்ந்தது. ‘அதிதி தேவோ பவ’ என வெளிநாட்டு விருந்தினர்களை அன்போடு அழைக்கும் இந்தியாவில்தான் பாகிஸ்தானியர் என்ற காரணத்துக்காக குழந்தைகள், முதியவர்களைக் கொண்ட அந்தக் குடும்பம் இந்திய மண்ணில் அல்லல்பட்டிருக்கிறது.

இந்தியாவின் மகளை அன்பொழுக வரவேற்ற இந்திய பிரதமர்
இந்தியாவின் மகளை அன்பொழுக வரவேற்ற இந்திய பிரதமர்

பாகிஸ்தானுடம் கிரிக்கெட் விளையாடக் கூடாது, பாகிஸ்தானிய பாடகர்கள்-அரசியல்வாதிகள் இந்தியாவுக்கு வரக்கூடாது என ஆளும் பாஜகவின் உறவு அமைப்புகள் பிரச்சாரம் செய்வதும் அதை கட்டாயப்படுத்துவம், சில நேரம் வன்முறையில் இறங்குவதும் தொடர்கதையாகி வருகிறது. இந்தச் சூழ்நிலையில் முக்கியமான செய்தியை நிதிய மறுத்திருப்பதன் சொல்லியிருக்கிறது ‘எதி’ அமைப்பு.

15 ஆண்டுகளுக்கு முன்பு பாகிஸ்தானில் வந்திறங்கிய பேச முடியாத கீதா என்ற பெண்ணைக் காப்பாற்றியது எதி அமைப்பு. எதி அமைப்பின் நிறுவனரின் குடும்பமே கீதாவைத் தத்தெடுத்து வளர்த்திருக்கிறது. இன்னொரு முக்கியமான தகவல் கீதாவை அவருடைய இந்து மத வழிபாட்டுப் பழக்கத்தையே இதுநாள் வரை, அந்த இஸ்லாமிய குடும்பத்தில் பின்பற்றி வந்திருக்கிறார் என்பதே அது. இஸ்லாமியர்கள் என்றாலே மதமாற்றம் செய்வதுதான் அவர்களுடைய வேலை என்று வெறுப்புப் பிரச்சாரம் மேற்கொள்ளும் இந்துத்துவ அமைப்புகளுக்கு நல்லதொரு செய்தி சொல்கிறது இது.

பெற்றோர் யார் என்று கண்டுபிடிக்க முடியாத நிலையில், இந்தியர் என்ற ஒரே காரணத்துக்காக ‘இந்தியாவின் மகளை’ இந்தியாவுக்கு அழைத்து பெருமைத் தேடிக்கொள்ள நினைத்தது பாஜக அரசு. ஆனால், நாம் பாகிஸ்தானியரை எப்படி நடத்துகிறோம் என்கிற குற்றவுணர்வு கொள்ளும் கேள்வியைக் கேட்கிறார் இந்தியாவின் மகள்!

 

 

பீகார் தேர்தல்: எடுபடாத மோடி மந்திரம்!

modi in bihar

நரேந்திர மோடியை முன்வைத்து பெரும்பான்மை பலத்துடன் மத்தியில் ஆட்சியைப் பிடித்த பாஜக, அடுத்தடுத்து வந்த மாநில தேர்தல்களில் வெல்லும் முனைப்புடன் இருக்கிறது. பாஜக ஏற்கனவே பலத்துடன் இருந்த மகாராஷ்டிரா போன்ற மாநிலங்களில் வெற்றி பெற முடிந்தது. ஜம்மு காஷ்மீர் மாநிலத்தில் கணிசமான வெற்றியைப் பெற்று கூட்டணி ஆட்சியமைத்திருக்கிறது. மத்தியில் பெரும்பான்மைக்கு வித்திட்ட மோடி மந்திரத்தைப் பயன்படுத்தி டெல்லியில் ஆட்சியைப் பிடித்துவிடலாம் என பாஜக கணக்குப் போட்டது. ஆம் ஆத்மியில் இருந்த கிரண் பேடியை அழைத்து வந்து, பாஜக முதல்வராக முன்நிறுத்தி வாக்கு கேட்ட போதும் பாஜகவுக்கு கடும் தோல்வியே மிஞ்சியது. மோடி தலைமையிலான பாஜக அரசுக்கு கிடைத்த மிகப் பெரிய பின்னடைவாக அமைந்தது இது.

அதனால் பீகார் தேர்தலைப் பொறுத்தவரை வென்றாக வேண்டிய கட்டாயத்துடன் களமிறங்கியது பாஜக. தேர்தல் வருவதற்கு சுமார் ஒரு வருட காலத்துக்கு முன்பே தனது தேர்தல் பணிகளைத் தொடங்கிவிட்டது பாஜக தலைமை. பீகார் முன்னாள் முதல்வர் ஜிதன்ராம் மன்ஜிஹியை முன்வைத்து ஐக்கிய ஜனதா தளத்தை பிரித்தாளும் சூழ்ச்சியில் ஈடுபட்டது. இறுதியில் ஜிதன் ராம் பதவி நீக்கம் செய்யப்பட்டு, மீண்டும் முதல்வரானார் ஐக்கிய ஜனதா தளம் கட்சியின் தலைவர் நிதிஷ் குமார். ஜிதன் ராம், இந்துஸ்தானி அவாம் மோட்சா என்ற புதுக்கட்சியைத் தொடங்கி பாஜக கூட்டணியுடன் தேர்தலை சந்திப்போம் என்று அறிவித்தார்.

தேர்தல் அறிவிப்பு வரும் முன்பே அரசியல் எதிரிகளாக இருந்த லாலு பிரசாத்தும், நிதிஷ் குமாரும் ஒன்றிணைந்து பீகார் தேர்தலை சந்திப்பதாக அறிவித்தார்கள். இதில் காங்கிரஸும் சேர்ந்துகொள்வதாக அறிவித்தது. இந்த மகா கூட்டணியால் பாஜகவுக்கு வேலை கூடியது. பிரதமர் நரேந்திர மோடி, வெளிநாடுகளுக்கு அடுத்தபடியாக பயணம் போகும் மாநிலமாக பீகார் ஆனது. “காட்டு தர்பாருக்கு முற்றுப் புள்ளி வைப்போம்” என்று அறைகூவல் விடுத்தார் பிரதமர். அரசியல் காரணங்களால் பீகாரின் வளர்ச்சி பாதிக்கப்பட்டிருப்பதாகக் கூறி, வளர்ச்சிப் பணிகளுக்காக பீகாருக்கு ரூ.50 ஆயிரம் கோடியை அளிப்பதாகச் சொன்னார் பிரதமர். மத்தியிலும் மாநிலத்திலும் ஒரே அரசு ஆட்சியில் இருந்தால் மக்கள் நலப்பணிகள் விரைவாக நடக்கும் என்றார்.

“மக்களவை தேர்தல் பிரச்சாரத்தில் மோடி என்ன சொன்னார், கடந்த ஒன்றரை ஆண்டுகால பாஜக ஆட்சியில் என்ன செய்திருக்கிறார் என்பதை நாட்டு மக்கள் பார்த்து வருகிறார். வளர்ச்சி என்பது பணக்காரர்களுக்கானதாக இருக்கிறது, ஏழைகளை அது வஞ்சித்துக் கொண்டிருக்கிறது” என்று சனிக்கிழமை நடந்த பீகார் தேர்தல் பிரச்சாரக் கூட்டத்தில் பேசினார் காங்கிரஸ் தலைவர் சோனியா காந்தி. எனவே, மோடியின் ‘வளர்ச்சி’ மந்திரமும் பீகாரில் எடுபடுவதாகத் தெரியவில்லை.

அதோடு, பத்தாண்டு கால நிதிஷ் குமார் தலைமையிலான ஐக்கிய ஜனதா தள அரசின் மீது பீகார் மக்களுக்கு அதிருப்தி எதுவும் இல்லை என்பதும் நிதிஷ் குமார் மீது தனிப்பட்ட முறையில் ஊழல் குற்றச்சாட்டுகள் இல்லை என்பதும் பாஜக கூட்டணி, பீகார் தேர்தலை எதை வைத்து முன்னெடுப்பது என்பதில் குழம்பித் தவிக்கிறது. அதனால்தான் பீகாரின் முன்னாள் முதல்வர் லாலுவின் ஊழல் விவகாரங்களை கிளறி மோடி முதல்கொண்டு அனைத்து தலைவர்களும் காட்டமாக பிரச்சார மேடையில் பேசி வருகிறார்கள். நிதிஷ் குமார்தான் முதல்வர் வேட்பாளர், அவர்தான் ஆட்சியை வழிநடத்தப்போகிறார் என்ற தெளிவான அறிவிப்பின் பின்னால் அந்தக் குற்றச்சாட்டுகளும் பலமிழந்து விட்டன.

உ.பி. தாத்ரியில் நடந்த படுகொலையை முன்வைத்து மோடி கையில் எடுத்த மாட்டிறைச்சி அரசியலும் அவருக்கு பூமராங் ஆக திரும்பி வந்தது. லாலு இந்துக்களும் மாட்டிறைச்சி சாப்பிடுகிறார்கள் என்றார், அதற்கு மோடி, லாலு இந்துக்களை கேவலப்படுத்துகிறார் என்றார். தலித்துகளையும் முஸ்லிம்களையும் கணிசமாகக் கொண்ட பீகாரின் பிரிவினையைத் தூண்டுவதாக அமைந்தது மோடியின் பேச்சு.

தொடக்கத்தில் வந்த கருத்துக் கணிப்புகள் பாஜக தலைமையிலான கூட்டணி ஆட்சியைப் பிடிக்கும் என்று சொல்லின. அடுத்தடுத்த கருத்துக் கணிப்புகள் மீண்டும் நிதிஷ் தலைமையே ஆட்சியமைக்கும் என்கின்றன. பாஜக கூட்டணியின் முதல்வர் யார் என்கிற தெளிவான அறிவிப்பு இன்றி களம் இறங்கியதும் பாஜக கூட்டணியின் பின்னடைவுக்கான காரணங்களாக சொல்லப்படுகின்றன.

இரண்டு கட்ட வாக்குப்பதிவு முடிந்திருக்கும் நிலையில் அடுத்தக் கட்ட வாக்குப்பதிவு பிரச்சாரத்தில் மோடி பங்கேற்பதாக இருந்த பிரச்சாரக் கூட்டங்கள் ரத்து செய்யப்பட்டிருக்கின்றன. பாஜக எம்.பி.யும் நடிகருமான சத்ருஹன் சின்ஹா, பாஜகவின் நட்சத்திர பிரச்சாரகரான மோடியின் கூட்டங்கள் ரத்து செய்யப்படுவது எதிர்மறையான தாக்கத்தை ஏற்படுத்தும் என்று ட்விட்டரில் பகிரங்கமாகப் பேசியிருக்கிறார்.

முதல் இரண்டு கட்ட வாக்குப் பதிவுக்குப் பிறகு தேர்தல் பிரச்சார பேனர்களில் மோடி-அமித் ஷா படங்களுடன் மாநில பாஜகவினர் படங்களை அச்சிட்டிருப்பதும் மோடியின் தாரக மந்திரமான ஆப் கி பார் மோடி சர்க்கார் என்பது நீக்கப்பட்டு, மத்தியிலும் மாநிலத்திலும் ஒரே கட்சி ஆட்சியின் மூலம் வேகமான வளர்ச்சி காணுவோம் என்கிற வாசகங்கள் இடம் பெற்றிருப்பதும் தேசிய-மாநில கட்சித் தலைமைக்குள் சுமுக உறவில்லை என்பதைக் காட்டுகின்றன. மோடியை அளவுக்கு மீறி முன்னிலைப்படுத்திவிட்டதாகக் கருதுவதாகவும் மாநில பாஜகவினர் சொல்கின்றனர்.

இந்த சந்தர்ப்பத்தை சரியாகப் பயன்படுத்திக் கொண்டிருக்கும் நிதிஷ் குமார், தன்னுடைய ஆட்சியில் இதுவரை பீகார் கண்டிருக்கும் வளர்ச்சியை மீண்டும் ஆட்சி அமைத்தால் அதிகப் படுத்துவேன் என்கிறார். பெண்களை முன்வைத்து அவர் செய்யும் பிரச்சாரம் வரவேற்பைப் பெற்றிருக்கிறது. மாணவிகளுக்கு இலவச சைக்கிள், பஞ்சாயத்துகளில் பெண்களுக்கு சரிபாதி இட ஒதுக்கீடு என பல திட்டங்களை முன்வைத்து பெண்களை கவரும் பிரசாரத்தில் ஈடுபட்டிருக்கிறார் நிதிஷ்.

“பீகார் முழுக்க பயணித்துக் கொண்டிருக்கிறேன். மக்கள் மத்தியிலும் ஏன் பாஜகவினருக்குக் கூட நிதிஷ்குமார் பற்றி எதிர்மறையாக சொல்ல எதுமில்லை. பீகார் மக்கள் அவரை வணக்கத்துக்கு உரியவராகவே பார்க்கிறார்கள்” என்கிறார் பத்திரிகையாளர் ஸ்மித்தா குப்தா.

 

யார் நாவில் சாத்தான்?

பீகாரில் நடைபெறவிருக்கும் சட்டமன்றத்தேர்தலில் எப்படியேனும் ஆட்சியைப் பிடித்துவிடலாம் என்கிற கடுமையான முயற்சியில் இருக்கிறது பாஜக. கடந்த இரண்டு மாதங்களில் வெளிநாட்டுப் பயணங்களுக்கு அடுத்து மோடி அதிகம் செல்லும் இந்திய மாநிலம் பீகார்தான். நிதிஸ்குமார்-லாலு பிரசாத் யாதவ் கூட்டணி வெற்றி பெறக்கூடிய வாய்ப்பு இருப்பதாக தேர்தல் கணிப்புகள் சொல்லும் சூழலில், தனது ஆட்சிக் கனவை மெய்ப்பிக்க பாஜக மேலும் கடுமையாக ‘உழைக்க’ வேண்டியிருக்கிறது. பிரதமர் மோடியின் பிரச்சாரக் கூட்டப் பேச்சும் அந்த வகையில்தான் இருக்கிறது.

மாட்டிறைச்சி உண்பது குறித்து லாலு பிரசாத் யாதவ், ‘இந்துக்களும்கூடத்தான் மாட்டிறைச்சி’ உண்கிறார்கள் என்று சொல்லப்போக, அதற்கு மோடி, லாலுவின் பேச்சு யாதவ மற்றும் பீகார் மக்களை அவமானப்படுத்தி விட்டது. லாலுவின் நாவில் சாத்தான் இறங்கி, இவ்வாறு பேச செய்துள்ளது என்று கடுமையாக விமர்சித்தார். இதுவரையில் அரசியல் எதிரிகளுடன் போராடிய நிலைமாறி, தீய சக்திகளுக்கு எதிராக போராட வேண்டியிருப்பதாக அவர் தெரிவித்தார்.

தாத்ரியில் முகமது அக்லக் கொல்லப்பட்டதற்கு பிரதமர் என்ற முறையில் எந்த சலசலப்பையும் காட்டாதாக பிரதமர், இத்தகைய சம்பவங்களை ஊக்குவிக்கும் வகையில் பேசிவருதாக கண்டனங்கள் எழுந்துள்ளன.

“தாத்ரி படுகொலை தொடர்பாக பிரதமர் மோடி வாயைத் திறந்து விட்டார் என்று சில ஏடுகள் பிரமாதப்படுத்துகின்றன. “நான் உள்ளிட்ட அரசியல் தலைவர்கள் “பொறுப்பற்ற அறிக்கைகளை விடக்கூடும்; மக்களே அவற்றைப் பொருட்படுத்தாதீர்கள்” என்றுதான் அவர் பேசியிருக்கிறார். அதாவது சங்பரிவாரத்தினர் பொறுப்பில்லாமல்தான் பேசுவோம் மக்கள்தான் பொறுத்துப் போக வேண்டும் என்கிறார்!இதற்கு அவர் பேசாமலேயே இருந்திருக்கலாம்.

அதுவாவது பராவயில்லை “இந்துக்களிலும் பசுமாமிசம் சாப்பிடுவோர் உண்டு எனச் சொல்லி லாலு யாதவமகாஜனங்களைக் கேவலப்படுத்தி விட்டார்” பிராமணியக் கலாச்சாரத்தை அனைத்து இந்துக்களின் கலாச்சாரம் போலச் சொல்லி அதிலே சாதியத்தையும் கலந்து தேர்தல் அரசியல் நடத்தியிருக்கிறார் பிரதமர். வெட்கக்கேடாக பேச்சு இது. இதற்கு மோடி பேசாமலே இருந்திருக்கலாம்!” என்று தன்னுடைய கண்டனத்தை இப்போது.காம் மூலம் பதிவு செய்தார் பேராசிரியர். அருணன்.