ராகுல் காந்தி Vs ஆர் எஸ் எஸ்: வலுக்கும் யுத்தம்!

காங்கிரஸ் துணைத்தலைவர் ராகுல் காந்திக்கும் பாரதிய ஜனதா கட்சியின் தாயான ராஷ்டிரிய ஸ்வயம் சேவக் அமைப்புக்கும் மோதல் உச்சக் கட்டத்தை எட்டியுள்ளது. பாஜகவைவிட ஆர் எஸ் எஸ்ஸை கடுமையாக எதிர்க்கிறார் ராகுல் காந்தி. அதுபோல மற்ற எந்த தலைவரைக் காட்டிலும் ராகுல் காந்தியை தொடந்து தாக்கி வருகிறது ஆர் எஸ் எஸ். கொஞ்சம் ஃபிளாஷ் பேக்குக்குப் போவோம்…
கடந்த மக்களவைத் தேர்தலின்போது, மகாராஷ்டிர மாநிலம், தாணே மாவட்டத்தின் சோனாலி என்னும் இடத்தில் நடைபெற்ற தேர்தல் பிரசாரக் கூட்டத்தில் பேசிய ராகுல் காந்தி, “காந்தி ஆர் எஸ் எஸ் காரர்களால் சுட்டுக்கொல்லப்பட்டார். இப்போது ஆர்எஸ்எஸ் காரர்கள் காந்தியைக் கொண்டாடுகிறார்கள்” என்று பேசியிருந்தார். ஆர் எஸ் எஸ் குறித்து  ராகுல் காந்தி வெளிப்படையாக விமர்சனத்துக்கு பிள்ளையார் சுழி போட்டது இந்தப் பேச்சுதான்.
ஆர் எஸ்  எஸ் அமைப்பின் தீவிர ஊழியரான நரேந்திர மோடி பிரதமர் வேட்பாளராக அறிவித்தது எத்தகைய விபரீதத்தை ஏற்படுத்தும் என்று அறிந்து வைத்திருந்ததாலே ராகுல் காந்தி அப்படி பேசியிருக்ககூடும்.  நரேந்திர மோடி பதவியேற்றி ஒவ்வொரு முறையும் பாஜகவினராலும் குறிப்பால ஆர் எஸ் எஸுடன் நெருங்கிய உறவைப் பேணும் அமைச்சர், எம்பிகள்,  எம் எல் ஏக்கல் வெறுப்பு பேச்சு பேசும்போது ராகுல் காந்தி கடுமையாக ஆர் எஸ் எஸை சாடினார்.
மக்களவைத் தேர்தல் நேரத்தில் ராகுல் காந்தி பேசியதற்கு,  தாணே மாவட்ட ஆர்எஸ்எஸ் செயலாளர் ராஜேஷ் குண்டே, பிவாண்டி நடுவர் நீதிமன்றத்தில் ராகுல் காந்தி மீது அவதூறு வழக்குத் தொடர்ந்தியிருக்கிறார்.  அண்மையில் விசாரணைக்கு வந்த இந்த வழக்கில் நீதிபதிகள் ராகுல் காந்தி மன்னிப்பு கோரினால் வழக்கை முடித்துக் கொள்ளலாம் என்ற யோசனையை சொன்னார்கள். ஆனால், ராகுல் காந்தி அதற்கு மறுத்துவிட்டார்.
அதுபோல கடந்துபோன ஜவஹர்லால் நேருவின் பிறந்த நாள் விழாவில் பேசிய ராகுல் காந்தி, “ஆர் எஸ் எஸ்ஸை எதிர்க்கும் மிகப் பெரிய சக்தியாக காங்கிரஸ் இருக்கும். மதச்சார்பின்மை எங்களுடைய மரபணுவில் உள்ளது. அது ஆர் எஸ் எஸ் போன்ற மதவாத அமைப்பை நசுக்கிவிடும்” என்று தெரிவித்தார். இதற்கு பதிலளித்த பாஜக மத்திய அமைச்சர் கிரிராஜ் சிங், “அரசியலில் புதிதாகப் பிறந்த குழந்தையெல்லாம் ஆர் எஸ் எஸ் பற்றி கருத்துச் சொல்லக்கூடாது” என்றார்.
அண்மையில் தொலைக்காட்சி விவாத நிகழ்ச்சி ஒன்றில் பேசிய நிதின் கட்கரி, “ஆர் எஸ் எஸ் தேசப் பக்தர்களின் அமைப்பு. மக்களவைத்தேர்தலுக்குப் பிறகு  காங்கிரஸ் தண்ணீரில் இருந்து தவறி விழுந்த மீனாக நடந்து கொள்கிறது” என்று தெரிவித்தார்.
இதுவரை ‘சாத்வீகமாக’ நடந்துகொண்ட ஆர் எஸ் எஸ், கடந்த வாரம் அஸ்ஸாம் சென்ற ராகுல் காந்தியை கோயிலுக்குள் நுழைய விடாமல் வலுக்கட்டாயமாக தடுத்துள்ளனர். இந்தியாவின் முக்கிய கட்சியின் தலைவர் ஒருவரை கோயிலுக்குள் நுழையவிடாமல் தடுப்பது இந்திய வரலாற்றில் இதுதான் முதல்முறையாக இருக்கும்! இத்தனைக்கும் அஸ்ஸாமில் ஆள்வது காங்கிரஸ் தலைமையிலான அரசு.
மத்தியில் பாஜக ஆட்சியில் இருப்பதால் ஆர் எஸ் எஸ் போன்ற இந்துத்துவ அமைப்புகளுக்கு மாநில அரசின் மீது எவ்வித பயமும் இல்லை. அதன் வெளிப்பாடுதான் இந்த நிகழ்ச்சி என்கிறது காங்கிரஸ். இதுகுறித்து திங்கள் கிழமை நாடாளுமன்றத்துக்கு வெளியே பேசிய ராகுல் காந்தி, “என்னை கோயிலுக்குள் நுழையக் கூடாது என்று சொல்ல இவர்களுக்கு என்ன உரிமை இருக்கிறது?” என வெடித்துத் தள்ளியிருக்கிறார்.
பீகாரில் முன்னெடுத்த மதவாத, வகுப்புவாத அரசியல் பாஜகவுக்கும் ஆர் எஸ் எஸ் போன்ற அமைப்புகளுக்கும் படுதோல்வி தந்துள்ளன. இந்நிலையில் நடிகர் வடிவேலுவின் பாணியில் சொல்வதென்றால் ‘வாண்டட்டா வண்டியில ஏர்றது’ என்பதுபோல இத்தகைய நடவடிக்கைகளால் விரைவில் வரவிருக்கும் அஸ்ஸாம் சட்டப் பேரவைத் தேர்தலில் எதிர்மறை விளைவுகள் ஏற்படும் என்பதை பாஜக-ஆர் எஸ் எஸ் அமைப்பினர் உணர வேண்டும்!

தினச்செய்தி(15-12-2015) நாளிதழில் வெளியான என்னுடைய கட்டுரை.

பழிவாங்கும் அரசியலின் பாஜக முகம் ‘நேஷனல் ஹெரால்டு’!

“நான் இந்திரா காந்தியின் மறுமகள். நான் யாருக்கும் பயப்பட மாட்டேன்?” கடும் சினத்தை வெளிப்படுத்தியிருக்கிறார் காங்கிரஸ் கட்சியின் தலைவர் சோனியா காந்தி. காரணம் பாரதிய ஜனதா கட்சியின் மூத்தத் தலைவர் சுப்ரமணியம் சுவாமி தொடர்ந்து ‘நேஷனல் ஹெரால்டு’ பத்திரிகை வழக்கில் தன்னையும், காங்கிரஸ் துணைத் தலைவர் ராகுல் காந்தியும் குற்றம்சாட்டப்பட்ட இன்னும் சில காங்கிரஸ் பிரமுகர்களையும் வரும் 19-ஆம் நேரில் ஆஜராகும்படி டெல்லி உயர்நீதிமன்றம் ஆணை பிறப்பித்திருக்கிறது என்பதே.

வழக்கின் பின்னணி:

ஜவஹர்லால் நேருவால் தொடங்கப்பட்டது ‘நேஷனல் ஹெரால்டு’ பத்திரிகை. தற்போது வெளிவராத இந்தப் பத்திரிகை அசோசியேடட் ஜர்னல்ஸ் பிரைவேட் லிமிடெட் என்ற நிறுவனத்துக்குச் சொந்தமானது.  இந்தப் பத்திரிகைக்கு அவ்வவ்போது கடனைத் திருப்பி அளிக்க வேண்டும் என்கிற விதிமுறையுடன் காங்கிரஸ் கட்சி ரூ. 90 கோடி வட்டியில்லா கடன் அளித்திருந்தது.  அசலை திருப்பி செலுத்தாததால் இந்த நிறுவனத்தை  2008-ஆம் ஆண்டில் காங்கிரஸ் கட்சிக்குச் சொந்தமான ‘யங் இந்தியா’ என்கிற தொண்டு நிறுவனம் தனதாக்கிக் கொண்டது.

நேஷனல் ஜெரால்டு பத்திரிகைக்கு ரூ. 2000 கோடி மதிப்பிலான அசையா சொத்துக்கள் இருக்கின்றன. எனவே ரூ. 90 கோடி கடனுக்காக எப்படி இவ்வளவு மதிப்பு வாய்ந்த நிறுவனத்தை வளைத்துப் போடலாம் என பாரதிய ஜனதா கட்சியின் சுப்ரமணியம் சுவாமி சர்ச்சையை எழுப்பினார்.  தொண்டர்கள், காங்கிரஸ் அபிமானிகள் கொடுத்த நிதியை எப்படி தனியார் நிறுவனத்துக்கு கடனாகக் கொடுக்கலாம் என்பதும் ‘யங் இந்தியா’ தொண்டு நிறுவனத்தின் அறங்காவலர்களாக சோனியா காந்தியும் ராகுல் காந்தியும் (38 சதவிகித பங்குகளை வைத்திருக்கிறார்கள்) உள்ளனர். அவர்கள் நேஷனல் ஹெரால்டின் சொத்துக்களை அபகரிக்கப்பார்க்கிறார்கள் என்பது சுப்ரமணியம் சுவாமி வைத்த குற்றச்சாட்டு. இந்தக் குற்றச்சாட்டுக்கு பதிலளித்த அப்போது ஆட்சியில் இருந்த காங்கிரஸ், தைரியம் இருந்தால் நீதிமன்றத்துக்குச் சென்று முறைகேட்டை நிரூபியுங்கள் பார்க்கலாம் என்றது.

நீதிமன்றம் போன வழக்கு:

சோனியா காந்தி, ராகுல் காந்தி, காங்கிரஸ் மூத்த தலைவர்கள் மோதிலால் ஓரா, ஆஸ்கர் பெர்னாண்டஸ் ஆகியோர்  மீது சுப்பிரமணியன் சுவாமி டெல்லி நீதிமன்றத்தில் வழக்கும் தொடர்ந்தார். மேலும், பத்திரிகையை வாங்கியதற்கு சட்டவிரோத பணப் பரிவர்த்தனை நடந்தது தொடர்பாக அமலாக்கத் துறையினரும் வழக்கு பதிவு செய்து விசாரித்து வந்தனர். இந்நிலையில், வழக்கில் சில சட்டரீதியிலான காரணங்களுக்காக சோனியா, ராகுலை தொடர்புபடுத்த முடியாது என்று கூறி அமலாக்கத் துறையின் முன்னாள் இயக்குநர் ராஜன் எஸ்.கடோச் விசாரணையை கடந்த ஆகஸ்ட் மாதம் முடித்துக் கொண்டார்.
கடந்த ஆகஸ்ட் மாதம் வழக்கு முடித்து வைக்கப்பட்ட நிலையில், அமலாக்கத் துறை இயக்குநர் பதவியில் இருந்து ராஜன் அதிரடியாக நீக்கப்பட்டார். அவருக்கு பதில், மூத்த ஐபிஎஸ் அதிகாரி கர்னால் சிங் இயக்குநராக நியமிக்கப்பட்டார். இதையடுத்து சோனியா, ராகுல் தொடர்புடைய நேஷனல் ஹெரால்டு முறைகேடு வழக்கை அமலாக்கத் துறை மீண்டும் விசாரிக்கத் தொடங்கியது.

இதில் யார் பாதிக்கப்பட்டவர்கள்?

ஒரு வழக்கு என்றால் அதில் பாதிக்கப்பட்டவர்கள் இருக்க வேண்டும் இல்லையா? ஆனால்,  இந்த வழக்கில் பாதிக்கப்பட்டவர்கள் யாரும் இல்லை. நேஷனல் ஹேரால்டு பத்திரிகை நிறுவனமான அசோசியேடட் ஜர்னல்ஸ் பிரைவேட் லிமிடெட் நிறுவனத்தின் இயக்குநர் இந்த வழக்கில் குற்றம்சாட்டப்பட்ட மோதிலால் ஓரா, ஆஸ்கர் பெர்னாண்டஸும்தான்.  அரசியல் கட்சி பத்திரிகைக்கு நிதி அளிக்கக்கூடாது என்ற வரைமுறையை மீறியதாகவும் சட்டவிரோத பணபரிமாற்றம் நடந்ததாகவும் கூறி வழக்குத் தொடர்ந்திருக்கிறார் சுப்பிரமணியம் சுவாமி. சுப்பிரமணியம் சுவாமிக்கு காந்தி குடும்பத்தின் மீதிருக்கும் ‘வெறுப்பு’ உலக அறிந்த ஒன்று. ‘ராகுல் காந்தி பிரிட்டன் பிரஜை’ என்பது போன்ற அபத்த காமெடிகளை அவ்வவ்போது அவிழ்த்து விட்டுக்கொண்டே இருப்பார்.

அரசியல் பழிவாங்கும் நடவடிக்கையா?

புதிதாக ஆட்சிக்கு வந்த கட்சி, ஏற்கனவே ஆட்சியில் இருந்த கட்சி மீது வழக்கு தொடர்வது இந்திய அரசியலில் வழக்கமான நடைமுறை ஆகிவிட்டது.  பாதிக்கப்பட்டவர்களே இல்லாத, முடித்து வைக்கப்பட்ட வழக்கை, அந்த வழக்கை விசாரித்த அமலாக்கத்துறை அதிகாரியை அதிரடியாக நீக்கி, தனிப்பட்ட இரண்டு நிறுவனங்களின் பணப்பரிமாற்றத்தை வழக்காக்க முடிவதற்குப் பெயர்தான் ‘பழிவாங்கும் அரசியல்’!

நாடாளுமன்றம் ஸ்தம்பித்தது:

இந்த ‘பழிவாங்கும் அரசியல்’ கடந்த மூன்று நாட்களாக நாடாளுமன்றத்தை  ஸ்தம்பிக்க வைத்துக்கொண்டிருக்கிறது. காங்கிரஸ் கட்சியும் பாரதிய ஜனதா கட்சியும் பரஸ்பரம் குற்றச்சாட்டுக்களை சுமத்தி வருகின்றன.  ஜிஎஸ்டி மசோதாவை நிறைவேற்றும் முனைப்பில்  நாடாளுமன்றக் கூட்டத்தொடருக்கு முன் எதிர்க்கட்சி உறுப்பினர்களின் வீடுகளுக்கு விஜயம் செய்து ஆதரவு திரட்டிய பாஜக. ‘சகிப்பின்மை‘ விவாதத்துக்கு ஒத்துக்கொண்டதன் மூலம் காங்கிரஸ், இடதுசாரிகள் உள்ளிட்ட மற்ற எதிர்க் கட்சியினரை அடக்கிவிடலாம் என நினைத்தது பாஜக அரசு. ஆனால் அது நடக்கவில்லை.  இந்த வழக்கில் சோனியா காந்தியும், ராகுல் காந்தியும் வரும் 19-ஆம் நேரில் ஆஜராகும்படி டெல்லி உயர்நீதிமன்றம் ஆணை பிறப்பித்திருக்கிறது. இதனால் காங்கிரஸ் உறுப்பினர்கள் தொடர்ந்து நாடாளுமன்ற இரு அவைகளிலும் கண்டனத்தை பதிவு செய்வதன் மூலம் அவை நடவடிக்கைகளை முடக்கியுள்ளனர்.

தன் மீதுள்ள குற்றச்சாட்டை நீதிமன்றத்தின் முன் பொய்யென நிரூபிக்க காங்கிரஸுக்கு ஏராளமான வாய்ப்பிருக்கிறது. அப்படியிருக்க, இது இரண்டு நிறுவனங்களின் தனிப்பட்ட விவகாரம் என்று சொல்லிக் கொண்ட காங்கிரஸ் கட்சி,  தனிப்பட்ட விவகாரத்தை நாடாளுமன்றத்தை முடக்கப் பயன்படுத்தலாமா?

வெள்ளிக்கிழமை(11-12-2015) தினச் செய்தி நாளிதழில் இந்தச் செய்திக் கட்டுரையின் சுருக்கப்பட்ட வடிவம் வெளியாகியிருக்கிறது.

சோனியாவும் இந்திராவும்

நேஷனல் ஹெரால்டு பத்திரிகை நிறுவனத்தின் சொத்துகளை முறைகேடாக அபகரித்ததாக தொடரப்பட்ட வழக்கில் காங்கிரஸ் தலைவர் சோனியா காந்திக்கும் துணைத் தலைவர் ராகுல் காந்திக்கும் வருகிற 19-ஆம் தேதி நேரில் ஆஜராக வேண்டும் என தில்லியில் உள்ள விசாரணை நீதிமன்றம் உத்தரவு பிறப்பித்துள்ளது.

இது அரசியல் பழிவாங்கும் நடவடிக்கை என்று காங்கிரஸும் சட்டம் தன் கடமையைச் செய்வதாக பாஜகவும் செவ்வாய்கிழமை நாடாளுமன்றத்தில் கடும் வாக்குவாதத்தில் ஈடுபட்டன. இதுகுறித்து ஊடகங்களில் பேசிய சோனியா காந்தி, “நான் ஏன் பயப்பட வேண்டும்? நான் இந்திரா காந்தியின் மருமகள், நான் யாருக்கும் பயப்பட மாட்டேன்” எனக் கடுமையாகப் பேசினார்.

அமைதியான சுபாவமுடையவராக அரசியல் நடத்திக் கொண்டிருந்த சோனியாவை நேஷனல் ஹெரால்டு விவகாரம் கோபத்தைத் தூண்டியிருக்கிறது. பாஜகவின் சுப்ரமணியம் சுவாமி போன்றோரின் பழிவாங்கும் நடவடிக்கை என்றே காங்கிரஸ் ஆரம்பம் முதல் சொல்லிவருகிறது.

இந்நிலையில் புதன்கிழமை சோனியா காந்தியின் பிறந்த நாளை சமூக வலைத்தளங்களில் கொண்டாடினர் காங்கிரஸ் அபிமானிகள். ஃபேஸ்புக்கில் ட்விட்டரிலும் புதன்கிழமை #LongLiveSoniaGandhi  என்பது ட்ரெண்டானது.

இத்தாலியில் பிறந்த இந்தியாவின் முதன்மையான அரசியல் குடும்பத்தில் மருமகளாக நுழைந்த சோனியா, இந்திய பிரதமராகியிருக்க வேண்டியவர். உள்கட்சி அரசியல் காரணமாக அந்த வாய்ப்பைத் தவறவிட்டவர். அவருடைய வாழ்க்கை புகைப்படங்கள் வழியே..

This slideshow requires JavaScript.

 

 

வெள்ள நீரில் நடந்த ராகுல்!

“மோடியும், ஜெயலலிதா ஹெலிகாப்டரில் பறந்து வெள்ள பாதிப்புகளை பார்வையிட்டார்கள். எங்கள் ராகுல் வெள்ளத்தில் இறங்கி பாதிப்புகளைப் பார்க்கிறார்” என மெச்சிக் கொண்டிருக்கிறார் ராகுல் பக்தர்கள் ட்விட்ட்ரில். ஆனால் ரகுலோ வெள்ள விவகாரத்தை அரசியலாக்க விரும்பவில்லை என்கிறார். சென்னை, புதுச்சேரி, கடலூரில் வெள்ள பாதிப்புகளை செவ்வாய்கிழமை பார்வையிட்டு, வெள்ள நிவாரண உதவிகளை வழங்கியிருக்கிறார் ராகுல். வெள்ளம் புகுந்த எங்கள் பகுதியான வில்லிவாக்கம் சிட்கோ நகருக்கும் வந்திருக்கிறார்; படங்கள் இங்கே…

Rahul in Villivakkam rahul (1) rahul (3)

ராகுல் – ஜெட்லி சந்திப்பு: நாடாளுமன்ற நடவடிக்கைகள் சுமூகமாக இருக்குமா?

நாடாளுமன்றக் குளிர்காலக் கூட்டத்தொடர் வரும் 26-ஆம் தேதி தொடங்க இருக்கிறது. முந்தைய மழைக்காலக் கூட்டத்தொடரில் எதிர்க்கட்சிகளின் எதிர்ப்பு காரணமாக பல்வேறு முக்கிய மசோதாக்களை அரசால் நிறைவேற்ற முடியவில்லை.

தேங்கியிருக்கும் மசோதாக்கள்

மாநிலங்களவையில் நிறைவேற்றப்படாத நிலையில் 11 மசோதாக்களும், மக்களவையில் 13 மசோதாக்களும் இருக்கின்றன. இவற்றில் 5 மசோதாக்கள் பல்வேறு துறைகளின் நாடாளுமன்ற நிலைக் குழுக்களின் பரிசீலனையில் உள்ளன.
இதேபோல், மத்திய அரசு உத்தேசித்திருந்த சரக்கு – சேவை வரிகள் மசோதாவும் (ஜி.எஸ்.டி.) முந்தைய கூட்டத்தொடரில் நிறைவேற்றப்படவில்லை.

கூட்டத்தொடர் அறிவிப்பு

நாடாளுமன்றக் கூட்டத்தொடரானது நவம்பர் 26-ஆம் தேதி முதல் டிசம்பர் 23-ஆம் தேதி வரை நடைபெற இருக்கிறது. இந்திய அரசமைப்புச் சட்டம் ஏற்றுக்கொள்ளப்பட்ட தினத்தை (26-11-1949) நினைவுகூரும் விதமாக, கூட்டத்தொடரின் முதல் இரண்டு நாள்களான 26, 27 ஆகிய தேதிகளில் சிறப்பு அமர்வுகளுக்கு ஏற்பாடு செய்யப்பட்டுள்ளது. இந்த அமர்வுகளில் அரசமைப்புச் சட்டத்தில் நமது பங்களிப்பு குறித்தும், அரசியலமைப்புச் சட்டம் தொடர்பான கடமையுணர்வு, அரசமைப்புச் சட்டத்தை உருவாக்குவதில் அம்பேத்கரின் பங்கு குறித்தும் விவாதிக்க முடிவு செய்யப்பட்டுள்ளது. எனவே, அந்த தினங்களில் கேள்வி நேரங்கள் இருக்காது.

வெங்கய்ய நாயுடு கோரிக்கை

குளிர்காலக் கூட்டத்தொடரில் சரக்கு – சேவை வரி மசோதா உள்ளிட்ட முக்கிய மசோதாக்களை அரசு நிறைவேற்றும் என நம்பிக்கைத் தெரிவித்திருக்கிறார் நாடாளுமன்ற விவகாரங்களுக்கான அமைச்சர் வெங்கய்ய நாயுடு. இதுவரை முரண்டு பிடித்துக் கொண்டிருந்த மத்திய அரசு, “இந்த மசோதாக்களை நிறைவேற்ற எதிர்க்கட்சிகள் ஒத்துழைக்க வேண்டும். இந்த விவகாரத்தில் எதிர்க்கட்சிகளுடன் நாடாளுமன்றத்தில் விவாதம் நடத்த அரசு தயாராக உள்ளது” என கீழிறங்கி வந்துள்ளது.

‘பீகார் முடிவுகளை வைத்து நாடாளுமன்றத்தை முடக்கக்கூடாது’

சகிப்பின்மைக்கு எதிரான சூழலும் அதை எதிரொலித்த பீகார் தேர்தல் முடிவுகளும் நாடாளுமன்றத்தை முடக்கக் கூடும் என மத்திய அரசு தெரிந்து வைத்திருக்கிறது.

“பீகார் தேர்தல் முடிவு மக்கள் அளித்துள்ள தீர்ப்பு. அதை நாங்கள் வரவேற்கிறோம். பீகார் மக்கள், அவர்கள் விருப்பப்படி தீர்ப்பு வழங்கியுள்ளனர். இதனை எதிர்க்கட்சிகள் புரிந்துகொள்ள வேண்டும். ஒரு மாநிலத்தின் தேர்தல் முடிவானது அம்மாநிலத்தின் அரசியல், சூழ்நிலை ஆகியவற்றைப் பொருத்தது. அது ஒட்டுமொத்த தேசத்தின் மீதான தாக்கம் கிடையாது. பிகார் தேர்தல் முடிவுகளை முன்னிறுத்தி, நாடாளுமன்றத்தை எதிர்க்கட்சிகள் முடக்க வேண்டாம்” என்று வெங்கய்யா நாயுடு கேட்டுக்கொண்டுள்ளார்.

ராகுல்-ஜேட்லி சந்திப்பு

இதனிடையே இந்திய காங்கிரஸ் துணைத் தலைவர் ராகுல் காந்தியை மத்திய நிதியமைச்சர் அருண் ஜேட்லி புதன்கிழமை சந்தித்துப் பேசினார். அருண் ஜெட்லி, நாடாளுமன்றத்தில் சரக்கு, சேவை வரி மசோதாவை நிறைவேற்ற ராகுலிடம் பேசத் தயார் என அறிவித்திருந்தார். இந்நிலையில் இந்தச் சந்திப்பு நடந்திருக்கிறது. ஆனால் காங்கிரஸ் வட்டாரங்கள் இந்தச் சந்திப்பு தனிப்பட்ட முறையில் நடந்ததாக கூறுகின்றன. முன்னதாக அருண் ஜெட்லி காங்கிரஸ் தலைவர் சோனியா காந்தியையும் முன்னாள் பிரதமர் மன்மோகன் சிங்கையும் சந்தித்துப் பேசினார்.

மகளின் திருமணத்திற்கு அழைப்பு

சந்திப்பு குறித்து செய்தியாளர்களிடம் பேசிய அருண் ஜெட்லி, “எனது மகள் சோனாலியின் திருமண வரவேற்பு நிகழ்வு வரும் டிசம்பர் 9-ஆம் தேதி டெல்லியில் உள்ள எனது இல்லத்தில் நடக்க உள்ளது. ராகுலை அதற்காகவே சந்தித்தேன். அரசியல் நிகழ்வுகள் பற்றியும் பேசினேன்” என்றார்.

எதிர்க்கட்சியினரை தனித்தனியாக சந்தித்து பேச்சு

கடந்த பட்ஜெட் கூட்டத் தொடர், நாடாளுமன்றக் மழைக்காலக் கூட்டத் தொடர் அலுவல்கள் சுமுகமாக நடைபெற காங்கிரஸ், இடதுசாரிகள் உள்ளிட்ட கட்சிகளின் உறுப்பினர்கள் அனுமதிக்கவில்லை. இதனால், இரு அவைகளின் அலுவல்கள் முடிங்கின. அதேநிலை இம்முறையும் தொடரக்கூடாது என்பதற்காக எதிர்க்கட்சித் தலைவர்களை நாடாளுமன்ற விவகாரங்கள் துறை அமைச்சர் வெங்கய்ய நாயுடு, மத்திய இணையமைச்சர் ராஜீவ் பிரதாப் ரூடி ஆகியோர் தனித்தனியாகப் பேசி ஒத்துழைப்பு வழங்குமாறு கோரி வருகின்றனர். இதையொட்டி, வரும் 22-ஆம் தேதி தனது இல்லத்தில் இரு அவைகளிலும் உள்ள முக்கிய அரசியல் கட்சிகளின் தலைவர்களை வெங்கய்ய நாயுடு சந்தித்துப் பேசத் திட்டமிட்டிருக்கிறார்.