அவசியம் தெரிந்துகொள்ள வேண்டிய நிதிஷ்-லாலு வெற்றி ஃபார்முலா!

bihar-lalu-nitish

சமீப ஆண்டுகளில் இரண்டு தேர்தல்கள் முக்கியத்துவம் பெற்றிருக்கின்றன. ஒன்று டெல்லி சட்டப்பேரவை தேர்தல், இரண்டாவது பீகார் தேர்தல். இரண்டுமே எதிர்ப்பார்ப்புகளைத் தாண்டி டெல்லியில் ஆம் ஆத்மியும் பீகாரில் மகா கூட்டணியும் வெற்றியைக் குவித்த தேர்தல்கள்.

பொதுவாக ஒவ்வொரு மாநிலத்திலும் ஊழலற்ற, மதவாதம் இல்லாத, வளர்ச்சி நோக்கிய மாற்றுத் திட்டங்களுடன் அரசியல் கட்சிகள் இயங்குகின்றன. ஆனால் அவற்றால் ஏன் வெற்றி பெறமுடிவதில்லை? டெல்லி, பீகார் தேர்தல்கள் சொல்லும் பாடம் என்ன? நடந்து முடிந்த பீகார் சட்டப்பேரவைத் தேர்தலில் நிதி-லாலு கூட்டணியின் வெற்றி ஃபார்முலா என்ன?

ஒற்றுமையே பலம்

பீகாரில் வளர்ச்சித் திட்டங்களை முன்வைத்த நிதிஷ், ஊழலுக்குப் பெயர்பெற்ற தன்னுடைய பரம எதிரியாக இருந்த லாலு பிரசாத்துடன் கூட்டணி வைத்தது சந்தர்ப்பவாதம் என்று பாஜகவினரால் குற்றம்சாட்டப்பட்டது. 2014-ஆம் ஆண்டின் மக்களவைத் தேர்தலில் பாஜகவின் அமோக வெற்றிக்கு அடுத்தபடியாக லாலுவின் ராஷ்டிரிய ஜனதா தளம் அதிக இடங்களைப் பிடித்திருந்தது. அதனுடைய வாக்கு வங்கியும் அதிகமாகியிருந்தது.

லாலுவும் நிதிஷும் வி.பி.சிங்கிடம் அரசியல் பாடம் கற்றவர்கள். இருவருடைய கட்சிக் கொள்கைகளுக்கும் பெரிதாக வித்தியாசமில்லை. அதனால் அவர்கள் இருவரும் கொள்கைகளில் பாரதூரத்தில் இருந்த பாஜகவுக்கு எதிராக ஒன்றிணைந்ததை சந்தர்ப்பவாதமாக பீகார் மக்கள் பார்க்கவில்லை. அதைத் தேர்தல் வெற்றி மூலம் அங்கீகரித்திருக்கிறார்கள்.

நம்மூரில் அதிமுக, திமுகவின் ஊழல்களை விமர்சிக்கும் விஜயகாந்துக்கு ஊழலுக்கு எதிரான மாற்றாக சொல்லிக்கொள்ளும் மக்கள் நலக் கூட்டணியில் இணைய யோசிப்பதில் குறுகிய கால நலன்கள் மட்டுமே உள்ளன. தேமுதிகவுக்கு மட்டுமல்ல தமிழக மாற்று அரசியல் முன்னெடுக்கும் பல கட்சிகளின் நிலைப்பாடும் அத்தகையதே. மக்கள் நலக் கூட்டணியில் உள்ள கட்சிகள் தேர்தலை இணைந்து சந்திப்பார்களா என்பதே சந்தேகத்துக்குரியதுதான்!

ஒடுக்கப்பட்ட மக்களை ஒருங்கிணைத்தல்

நிதிஷ்-லாலு கூட்டணியின் மிக முக்கியமான வெற்றி ஃபார்முலா, அவர்கள் ஒடுக்கப்பட்ட மக்களை ஒருங்கிணைத்து வாக்குகளாக மாற்றிக்கொண்டார்கள் என்பதே. பிற்படுத்தப்பட்டோர், தலித்துகள், சிறுபான்மையினர், பெண்கள் என சாதி, வர்க்கத்தைத் தாண்டி, ஒடுக்கப்பட்ட மக்கள் என்ற ஒரே குடையின் கீழ் இவர்கள் அளித்த வாக்குகளே மகா கூட்டணிக்கு மாபெரும் வெற்றியைத் தந்திருக்கிறது. பள்ளிச் செல்லும் பெண்களுக்கு இலவச சைக்கிள் திட்டம், பஞ்சாயத்துகளில் பெண்களுக்கு 50 சதவிகித இடஒதுக்கீடு போன்ற நிதிஷின் திட்டங்கள் பெண்களின் வாக்குகளை கணிசமாகப் பெற்றன. அதோடு இந்தத் தேர்தலில் அரசு வேலைகளில் பெண்களுக்கு 35 சதவிகித இடஒதுக்கீடு வழங்கப்படும் என்றும் வாக்குறுதி அளித்திருந்தது மகா கூட்டணி.

இடஒதுக்கீட்டுக்கு எதிராக ஆர்எஸ்எஸ் தலைவர் மோகன் பகவத்தின் பேச்சு, மகா கூட்டணிக்கு தூண்டில் இரையாகப் பயன்பட்டது. இடஒதுக்கீட்டால் பலனடைந்த பீகார் மக்களுக்கு ஏற்பட்ட பயம், மகா கூட்டணிக்கு வாக்குகளாக மாறியது. லாலு பிரசாத் மேடைக்கு மேடை இந்தப் பிரச்சினையை முன்வைத்து பேசினார் என்பது குறிப்பிடத்தக்கது.

தமிழக அரசியல் கட்சிகள் எந்த விதத்திலும் சமூக மாற்றத்துக்கு வித்திடாத இலவச பொருட்களைத் தருவதையே விரும்புகின்றன. குறுகிய கால நோக்கம் ஐந்து ஆண்டுகளுக்கு மேல் பலன் தருவதில்லை. டிவி தருவதோ, மிக்ஸி, கிரைண்டர், ஃபேன் தருவதோ இனிமேலும் பலன் தருமா என்பதை அரசியல் கட்சிகள் சிந்திக்க வேண்டும். அதிமுக அரசின் இலவச சைக்கிள், மடிக்கணினி திட்டங்கள், கிராமப்புற மக்களுக்கு ஆடு, மாடு வழங்கும் திட்டங்கள் வரவேற்கத்தக்கவை. இத்தகைய திட்டங்களோடு சமூக மாற்றத்தை உண்டாக்கும் அரசுப் பணிகளில் பெண்களுக்கும் சிறுபான்மையினருக்கும் இடஒதுக்கீடு போன்றவற்றை கொண்டுவருவது குறித்து பரிசீலிக்க வேண்டும்.

திறமையாளர்களை பயன்படுத்துதல்

தொழிற்நுட்ப மேலாண்மை வல்லுநரான பிரசாந்த் கிஷோரும் டெல்லி பல்கலைக் கழகத்தின் சமூகவியல் பேராசிரியரும் ராஷ்ட்ரிய ஜனதா தளத்தின் தேசிய செய்தித் தொடர்பாளருமான பிரகாஷ் ஜா ஆகிய இருவரும் மகா கூட்டணியின் வெற்றி ஃபார்முலாவை வடிவமைத்தவர்களாக கைக்காட்டப்படுகிறார்கள்.

மகா கூட்டணியின் வேட்பாளர்களைத் தேர்வு செய்வதிலிருந்து, சமூகத்தின் வேர் வரைச் சென்று மக்களின் பிரச்சினைகளை தேவைகளை சேகரித்து அதை வைத்து தேர்தல் பிரச்சார உத்தியை வடிவமைத்தவர்கள் இவர்கள். சமூகத்தின் வேர்களைத் தேடிச் சென்றதே டெல்லியில் ஆம் ஆத்மியின் வெற்றிக்காரணமாக அமைந்தது என்பது இந்த இடத்தில் சுட்டிக்காட்டத் தகுந்தது.

தமிழகத்தில் மக்கள் நலக் கூட்டணியில் உள்ள வைகோ அநேகமாக மக்களை பாதிக்கும் அனைத்து பிரச்சினைகளுக்காகவும் குரல் கொடுக்கிறார். விடுதலைச் சிறுத்தைகள் தலித் பிரச்சினைகளை அறிந்து வைத்திருக்கிறது(தலித் பிரச்சினைகளுக்காக குரல் கொடுக்கிறதா என்பது கேள்விதான்) அதேபோல மார்க்சிஸ்ட், இந்திய கம்யூனிஸ்ட் கட்சிகள் தலித், சிறுபான்மையினர், விவசாயிகள், தொழிலாளர் பிரச்சினைகளுக்கு களத்தில் இறங்கிப் போராடுகிறது. ஆனால், இவர்களால் இந்த அடித்தள மக்களை ஒன்றிணைக்கும் வல்லமை இல்லை. அதை வசமாக்க சரியான திட்டமிடல் தேவை, அதை நிபுணர்களால் மட்டுமெ செய்ய முடியும்.

எதிரியைப் பேச விடுங்கள்

எதிரியை பேச விட்டுப் பார்ப்பது ஒரு வகை தந்திரம். அதை சரியாகச் செய்தார்கள் லாலுவும் நிதிஷும். நாட்டின் பிரதமே நேரடியாக களத்தில் இறங்கில் 40 பொதுக்கூட்டங்களில் பேசுகிறார் என்றால் எத்தகைய தலைவருக்கும் கலக்கம் இருக்கத்தான் செய்யும். ஆனால் அதை மிக சாதுர்யமாகக் கையாண்டது மகா கூட்டணி.

மோடியின் பேரணி, பொதுக்கூட்டம் நடந்த பிறகே, நிதிஷின் கூட்டம் நடக்கும். மோடி என்ன பேசினாரோ அதற்கு பதிலடி கொடுக்கும் வகையில் அந்தக் கூட்டத்தில் நிதிஷ் பேசுவார். லாலு தன்னுடைய நகைச்சுவையான பேச்சு மூலம் பாஜகவினரை விமர்சனம் செய்தார். படோபடமாக நடந்த மோடியின் கூட்டங்களைப் போல் அல்லாமல் நிதிஷின் கூட்டங்கள் இயல்பாக இருந்தன.

பாக்சர் என்ற இடத்தில் நரேந்திர மோடியின் பேச்சும், அமித் ஷா ரக்சல் என்ற இடத்தில் பேசியது மக்களை பிளவுபடுத்தக் கூடியவையாக இருந்தன. பிரதமரின் மாண்பை குலைப்பவையாக அவை இருந்தன என்று விமர்சனம் வைக்கப்பட்டது. நிதிஷின் பதிலடி பேச்சு அவரை மரியாதைக்குரிய அரசியல்வாதியாக மக்கள் முன் நிறுத்தியது.

தமிழக அரசியலில் பதிலடி, விமர்சனம் என்பது சில நேரங்களில் கீறங்கிவிடுவதுண்டு. அதற்கொரு உதாரணம் ஈவிகேஎஸ் இளங்கோவனின் ஜெயலலிதா குறித்த விமர்சனம். தமிழகத்தில் சரிந்திருந்த காங்கிரசின் செல்வாக்கை சரிசெய்துகொண்டிருந்த இளங்கோவனின் மோடி-ஜெயலலிதா சந்திப்பு குறித்த பேச்சு அவருடைய இமேஜை சரித்தது என்பதில் மாற்றுக் கருத்து இல்லை.

ஊடகத் தொடர்பு அவசியம் மன்னரே!

மத்தியில் ஆளும் நரேந்திர மோடி தலைமையிலான பாஜக அரசுக்கு பெரும்பாலான ஊடகங்கள் முக்கியத்துவம் தந்து செய்திகளை வெளியிட்டன. நரேந்திர மோடியின் பீகார் தேர்தல் பேரணிகள், பொதுக்கூட்டங்கள் தேசிய தொலைக்காட்சிகளில் நேரடியாக ஒளிபரப்பப்பட்டன. தாத்ரி படுகொலைக்கும் எழுத்தாளர்கள் சகிப்பின்மைக்கு எதிராக அறிவிஜீவிகள் முன்னெடுத்த போராட்டத்துக்கும் வாய்த் திறக்காத மோடி, தேர்தல் பிரச்சார மேடைகளில் இடைவிடாமல் பேசினார்.

ஆனால் நிதிஷ் தனக்குக் கிடைத்த ஊடக வாய்ப்பை சரியாகப் பயன்படுத்திக்கொண்டார். தனது உறுதியான தெளிவான கருத்துக்களை ஊடகங்கள் முன்வைத்தது மகா கூட்டணி. ஊடகங்களில் பேசியது சமூக வலைத்தளங்களில் பகிரப்பட்டது.

தேமுதிக தலைவர் எங்களுக்கு ஊடகங்களின் தயவு தேவையில்லை, நாங்கள் மக்களிடம் நேரடியாகப் பேசிக் கொள்கிறோம் என்கிறார். ஊடகமே வாழ்க்கையாகிவிட்ட இந்தக் காலத்தில் இப்படி பேசுவதற்குப் பெயர்தான் அறியாமை. நேரடியாக எல்லா மக்களையும் தேவையான நேரத்தில் சந்திக்க முடிவதில்லை. அதை ஊடகங்கள் எளிமையாக்குகின்றன. ஊடகங்களில் வெளியாகும் செய்திகள் சமூக வலைத்தளங்கள் மூலம் இன்னும் பல லட்சம் பேரை சென்றடைகின்றன. இதை உணராமல் 20 ஆண்டுகள் பிந்தைய அரசியல் செய்தால், 10, 20 சீட்டுகளுக்காகத்தான் கணக்குப் போட வேண்டியிருக்கும்.

விஜயகாந்த் மட்டுமல்ல, தமிழக அரசியல்வாதிகள் பெரும்பாலானவர்கள் ஊடகத்தொடர்பில் மோசமான நிலையில் இருக்கிறார்கள். செய்தி தொலைக்காட்சிகளின் வருகைக்குப் பின் இந்த நிலை மாறியிருக்கிறது என்றாலும் ஊடகத் தொடர்ப்பு இன்னும் பலப்பட வேண்டும் என்பதை இவர்கள் புரிந்துகொள்ள வேண்டும்.

 

Advertisements

அதிமுகவில் மு.க. அழகிரியா?

மதிமுக காஞ்சிபுரம் மாவட்ட செயலாளரும் அக்கட்சியின் தலைமை உயர்நிலைக் குழு உறுப்பினருமான பாலவாக்கம் க.சோமு அக்கட்சியிலிருந்து விலகி திமுகவில் திங்கள்கிழமை இணைந்திருக்கிறார். வரவிருக்கிற தமிழக சட்டப்பேரவை தேர்தலின் ‘தாவல்’ அத்தியாயத்தை தொடங்கி வைத்திருக்கிறார் சோமு. அடுத்தடுத்து சேலம் மாவட்ட மதிமுக செயலாளர் தாமரைகண்ணனும் பெண்கள் அணித்தலைவி குமரி விஜயகுமாரும் திமுக தலைவர் மு. கருணாநிதி தலைமையில் வியாழக்கிழமை இணைந்தனர். மேலும் சிலரும் மதிமுக-வில் இருந்து விலகி திமுக-வில் இணைய உள்ளதாக ஊடகங்கள் கிசுகிசுக்கின்றன.

தன் குடும்பத்துடன் திமுக-வில் இணைந்த சோமு...
தன் குடும்பத்துடன் திமுக-வில் இணைந்த சோமு…

திமுக-வை நெருங்கிவந்த மதிமுக பொதுச் செயலாளர், சசிபெருமாள் இறந்ததை அடுத்து நடந்த ‘போராட்டங்கள்’ மூலம் திமுக-வுக்கு ‘டஃப்’ கொடுக்க ஆரம்பித்தார். தன்னுடன் போராட்டங்களில் இணைந்த ஐந்து கட்சிகளைக் கொண்ட சமூகப் போராட்டக் கூட்டணியை உருவாக்கினார். இது தேர்தல் கூட்டணி அல்ல என்றும் அடிக்கடி விளக்கம் கொடுத்தார்(கள்). ஆனால் திமுக தலைமைக்கு இது அவ்வளவு நல்லதாகப் படவில்லை. வந்தது லயோலா கருத்துக் கணிப்பு, தந்தது தெம்பு. அடுத்தடுத்து காய் நகர்த்தலில் ஈடுபட்ட திமுக, தனக்கு ‘டஃப்’ கொடுத்த மதிமுக காரர்களுக்கு வலைவீசுவோம் என தேர்தல் கால அஸ்திரத்தைக் கையில் எடுத்தது.

'திமுகவைவிட அதிமுகவே மேல்'
‘திமுகவைவிட அதிமுகவே மேல்’

1993-ஆம் ஆண்டு திமுகவிலிருந்து வைகோ பிரிந்து சென்றபோது அவருடன் சென்றவர் பாலவாக்கம் சோமு. தற்போது தனது ‘தாய் கழக’த்திற்கு திரும்பியிருக்கும் அவர் மதிமுக மீது பல திடுக்கிடும் குற்றச்சாட்டுகளை வைத்திருக்கிறார். “சமீபத்தில் நடந்த மதிமுக உயர்நிலைக்குழு கூட்டத்தில், ஐந்து கட்சிகளுடன்தான் கூட்டணி, சூரியன் உதிக்கும் திசை மாறினாலும் திமுக-வுடன் கூட்டணி வைக்கப்போவதில்லை என்று வைகோ கூறினார். இது எனக்கு பெரும் அதிர்ச்சியை ஏற்படுத்தியது. ஐந்து கட்சிகளுடன் போட்டியிடுவதால் வாக்குகள் பிரிந்து அதிமுக வெற்றி பெற்றுவிடுமே என்று நான் கேட்டபோது, அதிமுக வெற்றி பெறட்டும். திமுகவைவிட அதிமுகவே மேல் என்று வைகோ கூறினார். இந்த பேச்சு என்னை போன்றவர்களை வெறுப்பு அடைய செய்தது” என்று பேசியிருக்கிறார். அதோடு வரும் நாட்களில் தன்னைப் போல பலரும் மதிமுக-விலிருந்து விலகி திமுக-வில் இணைவார்கள் என்று முன் அறிவிப்பும் செய்தார். அதுபோலவே இன்னும் சிலர் இணைந்திருக்கிறார்கள்.

கட்சியில் இருந்து நிர்வாகிகள் விலகுவதும் சேர்வதும் தேர்தல் காலத்தில் ஒரு அத்தியாயமாக மாற்றப்பட்டிருக்கிறது. இதனால் தொடர்புடைய இரண்டு கட்சிகளுக்கும் பலனோ இழப்போ ஏற்படப் போவதில்லை என்பதுதான் கடந்த கால கட்சித் தாவல் வரலாறுகள் கூறுகின்றன. நாஞ்சில் சம்பத் மதிமுகவிலிருந்து விலகியதால் அதிமுகவுக்கு என்ன பலன் கிடைத்துவிட்டது? மதிமுகவுக்கு என்ன நேர்ந்துவிட்டது? இனோவா காரும் கொள்கை பரப்புச் செயலாளர் பதவியும் பெற்று லாபம் அடைந்தது என்னவோ நாஞ்சிலார்தான்! எனவே கட்சிகள் இன்னும் பெரிய ‘தாவல்’களை நிகழ்த்துவதே கட்சிக்கு பலன் சேர்க்கும். வைகோ, கட்சியைக் கலைத்துவிட்டு திமுகவில் இணைந்தாலோ திமுக-வில் இருந்து விலகிய மு.க. அழகிரி அதிமுக-வில் சேர்ந்தாலோ தேர்தல் காலத்தில் நல்ல பலனை தொடர்புடைய கட்சிகள் அறுவடை செய்யலாம்!

சரியான விடையைத் தேர்ந்தெடுக்கவும்: அஇஅதிமுகவின் அதிகாரப் பூர்வ நாளேடு எது? அ.நமது எம்ஜியார் ஆ.தினமணி ஆப்ஷன்கள் ஒரு டஜனுக்கு மேல் தேரும்…தலைப்பின் நீளம் கருதி மற்றவை உள்ளே…

சொத்து வழக்கில் அல்லது சொத்து குவிப்பு வழக்கில் அல்லது ஜெயலலிதாவுக்கு எதிரான சொத்துகுவிப்பு வழக்கிலிருந்து முன்னாள் முதல்வரும் தமிழகத்தின் அடுத்த முதல்வருமான ஜெயலலிதா விடுவிக்கப்பட்டுள்ளார். மோடி, வைகோ, தமிழிசை, ஜி.கே.வாசன் இதர இந்திய அரசியல் தலைவர்கள் வழியில் நானும் வாழ்த்துக்களை சொல்லி வைக்கிறேன். வாழ்த்துக்கள்! சின்மயி போல பாடத் தெரிந்தால் நானும் ஏதாவது ஒரு பெருமாள் கோயிலில் சுப்ரபாதம் பாடி அசத்தியிருப்பேன். கழுதைக் குரல் எனக்கு!

டெல்லியின் அரசியல் தரகு வேலைப் பார்க்கும் ஊடகங்கள் பற்றி தெரிய வந்திருக்கிறது. தமிழகத்தில் அந்தக் குறையை போக்கும்விதமாக செயல்பட்டுக் கொண்டிருக்கிறது தினமணி. குறிப்பாக அதிமுக அல்லது அம்மாவின் அடுத்த ‘மூவ்’ எப்படி இருக்கும் என்பதை தினமணியை கூர்ந்து நோக்கும் எவராலும் தெரிந்துகொள்ள முடியும். நமது எம்ஜிஆரைத் தாண்டி அம்மாவின் செயல்திட்டங்களை மக்கள் மத்தியில் சேர்க்கும் பணியினை செம்மையாக செய்துவருகிறது தினமணி. நமது எம்ஜிஆரைவிட கணிசமான வாசகர்களை வைத்திருக்கும் தினமணி, ’நிமிர்ந்த நன்னடை, நேர்கொண்ட பார்வை நிலத்தில் யார்க்கும் அஞ்சாத நெறிகளோடு’ அதைச் செய்து வருகிறது. அந்த வகையில் சொத்துக் குவிப்பு வழக்கின் மேல் முறையீடு இப்படித்தான் முடியும் என்பது நான் எதிர்பார்த்ததுதான். அதனால் நீதிபதி குமாரசாமி 3 நிமிடங்களில் தீர்ப்பு சொன்னதைக் கேட்டு எனக்கு ‘இதய அடைப்பு’ வரவில்லை.

தினமணியின் இணையத்தில் தீர்ர்பு வருவதற்கு முன்பே இரட்டை இலையை காட்டி வெற்றிச் சிரிப்பில் திளைத்த ஜெயலலிதாவை பார்த்தபோது என் முன்முடிவுகள் சரியென முடிவுக்கு வந்தேன்.

jaya dina

பொதுவாகவே தமிழக (பார்ப்பன) ஊடகங்கள் ஜெயலலிதாவின் அரசி பிம்பத்தை தூக்கி நிறுத்திக் கொண்டிருப்பவைதான்.  ஆனால் அவையெல்லாம் ஜெயலலிதாவுக்கு விசுவாசத்தைக் காட்டும் பணியாட்கள்போல. தள்ளி நின்று கும்பிடு போடுவார்கள். தினமணிதான் ஜெயலலிதாவின் ராஜகுரு! அது சொல்வதைத்தான் அவர் கேட்பார்! பாருங்கள் ஜெயலலிதாவின் விடுவித்தலுக்கு மோடியே எப்படி சல்யூட் அடிக்கிறார் என்று…

jaya modi

தினமணியின்படி அம்மாவின் அடுத்த ‘மூவ்’ எப்படி இருக்கும். சில துளிகள்….

  • அடுத்த ஆண்டுதான் தேர்தல் வரும். தற்போதைய சட்டப்பேரவை விரைவில் களைக்கப்படும் என்று அரசியல் நோக்கர்கள் அநாவசியமாக எதிர்பார்க்கத் தேவையில்லை.
  • ஜி.கே.வாசன் கட்சி தொடங்கியதில் இருந்தே, அவர் கட்சி யாரோடு கூட்டணி வைக்க வேண்டும் என்பதை தினமணி தீர்மானித்துவிட்டது.  அதன்படி வாசன், அதிமுகவின் கூட்டணியில் முதலில் போய் சேர்வார்.
  • இதைச் சொல்ல வேண்டும் என்பதில்லை, பாஜக – அதிமுக கூட்டணி உறுதி. தினமணி நடுநிலையோடு பேச்சுவார்த்தை நடத்தி பாஜகவுக்கு கணிசமான தொகுதிகளைப் பெற்றுத் தரும்.

இப்போது தலைப்பில் கேட்டிருக்கும் கேள்விக்கு பதிலளிப்பது எளிதாக இருக்கும் என்று நம்புகிறேன். பதில் தெரிந்துவிட்டதால் மற்ற ஆப்ஷன்களை பற்றி ஆராய வேண்டிய தேவை இதனால் தவிர்க்கப்படுகிறது.

மேலதிக தகவல்களுக்கு படிக்கவும் இங்கே…

 

 

 

 

அம்பேத்கரின் 125வது பிறந்த நாளை மிகச் சிறப்பாக கொண்டாடியது யார்?

நாங்கள் மனித மாண்பு காக்கவும், சுயமரியாதைக்காகவுமே போராடுகிறோம். மனிதனை ஒரு முழு மனிதனாக மாற்றுவதற்காக, நாங்கள் எந்தத் தியாகத்தையும் செய்யத் தயாராக இருக்கிறோம். இந்தப் பத்திரிகையாளர்கள், கடந்த நாற்பதாண்டுகளாக என்னை வதைத்துக் கொண்டிருக்கிறார்கள். அவர்கள் இன்றுவரை என்னை எவ்வளவு மோசமாக சித்தரிக்கிறார்கள் தெரியுமா? அவர்கள் இனியாவது இந்த முட்டாள்தனத்தைக் கைவிட்டு, நேர்மையுடன் சிந்திக்க வேண்டுமென்று கேட்டுக் கொள்கிறேன். 15.10.1956 அன்று மாபெரும் மதமாற்ற நிகழ்வையொட்டி அம்பேத்கர் ஆற்றிய உரை…

ambedkar_340 ஏப்ரல் 14, அம்பேத்கரின் 125வது பிறந்த நாள். இந்திய சமூகத்தின் மிகச் சிறந்த புரட்சியாரை, அறிவிஜீவியை நாம் எப்படி கொண்டாடி இருக்க வேண்டும்? ஆனால் எப்படி கொண்டாடிக் கொண்டாடி இருக்கிறோம்? திராவிடர் கழகத்திலிருந்து வரும் உண்மை இதழ் தவிர, வெகுஜென, சிறுபத்திரிகை எதுவும் சிறப்பு மலர் அல்லது சிறப்பு கட்டுரையைக்கூட வெளியிட்டதாகத் தெரியவில்லை. முதல் இந்துத்துவ அரசு(!) தவிர்க்க இயலாமல் முழுபக்க விளம்பரத்தில் மங்கிய புகைப்படத்தை வெளியிடுகிறது, அதுவும் அம்பேத்கர் பவுண்டேஷன் என்ற பெயரில்… பார்ப்பன  ஊடகங்கள் அம்பேத்கர் பிறந்த நாளை வழக்கம்போல ’ஒதுங்கியிருந்தே’ கொண்டாடின. ‘ஒதுங்கியிருந்தே’ என்பதை ‘ஒதுக்கி’ என்றும் கொள்ளலாம். முத்துராமலிங்க தேவர், சர்தார் பட்டேல்களை மிகைப்படுத்தி, திரித்து நாயக பிம்பங்களாக நிறுத்தும் பணியை செய்யும் ஊடகங்கள் உண்மையான மக்கள் நாயகனை வெறுமனே மறைந்த அரசியல்வாதியாக, அரசியல் கட்சிகளின் வருடாந்திர நிகழ்வாக பிறந்த நாளில் மாலையிட்டு நினைவுகொள்ளும் சிலையான தலைவராக மட்டுமே முன்நிறுத்துகின்றன. இன்றைய தலைமுறைக்கு அம்பேத்கரை இரட்டடிப்பு செய்து ஊடகங்கள் அறிமுகப்படுத்துகின்றன.

தேவர் ஜெயந்திக்கு வண்ண புகைப்படங்களுடன் மூன்று பக்கங்களில் கவரேஜ் தந்த தினமணி, அம்பேத்கரின் பிறந்த நாளில் புகைப்படத்தைக்கூட பெரியதாக பிரசுரிக்கவில்லை. தலைவர்கள் செலுத்திய அஞ்சலி கருப்பு/வெள்ளையில் செய்தியாகிறது. பாஜக செலுத்திய சம்பிரதாய அஞ்சலி தலித்துகளின் ஓட்டுகளுக்காகத்தான் என்கிற காங்கிரஸின் செய்தி முக்கியத்துவம் பெறுகிறது. தி இந்து (ஆங்கிலம்) அரசியல் கட்சித் தலைவர் செலுத்திய சம்பிரதாய அஞ்சலியைக்கூட கண்டித்து ஓட்டுக்காக ஏன் மாலை போடுகிறீர்கள் என கார்ட்டூன் போட்டு கண்டிக்கிறது. காங்கிரஸ்காரரான சர்தார் வல்லபாய் பட்டேலுக்கு பாஜக அரசு  ரூ. 600 கோடி செலவில் உலகிலேயே மிகப் பெரிய சிலையை நிறுவ அடிக்கல் நாட்டுகிறது. இந்த விலை பட்டேலின் இந்துத்துவ முகத்துக்கு என்பதை மக்கள் அறிவார்கள் என நம்புகிறேன்.

ஆட்சிப் பிடிப்பதில் அடுத்தடுத்த திட்டங்களோடு தயாராக இருக்கும் தமிழகத்தின் மூத்த அரசியல் தலைவர் கருணாநிதி, அம்பேத்கரின் பெயரைக்கூட உச்சரிக்கவில்லை! அவருக்கு இப்போது தேவைப்படுவது ராமானுஜரே, அம்பேத்கர் அல்ல என்பதை நம்மால் புரிந்துகொள்ள முடிகிறது. கிரேக்கத்து சிங்கம் வைகோ, கலிங்கப்பட்டியில் அம்பேத்கர் சிலை மாலை அணிவிக்கவில்லை, இதே சிங்கம் முத்துராமலிங்க தேவரின் சிலைக்கு மாலை அணிவித்து மரியாதை செலுத்திய காட்சி வண்ணப்படங்களுடன் பத்திரிகையில் வெளியானது. திருமாவளவனாவது அம்பேத்கரை நினைவுபடுத்தி ஒரு அறிக்கையாவது விடுவார் என நினைத்தால், மாலை அணிவித்து மரியாதை செய்ததோடு தனக்கும் அம்பேத்கருக்கும் யாதொரும் பந்தமும் இல்லை என்று சொல்லிவிட்டார்.  காங்கிரஸ்காரர்கள் அம்பேத்கரின் 125வது பிறந்த நாளை கொண்டாட பல்வேறு போட்டிகளை நடத்துவோம் என்று அறிக்கை விட்டார்கள். எதிர் நிலையில் நின்று அரசியல் பேசும் பாமக நிறுவனர் ராமதாஸ்கூட தைலாபுரம் தோட்டத்தில் அம்பேத்கர் சிலைக்கு மாலை அணிவித்து மரியாதை செய்கிறார்.  யாரெல்லாம் அம்பேத்கரை நினைக்கிறார்கள், பாருங்கள்!

முற்போக்கு  கட்சிகளாக முன்னிறுத்தி முன்னேறியவர்களுக்கு இன்று தேவைப்படுவது சாதி, மதத்தின் அடிப்படையிலான அரசியல் அதிகாரம். தமது அதிகார நலன்களுக்காக இவர்கள் எதையும் செய்யத் துணிவார்கள். தற்போதைய அரசு தலையில்லாத அரசு, ஊழல் அரசு என்பதையும் இது அகற்றப்பட வேண்டும் என்பதையும் மக்களிடம் கொண்டு சேர்க்கும் போது கடந்த கால அரசுகளின் ஆட்சி பற்றியும் முன்னாள் ஆட்சியாளர்களான அவர்கள் ஆட்சியைப் பிடிக்க எப்படிப்பட்ட வேடங்களை தறித்துக்கொண்டிருக்கிறார்கள் என்பதையும்தான் சொல்ல வேண்டும். இதுவே அவராக இருந்தால் எப்படி இருந்திருக்கும்? அவர் எப்போதும் அவர்தான் என்று நிறுவுவதன் மூலம் அறிவுஜீவிகள் என்று சொல்லிக்கொள்பவர்கள் மீண்டும் ஒரு சோதனையை தமிழக மக்கள் மீது திணிக்கப்பார்க்கிறார்கள். உண்மையில் யார்தான் ஆபத்தானவர்கள்…ஊடகங்களா? அரசியல்வாதிகளா? அறிவுஜீவிகளா?