“கோகுல்ராஜ் கொலை விசாரணை சரியான திசையில்” : சிபிசிஐடி அதிகாரி

சேலம் மாவட்டம், ஓமலூரைச் சேர்ந்த பொறியியல் பட்டதாரி கோகுல்ராஜ் (23), கடந்த ஜூன் மாதம் 24-ஆம் தேதி பள்ளிபாளையம் வெள்ளிக்குட்டை என்ற இடத்தில் ரயில் தண்டவாளத்தில் தலை துண்டிக்கப்பட்டு இறந்து கிடந்தார். இதுதொடர்பாக, கடந்த 3 மாதங்களில் பலர் கைது செய்யப்பட்டனர். இந்த வழக்கின் முதல் எதிரியான தீரன் சின்னமலை கவுண்டர் பேரவை நிறுவனர் யுவராஜ் (35) தலைமறைவாக இருந்தார்.

இதைப் படியுங்கள்: யுவராஜின் லட்சியம் நிறைவேறியது…எப்படி?

இந்த வழக்கை விசாரித்த திருச்செங்கோடு காவல் துணைக் கண்காணிப்பாளர் விஷ்ணுப் பிரியா கடந்த மாதம் 18-ஆம் தேதி சந்தேகத்துக்கு இடமான வகையில் மரணமடைந்தார். இதையடுத்து, விஷ்ணுப் பிரியா மரண வழக்கும் கோகுல்ராஜ் கொலை வழக்கும் விசாரணை சிபிசிஐடி விசாரணைக்கு மாற்றப்பட்டது. இதற்கிடையே யுவராஜ், விஷ்ணுப் பிரியா கொலைக்கு மேல் அதிகாரிகளின் அழுத்தமே காரணம் என்றும் கோகுல்ராஜ் கொலையில் தனக்கு தொடர்பில்லை என்றும் வாட்ஸ் அப் மூலமாகவும் ஊடகங்கள் வழியாகவும் பேசி வந்தார்.

யுவராஜைப் பிடிக்க சிபிசிஐடி போலீஸார் மூன்று தனிப்படை அமைத்து தேடி வந்த நிலையில், கடந்த ஞாயிற்றுக்கிழமை காலை நாமக்கல் சிபிசிஐடி அலுவலகத்தில் எஸ்.பி. நாகஜோதி முன்னிலையில் யுவராஜ் சரணடைந்தார். பின்னர், அவர் நாமக்கல் கிளைச் சிறையில் அடைக்கப்பட்டார். இந்த வழக்கில் 2-ஆவது முக்கியக் எதிரியாகச் சேர்க்கப்பட்டிருந்த யுவராஜின் கார் ஓட்டுநர் சங்ககிரியைச் சேர்ந்த அருண் (21), கரூர் குற்றவியல் நீதிமன்றத்தில் செவ்வாய்க்கிழமை சரணடைந்தார்.

அவரை சிபிசிஐடி போலீஸார் காவலில் எடுத்து விசாரணை செய்ய மாவட்ட முதன்மைக் குற்றவியல் நீதிமன்றத்தில் மனு தாக்கல் செய்தனர். இந்த மனு மீதான விசாரணை வியாழக்கிழமை நடைபெற்றது. இதில், கார் ஓட்டுநர் அருணை மூன்று நாள் சிபிசிஐடி போலீஸார் காவலில் வைத்து விசாரணை நடத்த நீதிபதி மலர்மதி உத்தரவிட்டார்.

இந்த நிலையில், கோகுல்ராஜ் கொலை தொடர்பாக யுவராஜிடம் சிபிசிஐடி போலீஸார் விசாரணை நடத்தி வந்தனர். வெள்ளிக்கிழமை காலை திருச்செங்கோடு அர்த்தநாரீஸ்வரர் மலைக்கோயிலுக்கு அழைத்துச் சென்று, கோகுல்ராஜ் மற்றும் அவருடன் வந்த பெண் கோயிலில் இருந்தபோது யுவராஜ் மற்றும் அவரது நண்பர்கள் கோகுல்ராஜை அழைத்துச் செல்லும் விடியோ காட்சிகளைக் காட்டி விசாரணை நடத்தினர். மேலும், கோகுல்ராஜ் கொலை செய்யப்பட்ட பள்ளிபாளையம், கிழக்கு தொட்டிபாளையம் ரயில் தண்டவாளப் பகுதிகளுக்கு அழைத்துச் சென்றும் விசாரணை நடத்தினர். இந்த விசாரணை ஆறு மணி நேரத்துக்கும் மேல் நீடித்தது.

இந்நிலையில் கோகுல்ராஜ் கொலையை சிபிசிஐடி விசாரணையின்போது யுவராஜ் ஒத்துக்கொண்டதாக தகவல் வெளியானது. ஆனால், இதனை யுவராஜின் வழக்கறிஞர் பழ.ஆனந்த், மறுத்துள்ளார். இது போன்ற தகவல்களை வேண்டுமென்றே சி.பி.சி.ஐ.டி போலீசார் கசியவிடுவதாகவும் அவர் தெரிவித்தார்.

இதனிடையே கோகுல்ராஜின் சகோதரர் கலைச்செல்வன், அவரது தாத்தா கணேசன் ஆகியோரிடம் சிபிசிஐடி எஸ்.பி. நாகஜோதி தலைமையிலான குழு விசாரணை நடத்தி இருக்கிறது.  கலைச்செல்வனைத் தொடர்பு கொண்டு விசாரணைக் குறித்து கேட்டபோது, “விசாரணை எல்லாம் எதுவும் இல்லை. எஸ்.பி. நாகஜோதி, கோகுல்ராஜ் கொலை வழக்கு விசாரணை சரியான திசையில் சென்றுகொண்டிருக்கிறது. விரைவில் உண்மையைக் கண்டுபிடித்துவிடுவோம் என்று சொன்னார். மற்றபடி, எங்களை எதுவும் விசாரிக்கவில்லை” என்றார். கோகுல்ராஜ் வழக்கு சிபிஐக்கு மாற்றப்பட வேண்டும் என்று வழக்குத் தொடுப்பதாக சொன்னது குறித்து கேட்டபோது, “இப்போதைக்கு அதை ஒத்திவைத்திருக்கிறோம். விசாரணையின் முடிவைப் பொறுத்து பிறகு, அதுகுறித்து யோசிக்கலாம்” என்றார்.

 

Advertisements

நிறைவேறியது யுவராஜின் லட்சியம்

கொங்கு பகுதியில் உள்ள கவுண்டர் சாதி மக்கள் நலனை முன்னிட்டு ஆரம்பிக்கப்பட்டதாகச் சொல்லிக்கொள்ளும் தமிழ்நாடு கொங்கு இளைஞர் பேரவையில் சில காலம் இருந்தவர் யுவராஜ். பிறகு, அதன் தலைவர் தனியரசுவிடம் ஏற்பட்ட முரண்பாட்டின் காரணமாக அந்தக் கட்சியிலிருந்து விலகி தீரன் சின்னமலைக் கவுண்டர் பேரவை என்ற அமைப்பை நிறுவினார். இந்த அமைப்பின் நோக்கம், கவுண்டர் சாதி தூய்மையைக் காப்பாற்றுவது. இந்தப் பகுதியில் கவுண்டர் சாதியைச் சேர்ந்த இளைஞர்கள் மற்ற சாதியினரை குறிப்பாக தலித்துகளை காதலிக்கக்கூடாது என வலியுறுத்துவது இந்த அமைப்பின் நோக்கம். இந்த அடிப்படையிலே கவுண்டர் சாதி பெண்ணுடன் பேசிய,கோகுல்ராஜை இந்த அமைப்பினர் யுவராஜ் தலைமையில் மிரட்டினர். அந்த சம்பவம் நடந்த அடுத்த நாள், கோகுல்ராஜ் தலை அறுத்து கொலை செய்யப்பட்டுக் கிடந்தார். இந்த வழக்கை விசாரித்த திருச்செங்கோடு டிஎஸ்பி விஷ்ணுப் பிரியா சந்தேகத்துக்குரிய வகையில் மரணமடைந்தார்.

யுவராஜ் மீது கோகுல்ராஜ் கொலை வழக்கையும் சேர்த்து எட்டு வழக்குகள் உள்ளன. இந்த எட்டு வழக்குகளிலும் அவர் தேடப்படும் குற்றவாளி; அத்தனையும் கிரிமினல் வழக்குகள்…

எட்டு வழக்குகள் என்னென்ன?

* பெருந்துறை காவல் நிலையத்தில் பணம் கேட்டு ஆள் கடத்தலில் ஈடுபட்ட குற்றச்சாட்டின் கீழ் இவர் மீது 2013-ஆம் ஆண்டு இரண்டு வழக்குகள் பதியப்பட்டுள்ளன.

* சங்ககிரி,கரூர் காவல் நிலையங்களில் கொலை முயற்சியுடன் அடித்ததாக மூன்று வழக்குகள் போடப்பட்டுள்ளன.

* திருச்செங்கோடு காவல் நிலையத்தில் கொலை மற்றும் வன்கொடுமை தடுப்புச் சட்டத்தின் கீழ் ஒரு வழக்கு பதியப்பட்டுள்ளது.

* ஈரோடு காவல்நிலையத்தில் மிரட்டல் வழக்கு ஒன்றும், குமாரபாளையத்தில் கிரிமனல் வழக்கு ஒன்றும் பதியப்பட்டுள்ளது.

‘யுவராஜின் லட்சியம் நிறைவேறியது!’

இத்தனை வழக்குகளில் தேடப்படும் குற்றவாளியாக இருந்தபோதும் ஞாயிற்றுக்கிழமை சரணடைந்த யுவராஜை வரவேற்க பெரும்திரளான கூட்டம் நாமக்கல் சிபிசிஐடி அலுவலகம் முன்பு கூடியது.

“கடந்த 100 நாட்களில் யுவராஜின் முகத்தைக்கூட பார்க்காத பல இளைஞர்கள் அவரைக் கதாநாயகனாகப் பார்க்கிறார்கள். சமூக வலைத்தளங்களில் ‘நான் யுவராஜை ஆதரிக்கிறேன்’ என்று வெளிப்படையாகவே ஹேஷ் டாக் போட்டு எழுதினார்கள். இறுதியாக எதை நினைத்து கோகுல்ராஜ் படுகொலை நடந்ததோ அது நிறைவேறிவிட்டது. கொங்கு சாதி அரசியலை முன்னெடுத்த தனியரசு, நாகராஜ், ஈஸ்வரன் ஆகியோரை மிஞ்ச வேண்டும், தன்னுடைய சமூகத்தைக் காப்பாற்ற வந்த நாயகனாக தன்னை நிலைநிறுத்திக்கொள்ள வேண்டும் என்கிற இலக்கு, லட்சியத்தை யுவராஜ் அடைந்துவிட்டார். அதற்கு அவருக்கு சில ஊடகங்களும் அவருக்கு உதவின” என்கிறார் செள. பாவேந்தன். விடுதலை சிறுத்தைகள் கட்சியின் ஆதரவுடன் கோகுல்ராஜின் தாய் சித்ரா, கோகுல்ராஜ் கொலை வழக்கை சிபிஐ விசாரிக்க உத்தரவிடக்கோரி உயர்நீதிமன்றத்தில் வழக்குத் தொடுக்க இருப்பதாகவும் இவர் தெரிவித்தார்.

“கோகுல்ராஜ் கொலைக்கு நீதி கிடைக்கும் என்று நாங்கள் நூறு சதவீதம் நம்பவில்லை. அதனால்தான் சிபிஐ விசாரணையைக் கேட்கிறோம்” என்கிறார் சித்ரா.

ஃபீனிக்ஸாய் மீண்டெழுவாரா பெருமாள் முருகன்!

மாதொருபாகன் என்னும் பெயரைக்கேட்டதும் நண்பர் ஒருவர், சைவ நெடியடிக்கும் தலைப்பு என்றார். உண்மைதான். இது சிவனின் பெயர்களில் ஒன்று. பெண்ணுக்குத் தன் இடப்பாகத்தைக் கொடுத்து ஆண் பாதி பெண் பாதி எனக் காட்சி தரும் அர்த்தநாரீசுவர வடிவத்தை குறிக்கும் பெயர். அர்த்தநாரீசுவரன், அம்மையப்பன், மங்கைபங்கன் ஆகிய பெயர்களும் இதே பொருளைத் தருவன. எனினும் எனக்குள் ஒருவித மயக்கத்தை உண்டாக்கிய பெயர் ‘மாதொருபாகன்.’ பொதுவாக நாவலை முடித்த பிறகே தலைப்பை யோசிப்பது என் வழக்கம். ஆனால் இந்நாவலை எழுதத் தொடங்கும் முன்பே இத்தலைப்பு எனக்குள் தோன்றிவிட்டது. எனினும் அதை ஒத்திவைத்துவிட்டு பல தலைப்புகளை யோசித்துக் கொண்டிருந்தேன். ஆனால் இதற்கு ஈடான நிறைவை வேறு எதுவும் தரவில்லை.

மூலவர் மாதொருபாகனாகச் சிவன் காட்சித் தருவது திருச்செங்கோட்டில் மட்டுமே. இவ்வுருவம் இக்கோயிலில் அமைய ஊகத்திற்கு உட்பட்டும் ஊகத்திற்கு அப்பாற்பட்டும் காரணங்கள் இருக்கலாம். சைவம், கோயிலின் பூர்வ வரலாறு ஆகியவற்றைவிட மக்களிடையே கோயில் பெற்றிருக்கும் மிதமிஞ்சிய செல்வாக்கே என்னை ஈர்த்த விஷயம். வாழ்வின் எல்லாச் சந்தர்ப்பங்களிலும் ஏதோ ஒரு வடிவில் கோயில் முக்கியத்துவம் பெற்றுவிடுகிறது. மலைஅடி வாரம் முதல் உச்சி வரை மக்கள் குறை தீர்க்கும் படையாகத் தெய்வங்கள் அணிவகுத்திருக்கின்றன. அந்தந்தச் சமயத்திற்கு ஏற்றாற்போலத் தெய்வங்களை தேர்வு செய்து கொள்ளலாம்.

திருச்செங்கோடு தொடர்பான கள ஆய்வில் ஈடுபட்ட போது எனக்குக் கிடைத்தவை பல. படைப்பு உந்துதல் கொடுத்த விஷயங்களில் ஒன்று இந்நாவல். நான் சேகரித்தவற்றை விரிவாகப் பயின்று கொண்டிருக்கிறேன். ஆய்வின்போது நான் பெற்ற பேரனுபவங்கள் சில என்னுள் ஊறிக்கொண்டிருக்கின்றன. அவற்றில் வரலாறு சார்ந்து விரிவாக எழுதும் தூண்டல் ஒன்றும் இருக்கிறது. அதற்குச் சில ஆண்டுகள் எனக்குத் தேவைப்படக்கூடும்.

– மாதொருபாகன் நாவல் முன்னுரையில் எழுத்தாளர் பெருமாள் முருகன்.

இப்படி பெருமிதத்துடன் எழுதிய நாவலோடு தன் எழுத்துப் பயணத்தை முடித்துக் கொள்வார் என எழுத்தாளர் பெருமாள் முருகனும்கூட நினைத்திருக்க மாட்டார்.

நாவலில் தங்கள் இனத்துப் பெண்கள் இழிவாகச் சித்தரிக்கப் பட்டுள்ளதாக சில சாதி அமைப்புகள் நாவல் எரிப்புப் போராட்டத்தை நடத்தின. பெருமாள் முருகன் நிபந்தனையற்ற மன்னிப்புக் கோர வேண்டும் என அவரை நிர்பந்தித்தன. சமூக வலைத்தளங்களில் அவருக்கு எதிராக மிகப்பெரும் எழுத்து வன்முறை கட்டவிழ்த்துவிடப்பட்டது. கட்ட பஞ்சாயத்துகளும் நடந்தன. அவர் மட்டுமல்ல, அவருடைய குடும்பத்தினரும் சாதி அமைப்புகளால் கடுமையான அவதூறுகளுக்கு உள்ளானார்கள்.

இறுதியில், ‘எழுத்தாளன் பெருமாள்முருகன் செத்துவிட்டான். அவன் கடவுள் அல்ல, ஆகவே உயிர்த்தெழப் போவதில்லை. மறுபிறவியில் அவனுக்கு நம்பிக்கையும் இல்லை. இனி அற்ப ஆசிரியனாகிய பெ.முருகன் என்பவன் மட்டுமே உயிர் வாழ்வான்’ என அறிவித்தார். சர்ச்சைகளும் ஓய்ந்தன.

இந்நிலையில் பத்து மாதங்களுக்குப் பிறகு, ‘மாதொருபாகன்’ நாவலுக்கு கிடைத்திருக்கும் சமன்வய் விருதையொட்டி பொதுவெளியில் அறிக்கை மூலம் பேசியிருக்கிறார்.

பெருமாள் முருகன் வெளியிட்டுள்ள அறிக்கையில், ‘மாதொருபாகன் நாவலுக்கு வழங்கப்பட்டுள்ள இவ்விருது நெடும் இலக்கியப் பாரம்பரியம் கொண்ட செம்மொழி ஆகிய தமிழுக்குக் கிடைத்திருக்கும் நவீன அங்கீகாரம் ஆகும். துரதிர்ஷ்டம் நிறைந்திருக்கும் இச்சூழலில் என் தாய்மொழி அடைந்திருக்கும் இப்பேறு அதன் வரலாற்றில் துருத்தும் மருவாக அல்ல, ஒளிரும் மணியாக அமையும் என்று நம்புகிறேன். இவ்விருதுக்குக் காரணமான அனைவருக்கும் மனமார்ந்த நன்றிகள். இயற்கையின் இயல்புக்கு மாறாகப் பெருமாள் முருகனின் நிழலாக மட்டுமே தங்கி உலவும் நான் பெருமைமிகு தருணமாக இதை உணர்கிறேன். இவ்விருதை எல்லாம் வல்ல இறையாகிய மாதொருபாகனின் பாதக் கமலங்களுக்குச் சமர்ப்பணம் செய்கிறேன்’ என்று தெரிவித்துள்ளார்.

பல மாதங்களுக்குப் பிறகு ஊடகங்களில் அறிவிப்பு வழியாக பேசியிருக்கும் பெருமாள் முருகன், இனி எழுதுவதில்லை என்ற முடிவை மாற்றிக்கொள்வாரா? பெருமாள் முருகனின் பெருவாரியான நூல்களை வெளியிட்டிருக்கும் காலச்சுவட்டின் பதிப்பாளர் கண்ணனிடம் இது குறித்துக் கேட்டபோது.

“அவர் எழுதுவாரா என்பது குறித்து தெரியவில்லை. எழுதுவீர்களா என நானும் கேட்கவில்லை. சென்னை வந்த பிறகு அவர் அமைதியான மனநிலைக்குத் திரும்பியிருக்கிறார். இப்போது அவர் மீண்டும் படிக்க ஆரம்பித்திருக்கிறார்.” என்றார்.

எழுத்தாளர் பெருமாள் முருகன் என்ற எழுத்தாளரைத் தாக்கிய சாதியம், கோகுல்ராஜ் என்ற மாணவரின் படுகொலை, விஷ்ணுப் பிரியா என்ற காவல் அதிகாரியின் மரணம் வரை இழுத்துச்சென்றுள்ளது. கொங்கு மண்டலத்தில் கிளம்பிய இந்த சாதியத்தை உணர்ந்ததால்தான் எழுத்தாளர் பெருமாள் முருகன் எழுதுவதையே நிறுத்திக் கொள்கிறேன் என அறிவித்தார் என்கிறார் கண்ணன்.

“மாதொருபாகனுக்கு எதிராக சாதிய அமைப்புகள் கிளம்பியபோது பெருமாள் முருகன் தேவையில்லாமல் அச்சப்படுகிறாரோ என பலர் பேசினர். சூழல் மோசமாகிவிட்டதை உணர்ந்ததால்தான் அவர் அப்படி அச்சப்பட்டார். இன்று அது வெளிச்சத்துக்கு வந்திருக்கிறது” என்றவர், பெருமாள் முருகனின் புத்தகத்தை வெளியிட்ட பதிப்பாளர் என்ற முறையில் தங்களையும் சிலர் மிரட்டினார்கள் என்பதையும் நினைவு கூர்ந்தார்.

“இந்த பிரச்சினை கிளம்பிய நேரத்தில் காலச்சுவடு அலுவலகத்துக்கு நிறைய மிரட்டல் தொலைபேசி அழைப்புகள் வந்தன. என்னிடம் பேச பலமுறை முயன்றார்கள். என் செல்பேசி எண்ணை எப்படியோ தெரிந்துகொண்டு ஒருவர் அழைத்தார். ‘வணக்கம் இந்து துரோகியே!’ என்பதுதான் அவர் பேசிய முதல் வார்த்தை. நான் கடுமையாக பேசிவிட்டு பேசியை அணைத்தேன்.

சேலம் ஆர்எஸ்எஸ் என்று தன்னுடைய முகநூல் பக்கத்தில் தன்னைப் பற்றி குறிப்பிட்டிருந்த ஒருவர், என் மனைவியின் முகநூல் பக்கத்தில் ‘திருச்செங்கோடு கோயிலில் நடைபெறும் திருவிழாவில் நீங்கள் கலந்துகொள்ள வேண்டும்’ என்று கமெண்ட் போட்டிருந்தார். இப்படி அந்த சந்தர்ப்பத்தில் நிறைய சந்திக்க வேண்டியிருந்தது” என்கிறார்.

இன்னும் சில நாட்களில் எழுத்தாளர் பெருமாள் முருகன் வழக்கு விசாரணைக்கு வருகிறது. அந்த வழக்கின் தீர்ப்புக்குப் பிறகுதான் எழுதுவது குறித்து அவர் பேசுவார் என சொன்ன கண்ணன், தற்போது பெருமாள் முருகனின் நூல்களை மறுபதிப்பு செய்வதையும் நிறுத்தி வைத்திருப்பதாக குறிப்பிட்டார்.

எழுத்தாளர் பெருமாள் முருகனின் நண்பரும் கவிஞருமான சிபிச்செல்வன், வழக்கு முடியும்வரை பெருமாள் முருகன் பொதுவெளியில் பேசுவதில்லை என முடிவெடுத்திருப்பதாகக் கூறினார். வழக்கின் முடிவைப் பொறுத்தே அவர் எழுதுவாரா, இல்லையா என்பது தெரிய வரும் என்றும் அவர் தெரிவித்தார்.

சென்னையில் கிடைத்திருக்கும் மன அமைதியும் விருது பெற்றிருக்கும் மகிழ்ச்சியும் அவரை ஃபீனிக்ஸ் பறவைபோல சாம்பலில் இருந்து மீண்டெழ வைக்கும் என்று எதிர்ப்பார்க்கலாம்!

புதிய தலைமுறையின் நோக்கம் என்ன?

கோகுல்ராஜ் கொலைவழக்கில் முக்கிய குற்றவாளியாக குற்றம்சாட்டப்பட்டு தேடப்படும் யுவராஜாவின் பிரத்யேக பேட்டியை ஞாயிற்றுக்கிழமை காலை முதல் ஒளிபரப்பி வருகிறது புதிய தலைமுறைத் தொலைக்காட்சி. மாலை ஐந்து மணிக்கு ஒளிபரப்பான செய்தித் தொகுப்பில் கோகுல்ராஜ் தற்கொலைதான் செய்துகொண்டார், அது கொலையே அல்ல என்று யுவராஜ் சொல்வதாக பின்னணியில் செய்தியாளர் பேசி, கோகுல்ராஜ் கொலையாகிக் கிடந்த பின்னணிக் காட்சிகள் காட்டப்பட்டன.

யுவராஜை ஹீரோவாக முன்நிறுத்துவது ஏன் என்றும் குற்றவாளியின் வாக்குறுதிகளுக்கெல்லாம் முக்கியத்துவம் கொடுத்து செய்தி ஒளிபரப்பும் நோக்கம் ஏன் என்றும்  கட்டுரையில் கேள்வி எழுப்பியிருந்தேன்.  என்னைப் போல பலரும் புதிய தலைமுறையின் போக்குக்குக் கண்டனம் தெரிவித்திருந்த நிலையில் திங்கள் இரவு 9 மணிக்கு நேர்படப் பேசு நிகழ்ச்சியில் கொலைக் குற்றம் சாட்டப்பட்டவரின் பேட்டியை ஒளிபரப்புவது சரியா என விவாதம் நடத்தினார்கள்.  இது வரவேற்கக் கூடிய ஒன்றுதான். ஆனால் யுவராஜ் சொல்லாத கோகுல்ராஜ் கொலையை தற்கொலை என்று திரித்து செய்தி வெளியிட்டது குறித்து பேசவேயில்லை.

 

’விஷ்ணுப் பிரியாவின் மரணம் தற்கொலையே அல்ல!’

திருச்செங்கோடு டி.எஸ்.பி விஷ்ணுப் பிரியா மரணத்தை விசாரிக்கும் தமிழக அரசால் அமைக்கப்பட்ட சிபிசிஐடி விசாரணை குறித்து விஷ்ணுப் பிரியாவின் தந்தை ஆரம்பத்திலேயே இது நீதியைப் பெற்றுத்தரும் விசாரணையாக இருக்காது என்று ஆட்சேபம் தெரிவித்தார். இந்திய கம்யூனிஸ்ட், மார்க்சிஸ்ட் கம்யூனிஸ்ட், விடுதலைச் சிறுத்தைகள், திமுக, தேமுதிக, காங்கிரஸ் போன்ற அரசியல் கட்சிகளும் சிபிசிஐடி விசாரணைக்கு எதிர்ப்பு தெரிவித்து, இந்த வழக்கை சிபிஐ விசாரிக்க வேண்டும் என்று கோரிக்கை வைத்தனர். சட்டப்பேரவையில் சிபிசிஐடி விசாரணையே போதுமானது என்று அறிவித்தார் முதல்வர் ஜெயலலிதா. சிபிஐ விசாரணை கோரி திமுக சார்பில் சுப்புலட்சுமி ஜெகதீசன் தொடர்ந்த வழக்கை தள்ளுபடி செய்தது சென்னை உயர்நீதிமன்றம்.

ஆனால் அடுத்தடுத்து நடந்த சம்பவங்கள், விஷ்ணுப் பிரியாவின் வழக்கை திசைமாற்றும் நோக்கில் சிபிசிஐடி போலீசாரே ஈடுபட்டது வெட்ட வெளிச்சமானது. விஷ்ணுப் பிரியா விசாரித்த கோகுல்ராஜ் கொலை வழக்கில் குற்றச்சாட்டில் தேடப்படும் குற்றவாளியான யுவராஜ், பகிரங்கமாக வாட்ஸ் அப்பில் அடுத்தடுத்து காவல்துறைக்கும் தமிழக அரசுக்கும் சவால் விடும் வகையில் பேசிய பிறகும், அவரை கைது செய்ய எவ்வித நடவடிக்கையும் எடுக்கவில்லை சிபிசிஐடி போலீஸ். ஆனால் அதே போலீஸ் விஷ்ணுப் பிரியா மரணத்தில் உள்ள மர்மத்தை மூடும் வேலையில் இறங்கியது. அவர் காதல் தோல்வியால் தற்கொலை செய்துகொண்டார் என போலீஸ் தரப்பில் இருந்தே வதந்திகள் கிளப்பப்படுவதாக விஷ்ணுப் பிரியாவின் உறவினர் சந்தேகம் எழுப்பினர்.

இந்நிலையில் விஷ்ணுப் பிரியாவின் நண்பர் வழக்கறிஞர் மாளவியா, தன்னிடம் சிபிசிஐடி போலீசார் விஷ்ணுப் பிரியாவுடன் காதல் இருந்ததாகச் சொல்லும்படி மிரட்டினர் என பகீர் புகார் தெரிவித்தார். விஷ்ணுப் பிரியாவின் வழக்கில் சிபிசிஐடி போலீஸ் சரியான திசையில் விசாரிக்கவில்லை என்றும் இந்த வழக்கை சிபிஐ விசாரிக்க வலியுறுத்தியும் சென்னை உயர்நீதிமன்றத்தில் மாளவியா வழக்குத் தொடர்ந்திருக்கிறார்.

இதேபோல முன்னாள் ஐ.ஏ.எஸ். அதிகாரியும், சமூக சமத்துவப் படை கட்சியின் நிறுவனருமான சிவகாமி, உயர்நீதிமன்ற மதுரைக் கிளையில் விஷ்ணுப் பிரியா வழக்கை சிபிஐ விசாரிக்கக் கோரி மனுத்தாக்க செய்திருந்திருந்திருந்தார். இந்த மனுவில், ‘சிபிசிஐடி போலீசாரின் விசாரணை சுதந்திரமாக நடக்க வாய்ப்பில்லை; எனவே, இவ்வழக்கை சிபிஐ விசாரணைக்கு மாற்றி உத்தரவிட வேண்டும்.விஷ்ணுப் பிரியா மரணத்தில் பல சந்தேகங்கள் எழுந்துள்ளன; மாநில போலீசார் மீதும் புகார்கள் எழுந்துள்ளதால், இவ்வழக்கை மாநில போலீசார் விசாரிப்பது ஏற்புடையதல்ல. எனவே சிபிசிஐடி விசாரணைக்கு தடை விதித்து, சிபிஐ விசாரணைக்கு உத்தரவிட வேண்டும்’ என்று சிவகாமி வலியுறுத்தி இருந்தார்.

இந்த மனுவை வியாழக்கிழமை விசாரித்த நீதிபதிகள் சுதாகர், வேலுமணி ஆகியோர், விஷ்ணுபிரியா வழக்கை சிபிஐ விசாரிப்பது பற்றி தமிழ்நாடு காவல்துறைத் தலைவர் மற்றும் தமிழக உள்துறை செயலாளர் பரிசீலிக்க வேண்டும் என நீதிபதிகள் உத்தரவிட்டுள்ளனர்.

விஷ்ணுப் பிரியாவின் குடும்பமும் சிபிஐ விசாரணைக் கோரி நீதிமன்றம் செல்ல இருக்கிறது. இதுகுறித்து விஷ்ணுப் பிரியாவின் மாமா ஆனந்த் பேசினார்..

“போலீஸ் சொல்வதுபோல இது தற்கொலையே அல்ல. விஷ்ணுப் பிரியா தூக்கில் தொங்கியதாக சொல்லப்படும் இடத்தை வைத்து பார்க்கும்போது அதற்கான வாய்ப்புகளே இல்லை என்பது தெளிவாகிறது. அதோடு நாங்கள் செய்தி கேட்டு திருச்செங்கோடு செல்லும் முன்பாகவே விஷ்ணுப் பிரியாவின் உடலை சேலம் மருத்துவமனைக்கு எடுத்துச் சென்றுவிட்டனர். விதிமுறைப்படி திருச்செங்கோடு மருத்துவமனைக்குத்தான் எடுத்துச் செல்ல வேண்டும். அங்கே ஃபீரிசர் வேலை செய்யவில்லை என்று காரணம் சொன்னார்கள். வேகவேகமாக தடயத்தை அழிக்கும் பொருட்டே சேலம் மருத்துவமனைக்கு எடுத்துச் சென்றதாக நாங்கள் சந்தேகிக்கிறோம்.

மேலும், போலீஸ் கைப்பற்றிய பொருட்களாக செல்போன்கள், டாப்லட், லேப்டாப் பற்றித்தான் சொல்லிக்கொண்டே இருக்கிறார்கள். முக்கியமான ஆதாரமான விடியோ கேமரா பற்றி சொல்லவேயில்லை. அதில்தான் கோகுல்ராஜ் வழக்குத் தொடர்பான அத்தனை ஆதாரங்களும் பதிவு செய்யப்பட்டுள்ளன. இதையும் போலீஸ் மறைப்பதாகவே கருதுகிறோம்.

விஷ்ணுப் பிரியாவின் தோழி, மகேஸ்வரியின் செல்போனை காணவில்லை. ஒரு காவலருடைய செல்போனையே காணவில்லை என்றால், இதுபற்றி எங்குபோய் முறையிடுவது? மகேஸ்வரியின் பாதுகாப்பு குறித்தும் எங்களுக்குக் கவலையாக உள்ளது.

விஷ்ணுப் பிரியா மரணத்தில் எத்தனையோ சந்தேகங்கள் இருக்க, விஷ்ணுப் பிரியாவையும் எங்களையும் கொச்சைப்படுத்தும் நோக்கத்துடன் போலீசாரே தவறாக சித்தரிக்கின்றனர். குடும்பப் பிரச்சினை என்றால் அதைப் பற்றி நாங்கள்தான் பேச வேண்டும். விசாரணை முடியும் முன்பாகவே அவர்களாக அறிவிக்கக்கூடாது. வழக்கை இப்படியெல்லாம் திசைதிருப்புவதால்தான் நாங்கள் அழுத்தமான ஆதாரங்களுடன் சிபிஐ விசாரணை கோரி வழக்குத் தொடுக்க இருக்கிறோம். சிபிஐ மட்டுமே எங்கள் வீட்டுப் பெண்ணுக்கு நீதி பெற்றுத்தரும்” என்று ஆதங்கத்துடன் முடித்தார் ஆனந்த்.